Danyɛli 7 - Cebaara Bible 2010

Danyɛli yanyaazeligi: Yaweeyi sicɛrɛ

¹ Babilɔni fànʔafɔw Bɛlisyasari fǎngi yɛɛzelile na, n Danyɛli yaʔa wi yasinɛgi na, a wi ŋúnɔgɔ ŋúnɔ, níì yanyaara nyaa wi pǐli ni. Koro kàdoʔo ma a wi ŋúnɔgi sɛ́bɛ, níì joo gi nyùngboloyi na.

² Danyɛli n gi joo níì jo: «Mii maa ni wéle, a mii gi nyaa yanyaʔa ni, yébiligi ni, wéle, nyɛ̀ʔɛni kàbanya sicɛrɛ káfalaya maa ni funu ní fànʔa ní, sólomi lòkpɔʔɔ na.

³ A yaweekpoloyo sicɛrɛ yiri sólomi lɔ̀ʔɔ ni, ki kàa ga wɔ́ɔ ní kàa ní gi felege na í.

⁴ Wozeligi maa pye àmɛɛ càaraɔ nyɛ lè, ní i nyɛ ní nyɔɔ̀ fókaanya ní. N mii yaʔa gi wéleli na, a mii gi nyaa a pe baa fókaanyi kíle n láʔa gi na, níì gi yìrige n láʔa tári na, níì gi yérige gi tɔ́lɔyi siin na àmɛɛ syɔɔn nyɛ lè, á syɔɔn fúngo kaan gi ma.

⁵ Yaweesiin wógi wéle gee, ki maa ursi wíri. Ki maa yìri n yére lɛ̀ʔɛlɛ nibin na, kótiiye taanri si i nyɛ ki ma nyɔ́ɔgi ni, a gi yi kpàra ní gǎngèle ní. A pe gi pye: ‹Yìri mi kaara saʔa káa.›

⁶ Koro kàdoʔo ma, a mii wéle n yaweegaa nikwɔɔ nyaa. Koro maa pye àmɛɛ sèjɔɔn nyɛ lè. Féjɛnʔɛ fókaanya sicɛrɛ maa pye gi kàdogi na. Nyùnyo sicɛrɛ maa pye yaweegi bee na. A kùndigiri kaan gi ma.

⁷ Koro kàdoʔo ma a mii ní i wéle, n mii yaʔa mii yébiligi yanyaaya nyaana na, a mii yawee-sicɛrɛ wóʔo nyaa, yaweepeʔe gi pye, gee gi pye lè fyáara wóʔo ní, bìngaara fanʔa n pye gi ni. Tunmɔrɔ gǎngboloyo n pye gi na. Ki maa ni líi ní i tɔ́nʔɔnɔni kpéʔele, ní i wogorori tánʔana ní tɔ́lɔyi ní. Ki maa fàli yaweeseliyi myɛ na, nyɛngéle kɛɛ maa pye gi na.

⁸ Mii maa ni sɔ̀ngí nyɛ́ngèle kéele na, wéle, a nyɛnbilaa níì yiri gele nínge ni, a nyɛnzeligèle kèle taanri kɔ́n li yɛ́ʔɛ ma. Wéle nyapiigèlē maa pye nyɛ́nni bee na àmɛɛ syɔɔn nyapiigéle nyɛ lè, a nyɔɔ wɔ́ɔ̀ pye li na, gee ki da ni joogbɔɔmi nyuu lè.

Kolocɔlɔɔ kútiiw kéele

⁹ «N mii yaʔa wélegi na, a mii gi nyaa a pe baa fàngorigēle tɛ́ʔɛ tɛ́ʔɛ, á Wolɛɛtelew baa tɛ́ɛn. Wi búroyi maa fílige àmɛɛ lànɛɛzyiw nyɛ lè, á wi ǹjoori fílige àmɛɛ bàsiitelere nyɛ lè. Wi fàngoli si i nyɛ àmɛɛ naanyìnye nyɛ lè. Li sàkoyi si i nyɛ àmɛɛ naagbanga nyɛ lè.

¹⁰ Naà cábiga maa ni fóo ni yirigi wi yɛʔɛ̀ ma. Wi falipyebèle maa pye saala kagunɔbèlē saʔa, selebingéle kagunɔ kagunɔbèlē saʔa si i yèré wi yɛʔɛ̀ ma. A kútiijoobèle tɛ́ɛn, á sɛ́bɛbèle múgu.

¹¹ A mii i wéle lǎli bee ni, àmɛɛ nyɛ́nni bee da ni joogbɔɔmi nyuu lè. N mii yaʔa wélegi na, a be yaweegi kpóo, a gi céri kálagi, a be gi le náagi ni n gi sórigo.

¹² A yaweeyee wozanya fànʔa syɔɔ yi ma, kàjáa pe maa sìi canya cɛɛri kaan yi ma, a yi kòro beè n làlaa kwɔ́ɔ.

¹³ Mii maa ni wéle mii yébiligi yanyaaya làla ni, wéle, wàa maa pan nyɛ̀ʔɛni fàfaanya ni, wi maa pye àmɛɛ Syɔɔn-pya nyɛ lè. A wi i syée Wolɛɛtelew ma, a be wi nùuni wi na.

