Efɛzi ye 2 - Cebaara Bible 2010

Yirili kéele kùúw ni n jée sìíw ni

¹ Yele maa pye woguubéle ní, yele kakolobyeri, ní yele kapeegèle báriga ni,

² ànbée yele da ni táanri booma ni ni yɛlɛgi ní dulunyanw naa nàʔama ní, n wɔ́ɔ ni yɛlɛgi ní káfalagi fànʔa kàfɔlɔ ní, wi lè pìipeeli, lee li báara lè Kolocɔlɔɔ syɛ́ɛnri céefɔɔlɔ fúnyo ni.

³ Kánmi bee na wolo myɛ da wɔ́ɔ̀ pínɛ ni táanri ní be ní lǎli bee ni wolo céri ki laànitaʔa, ní di nyɛnɛ kérigèle ni, ní i di kasɔngugèle kpéʔele, pe maa wolo see Kolocɔlɔɔ fundanʔari láara ni àmɛɛ wozanbèle wɔ́ɔ̄ nyɛ lè.

⁴ Kàjáa àmɛɛ Kolocɔlɔɔ nyínimi tɔ̀nɔ n nɛʔɛ lè, a wi tàmaga le ní wolo ní, tàmagi bee n tɔ̀nɔ n kpɔ́ʔɔ.

⁵ Gee bee báriga ni wi da wolo pínɛ n wéege ní Kirisi ní, lǎli ni wolo da pye lè woguubéle ní kapeegèle ni, níì cán wi n wolo syɔɔ wi kpɔ́ʔɔri báriga ni,

⁶ níì wolo pínɛ n nyán n yìrige ní Kirisi ní n télege nyɛ̀ʔɛni tɛ́ɛyɛ ni àmɛɛ wolo nyɛ lè Kirisi Zyezu ni,

⁷ wi n wolo kpɔ́ʔɔ wi funjǎngi báriga ni, koro ga pye bi gi tɛ̀ɛn làrigèle gele ni ge maa lè, àmɛɛ woro kpɔ́ʔɔri nyɛ lè lɔnɛʔɛrɛ wóro Kirisi Zyezu ni.

⁸ Wi n yele syɔɔ wi kpɔ́ʔɔri báriga ni tágali kólogo ni. Ki ga yiri yele tiimaa ni í, Kolocɔlɔɔ yakanʔa gii,

⁹ kapyegèle kólogo ban í jàngó syɔɔnwaa faala í kɔ́ wiyɛɛ gbɔ́ʔɔ í.

¹⁰ Níì cán wolo i nyɛ Kolocɔlɔɔ kɔ́yi yakpéʔelere, wi n wolo faan Kirisi Zyezu ni, koro ga pye wolo í da kacǎngèle kpéʔele, gele woro da kɔ̀rirɔ n sámaga lè jàngó wolo í da táanri ge ni.

Wo i nyɛ nibin Kirisi ni

¹¹ Gee bee na yele bele ye nyɛ lè syɛɛnfeleyaa nikwɔɔ céri kàbaan na, ye sɔ̀ngi ye taa gi na ncan booma ni kɛ́nɛw fɔ̀ɔlɔ, be lè a syɔɔn kɔ́lɔ be kɛ́nɛ céri na, bele bee maa ni yele yiri kɛ́nɛnaa-sìngbeʔelebéle.

¹² Lǎli bee ni yele da Kirisi cán í, yele lɛɛlɛ da wɔ́ɔ̀ pye Isirayɛli ye wɔ́rɔbiigèle nínge ni í, yele maa pye nibɔɔnnɔ nyɔɔfaligi joogaangéle kabaan na, níì pye dulunyanw ni sɔ̀ngumɔ tɛɛtaʔaga fun, yele da wɔ́ɔ̀ Kolocɔlɔɔ cán í.

¹³ Kàjáa Kirisi ni, yele bele ye da léeli lè, yele n baa nùuni tɔ́ɔliw ni Kirisi sìsyaanw báriga ni.

¹⁴ Níì cán woro wi nyɛ wolo bɛ̀ɛ́li sámagafɔlɔ, woro wi wolo féleyi siin kpéʔele nibin wi kùúw báriga ni, níì nigoori gúngo cáan, gee ki da wolo wàli n láʔa woyɛɛ na lè.

¹⁵ Woro wi baa Mowizi làlwaw sàa ní làlwaw kajoogéle, ní wi tundunri myɛ ní jàngó bi wolo siinw kpéʔele syɛɛnfɔ́ɔn nibin wiyɛɛ ni, wolo si pye bɛ̀ɛlɛ na.

¹⁶ Wi n baa wolo myɛ siinw pínɛ cere nibin, níì wo bɛ̀ɛ ní Kolocɔlɔɔ ní wi kùúw báriga ni tiiparigi na, gee bee báriga ni wi nigoori kwɔ́ɔ wo níngi ni.

¹⁷ Wi n pan n baa bɛ̀ɛ́li syɛɛnjóocànra joo yele ma, yele bele ye da léeli lè, ní wɔ́ɔ̀ di joo bele ma pe da nùuni lè.

¹⁸ Níì cán woro bárigaw ni wolo myɛ siinw tɛɛ̀jeʔe taa Tofɔw ma Pìicǎnni nibin ni.

¹⁹ Gee bee na yele ní o nyɛ nibɔɔnnɔ í, wàlá táraa nikwɔɔ wòolo í. Kàjáa yele ní Kolocɔlɔɔ syɛɛncanbèle myɛ i nyɛ tánijanra woolo, ní i nyɛ Kolocɔlɔɔ narigbaagi syɛ̀ɛnnɛ.

²⁰ Kolocɔlɔɔ n yele faan kàpɔɔnw na wi lè pìitunbèle ní kanyaajoobèle. Kirisi Zyezu tiimaa si wi nyɛ jɛ̀ɛ́nni kàdɛnɛzelige.

²¹ Kolocɔlɔɔ i kpáagi myɛ sámagi ni faanri woro ni jàngó gi pye kpɔ̀ʔɔrɔli kpaacanga Kàfɔw ni.

²² Woro ni Kolocɔlɔɔ wɔ́ɔ i yele pínɛ ni faanri jàngó yele í pye Kolocɔlɔɔ tɛɛkòrogo Pìicǎnni báriga ni.