Efɛzi ye 1 - Cebaara Bible 2010

Fòów kéele

¹ Mii Pɔli wi lè Kirisi Zyezu pìituɔn n yɛlɛ ní Kolocɔlɔɔ nyɛ́nɛ kéeli ní, mii a sɛ́bɛw naa tórigo yele ma, yele bele ye nyɛ lè Kolocɔlɔɔ syɛɛncanbèle [Efɛzi ni], ní i nyɛ tágala syɛɛnnɛ Kirisi Zyezu ni.

² Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri, ní fûnnyingi kaan yele ma.

Kacǎnyi Kolocɔlɔɔ kpéʔele wolo ma lè Kirisi ni

³ Wolo Kàfɔw Zyezu Kirisi Kolocɔlɔw wi yɛlɛ ní kpɔ̀ʔɔrɔli ní wi lè wi Tóow, woro wee wi Pìicǎnni kpɔ́ʔɔrɔ féleye myɛ kaan lè wolo ma nyɛ̀ʔɛni tɛ́ɛyɛ ni àmɛɛ wolo nyɛ lè Kirisi ni.

⁴ Níì cán sáni dulunyanw í séli lè, wi maa wolo nyɛ́nɛ n wòlo wolo í pye Kirisi ni, jàngó wolo í sín, si pye tɛɛlɛ fun woro nyɛ́nɛ na. Tàmagi báriga ni

⁵ ki da wi dɛ́nɛ, a wi gi kɔ̀rirɔ n jo wolo í pye woro tiimaa jàala Zyezu Kirisi bárigaw ni n yɛlɛ ní woro nyɛ́nɛ kéeli ní,

⁶ jàngó wolo í da woro kpɔ̀ʔɔrɔ́ wi kpɔ́ʔɔri nìjangbɔɔrɔ kéele na, dee wi kaan wolo ma lè wi Syɛɛn-nidaanmaw ni, wi lè Kirisi.

⁷ Woro ni wolo nyùnzyɔɔri taa wi sìsyaanw wolo báriga ni ti lè wolo kapeegèle kùsulugo syɔɔlɔ n yɛlɛ ní wi kpɔʔɔnɛʔɛri ní.

⁸ Wi n kpɔ́ʔɔri bee kaan wolo ma wonɛʔɛrɛ ní, sícilimi, ní kérigèle cánna myɛ fúngo ni.

⁹ Wi n wi nyɛnɛ kéeli kalarala tɛ̀ɛn wolo na n yɛlɛ ní wi kínidɛnɛgi ní, àmɛɛ wi da gi kɔ̀rirɔ n tímana lè wiyɛɛ fúngi ni níì jo,

¹⁰ lǎli ga baa foro, woro a nyɛ̀ʔɛni ní tári yárira myɛ kàlifáa Kirisi ma, Kirisi si pye ti myɛ nyúngo na.

¹¹ Kolocɔlɔɔ maa wɔ́ɔ̀ wolo nyɛ́nɛ n wòlo, wolo í pye Kirisi ni jàngó wolo í pye woro wòolo n yɛlɛ ní wi nyɛnɛ kakɔrirɔli ní, woro wee wi kérigèle myɛ kpéʔele lè n yɛlɛ ní wi kínidɛnɛgi sɔ̀ngurɔ ní,

¹² koro ga pye wolo í pye wi nìjangbɔɔri kpɔ̀ʔɔrɔlɔ kánma na, wolo bele wo sélì wo sɔ̀ngumi taʔa lè Kirisi na.

¹³ Kánmi bee na yele wɔ́ɔ baa yele sɔ̀ngumi taʔa wi na àmɛɛ yele kányɛɛgi syɛ́ɛnrɛ lóʔo lè, ti lè yele syɔɔli syɛɛnjóocànra, lǎli ni yele tága lè wi na, a Kolocɔlɔɔ wi fɛ̀ɛ́w taʔa yele na, fɛ̀ɛ́w bee wi nyɛ Pìicǎnni, lee nyɔɔfaliga Kolocɔlɔɔ da kpéʔele lè níì jo woro a li kaan,

¹⁴ loro li nyɛ wolo kɔ́rigi yaselige wozanri yɛ́ʔɛ na, bi taa Kolocɔlɔɔ í wi wóbèle syɔɔ foro, koro si pye woro nìjangbɔɔri kpɔ̀ʔɔrɔlɔ kéele na.

Pɔli nyɛ́ɛrigi kéele

¹⁵ Gee bee na nlaa mii gi lóʔo àmɛɛ yele tága Kàfɔw Zyezu na lè, ní àmɛɛ yele tàmaga le ní Kolocɔlɔɔ syɛɛncanbèle myɛ ní lè,

¹⁶ a mii i bariga kaangi Kolocɔlɔɔ ma yele kéeli na làla o làla, koro gi nyɛ mii i yele kéeli nyuu mii nyɛ́ɛriyi ni,

¹⁷ jàngó wolo Kàfɔw Zyezu Kirisi Kolocɔlɔw, wi lè nìjangbɔɔri Tofɔlɔ, woro í sícilimɛ fúnyo kaan yele ma, sáā wi kérigèle tèé yele na, koro ga pye yele í wi sámaga cán.

¹⁸ Wi wɔ́ɔ yele yaʔa yele í da nyaagi yele fúnyi ni, koro ga pye sɔ̀ngumi tɛɛtaʔaga kéele na wi yele yeri lè, yele í gee bee cán bi fàra wi kɔ́rigi nìjangbɔɔrɔ lɔnɛʔɛrɛ na, gi nyɛ lè wi syɛɛncanbèle,

¹⁹ yele si wɔ́ɔ gi cán àmɛɛ wi fǎngi tɔ̀nɔ n nɛʔɛ n sɔ̀lɔ lè ki dǎnw myɛ na, gee gi nyɛ wi ma lè wolo dɛ̀ɛmɛni kéele na, wolo bele wo tága lè.

²⁰ Séekpɔɔw bee ní wi da báara Kirisi ni, lǎli ni wi da wi nyán n yirige lè kúbèle nínge ni n télege wiyɛɛ kàliige ma nyɛ̀ʔɛni tɛ́ɛyɛ ni lè.

²¹ Wi i nyɛ fǎnyi, ní séew, ní bárigaw, ní kùndigiri myɛ nyúngo na n fàra mɛ́ɛyi myɛ na be yiri lè dulunyanw naa ni, ní wee ní wi maa lè.

²² A Kolocɔlɔɔ yáriri myɛ cáan wi tɔ́lɔyi láara ni waa di kàragí, níì wi yaʔa wi pye Egiliziw nyúngo na kérigèle myɛ ni.

²³ Egiliziw i nyɛ Kirisi céri. Woro wee wi yáriri myɛ foro lè kánmi myɛ na, Egiliziw wi nyɛ woro foroli.