¹⁴ A be kùndigiri, ní kpɔ́ʔɔri, ní fǎngi kaan wi ma. A syɛ́ɛnbèle myɛ, ní syɛɛnfeleyi, ní syɛɛnfeleri myɛ joofɔɔlɔ i báara wi ma. Wi kùndigiri i nyɛ bàngwɔɔ kùndigire, ti a tée kwɔ́ɔ í, wi fǎngi si a tée kálagi í.

Yanyaazeligi kɔ́rɔ tɛ̀ɛnnɛ

¹⁵ «A mii Danyɛli fúngi curugo mii na, a mii yanyaari zɔ̀nviikɔnirɔ wáa mii na.

¹⁶ Bele be pye yaà woyérebéle ní lè a mii nùuni poro wàa na n wi yíbe níì jo wi kérigèle bee kányɛʔɛ tɛ̀ɛn mii na. A wi joo ní mii ní níì ge kɔ́rɔw fílige n tɛ̀ɛn mii na.

¹⁷ Yaweekpoloyi bee yi pye lè sicɛrɛ, yee bee i nyɛ fànʔafɔɔlɔ sicɛrɛ, bele pe a ba yìri naa lè tári na.

¹⁸ Kàjáa, wee wi nyɛ lè Pe Myɛ Nyúngo na, woro wojanbèle a ba fǎngi taa, fǎngi a pye be woʔò làla o làla kwɔ́ɔmɔ fun.

¹⁹ Koro kàdoʔo ma, mii maa ni caa bi yawee-sicɛrɛ wógi kéele fílige cán, gee ki da fàli wozanyee myɛ na lè, gee ki da pye lè fyáakpɔɔrɔ wóʔo ni, gee gànʔana ke da pye lè tunmɔrɔ, ki kajinyi si i nyɛ kanyɛɛnrɛ, ki si i líi, ní i tɔ́nʔɔnɔni kpéʔele, ní i wogorori tánʔana ní tɔ́lɔyi ní.

²⁰ Si wɔ́ɔ kàa cán nyɛ́ngèle gele kɛɛ kéele ni ge pye ki nyúngi na lè, ní lee li ní baa yiri lè, loro lee yɛ́ʔɛ ma gele taanri kɔ́n n too lè, nyɛ́nni bee na nyapiigèlē da pye lè, nyɔɔ si i nyɛ li na, a li i joogbɔɔmi nyuu, ní àmɛɛ li da kpɔ́ʔɔ n sɔ̀lɔ gele na lè.

²¹ A mii i nyɛ́nni bee wéle, àmɛɛ li da ni kapɛɛnni kpúmɔn ní syɛɛncanbèle ní lè, níì fànʔa taa be na,

²² fwɔɔ n taa a Wolɛɛtelew pan, ní baa tànʔa kaan wee wi nyɛ Pe Myɛ Nyúngo na lè woro wojanbèle ma, fwɔɔ n taa a lǎli baa nan, lee ni fǎngi baa pye lè wojanbèle wóʔo.

²³ A wi gi joo mii ma kánmi naa na níì jo: ‹Yawee-sicɛrɛ wógi i nyɛ fànya sicɛrɛ wógi, gee ki a ba pye naa tári na lè, ki a fàli fànzanyee myɛ na, ki a tári myɛ lìi si di tánʔana si di tɔ́nʔɔnɔ.

²⁴ Gee gi nyɛ́ngèle kɛɛ kéele kwɔ́ɔ lè, gele bee i nyɛ fànʔafɔɔlɔ kɛɛ, bele pe a ba yìri fǎngi bee ni lè. Wàa nikwɔɔ si ba yìri bele kàdoʔo ma, wi ní wozelibèle a pye sèjira í, wi a fànʔafɔɔlɔ taanri cáan si fǎngi láa.

²⁵ Wee wi nyɛ Pe Myɛ Nyúngo na lè, wi a ra syɛɛnpeeri nyuu woro na, wee wi nyɛ Pe Myɛ Nyúngo na lè wi a ra woro wojanbèle wɔʔɔ gbanʔama, wi a ra caa bi làrigèle ní làlwaw kàriga, wojanbèle a le wi kɔ́yi ni bi taa làla nibin ní làrigèle kèle, ní làlaa tíla í ba kwɔ́ɔ.

²⁶ Koro kàdoʔo ma kútiiw a ba kúun, pe a wi kùndigiri syɔɔ wi ma, dee ti a kálagi lè, bi pùuni bi kwɔ́ɔ gi ni péw.

²⁷ Fǎngi, ní kùndigiri, ní nyɛ̀ʔɛni láara fanya myɛ kpɔ́ʔɔrɔ a kaan, wee wi nyɛ Pe Myɛ Nyúngo na lè woro wojanbèle syɛɛnfelege ma. Wi fǎngi a pye bàngwɔɔ fànʔa, kùndigibèle myɛ a ra báara wi ma sáā lúro wi ma.›

²⁸ Nɛɛ naa syɛ́ɛnri kwɔ́ɔ. Mii Danyɛli, a mii sɔ̀nguri tɔ̀nɔ n fyáakpɔɔrɔ wáa mii na, a mii césaligi kánma fàli a mii si syɛ́ɛnri bee yaʔa niyɛɛ fúngi ni.»