Danyɛli 8 - Cebaara Bible 2010

Yanyaa-ziin wógi: Bàpɔw ní sikepɔw kéele

¹ Fànʔafɔw Bɛlisyasari fǎngi yɛɛdaanri wólo na, mii Danyɛli, a mii yanyaagaa nyaa, mii yanyaazeligi kàdoʔo ma.

² Mii maa gi nyaa yanyaagi bee ni, a mii i nyɛ Suzi ni, ki lè fàngegi, Elami tɛ́nɛmi ni, n mii yaʔa wéleli na yanyaagi ni, a mii niyɛɛ nyaa Ulayi cábigi nyɔ́ɔ na.

³ A mii nyapiigèle yìrige ni wéle, a mii bàpɔlɔ nyaa ní nyɛ́ngéle siin ní, woyéreo ní, cábigi nyɔ́ɔ na. Nyɛ́ngèle bee maa tɔnɔ, kàjáa làa maa tɔnɔ làa na, lee li da tɔnɔ lè, loro maa fìin lee kàdoʔo ma.

⁴ A mii gi nyaa a bàpɔw i cínɛ ni máari ní wi nyɛ́ngèle ní canʔajeemɛ, ní solomɔkulo, ní wòrogulo kàbangi na. Yaweegaa faala da pye bi gbǎn yére wi sige í, syɔɔn faala da pye bi gbǎn wàa syɔɔ wi fǎngi ma í. Wi maa ni gi kpéʔele gee ki wi dɛ́nɛ lè, ní i kàa fàrá wiyɛɛ na ni syée.

⁵ N mii yaʔa kéeli bee sɔ̀ngunɔ na, wéle, sikepɔlɔ maa yìri canʔajeemɛ ma ni sɔ̀lɔ́ tásaligi myɛ ǹjoʔo ni, wi si o tángi tári na í. Wélege nyɛ́ngɛ maa pye sikepɔw bee nyapiigéle lariga ni.

⁶ Nyɛ́ngèle siin bapɔlɔ mii da nyaa woyéreo ní cábigi nyɔ́ɔ na lè, a wi sáà nan woro na, níì fùuri n sín wi na ní wi fǎngi myɛ ní.

⁷ A mii wi nyaa a wi nan bàpɔw na, níì fúngi tanʔa wi kurugo gbanʔama. A wi bàpɔw círi n nyɛ́ngèle siin kabagi, bàpɔw ga fànʔa taa n gbàn n yére n wi sige í. A wi wi cáan tári na níì wi tánʔana, syɔɔn faala ga taa n bàpɔw syɔɔ wi fǎngi ma í.

⁸ A sikepɔw tɔ̀nɔ n baa kpɔ́ʔɔ. Kàjáa lǎli ni wi séew baa nɛʔɛ lè, a wi nyɛngbɔɔgi kabi, á wélege nyɛ́nyɛ sicɛrɛ yiri gi sìndɛɛgi ni nyɛ̀ʔɛni kàbanya sicɛrɛ na.

⁹ A nyɛnbiipiile yiri gi kàa na, níì kpɔ́ʔɔ gbanʔama wòrogulo kàbangi, ní canʔafolomɔ kabangi na, ní tácàndeleri kàbaan na.

¹⁰ A li yìri fwɔɔ n sáà nan nyɛ̀ʔɛni sùlasiibéle na, àlí n sùlasiibèle bee pèle, ní ŋɔripiigèle kèle kíle n cáan tári na n tánʔana.

¹¹ A li yìri fwɔɔ n liyɛɛ tímana ní sùlasiibèle Kùndigi ní, níì canʔa o canʔa sárigaw syɔɔ wi ma níì wi tɛɛcǎngi kàcoolo kálagi.

¹² A sùlasiibèle le li kɔ́yi ni n fàra canʔa o canʔa sárigaw na kapeeli kéele na. Li maa kányɛɛgi cáan tári na, ní i fànʔa taagi li kérigèle na.

¹³ A mii wojanwaa joomɔ lóʔo, á wojanwaa nikwɔɔ gi joo wee má wi da ni nyuu lè níì jo: «Làla jòorí yanyaagi a kwɔ́ɔ, gee gi nyɛ lè canʔa o canʔa sárigaw kéele na, ní gàlagí kapeegi kéele na, ní tɛɛcǎngi, ní sùlasiibèle kéele na be tánʔana lè?»

¹⁴ A wi mii pye: «Fwɔɔ bi taa ba nan cângwɔʔɔ nyɔ́ɔyɔ, ní nyɛ̀ʔɛ nyɔ́ɔyɔ selebinnɛ ní sirakele ní dabata, koro kàdoʔo ma tɛɛcǎngi a jée mùnu.»

Yanyaa-ziin wógi kɔ́rɔ tɛ̀ɛnnɛ

¹⁵ Mii Danyɛli, n mii yaʔa yanyaagi bee wélele na, ní i caa mii í gi kɔ́rɔw cán, wéle, a mii nàɔn niwirige nyaa niyɛɛ yɛ́ʔɛ ma woyéreo ní.

¹⁶ A mii nàɔn yákpolo lóʔo Ulayi níngi ni, a wi yákpoli wáa níì jo: «Gabiriyɛli, yanyaagi kɔ́rɔ tɛ̀ɛn nǎnw naa na.»

¹⁷ Lǎli bee ni a wi fala ni maa tɛ́ɛgi ma, gee ni mii da pye lè. Wi ba ni nùuní lè, a fyáari mii cò, a mii too n yɛ́ɛgi cíbele tári na. A wi mii pye: «Mɔ, syɔɔn-pya, ki n yɛlɛ mi gi kɔ́rɔw cán, níì cán yanyaagi bee i nyɛ làrigwɔɔli wóʔo.»

¹⁸ N wi yaʔa jooli na ní mii ní, a mii pǐli yiri mii ni, á mii yɛ́ɛgi kòro wojibelege ní tári na. A wi tánga mii na níì mii yìrige n yérige tɛ́ɛgi ni mii da pye lè.

¹⁹ Níì jo: «Gee ki a ba pye fundanʔagbɔɔri kwɔ́ɔmɔ na lè mii a gi tɛ̀ɛn mɔ na, níì cán làlaa n tɛ́ʔɛ kwɔ́ɔmi kéele na.

²⁰ Bàpɔw mɔ nyaa lè, wee wi da pye ní nyɛ́ngèle siin ní lè, nyɛ́ngèle bee siin i nyɛ Mɛdi ye, ní Pɛrisi ye fànʔafɔbèle.

²¹ Síinɛʔɛgɛ sikepɔw si i nyɛ Yavan fànʔafɔw, nyɛngbɔɔgi gi nyɛ wi nyapiigèle lariga ni lè, fànʔafɔzeliw wii.

²² A gi baa kabi, yee sicɛrɛ si yi yiri gi sìndɛɛgi ni lè, yoro i nyɛ fànya sicɛrɛ, yee yi a yìri syɛɛnfelegi bee ni lè, kàjáa yi fǎngi si a gee wóʔo kwɔ́ɔ í.

²³ Be fǎnyi kwɔ́ɔmɔ na, kapeebyebèle kapeebyere ga foro, fànʔafɔwaa nikwɔɔ a yìri, wee wi a pye lè nɛ̀ɛgbɔʔɔgɔ fɔ́lɔ, ní nigbanaɔ.

²⁴ Wi séew a ra kpɔ́ʔɔgi, kàjáa ki a pye wi tiimaa fǎngi báriga ni í. Wi a bìngaara kálagila kpéʔele, wi kapyegèle a ra nyɔɔgi, wi a séew fɔ̀ɔlɔ, ní wojanbèle syɛɛnfelege kálagi.

²⁵ Wi cánni báriga ni, ní àmɛɛ wi námara kérigèle a ra nyɔɔgi lè, wi a ra wiyɛɛ gbɔ́ʔɔgi fúngi ni, bele be tɛ́ɛn lè sági yɛɛ̀nyinge na, wi a poro pèle saʔa kálagi, si yìri kùndigibèle Kùndigi kánma na. Kàjáa wi a kálagi syɔɔn kɔ́lɔ fun ni.

²⁶ Cângwɔɔyi nyɔ́ɔ, ní nyǐnyi nyɔ́ɔ yanyaʔa kéele i nyɛ kányɛʔɛ. Kàjáa ki n yɛlɛ mɔ í yanyaagi bee kéele làriga, níì cán ki i nyɛ làridɔɔngéle kéele.»

²⁷ Mii Danyɛli, a mii pye báriga fun, ní yaaɔ canya saʔa ni. Koro kàdoʔo ma, a mii yìri ni fànʔafɔw fáli kpéʔele. Mii maa pye funwɔɔrɔ na yanyaagi bee kéele na, níì kòro gi kɔ́rɔw sìnján ni.