Danyɛli 6 - Cebaara Bible 2010

Danyɛli nígoobèle n karinyanga le wi na

¹ Dariyusi wi lè mɛdiw, wi sìíw yɛ̀ʔɛlɛ togoye taanri ní siin wóli na wi fǎngi taa.

² A Dariyusi gi nyaa a gi nyɔɔ woro í tári kacɔɔnribéle togoye kɔrɔni télege fǎngi nyúngo na, pe pye fǎngi tɛ́ɛyɛ myɛ ni.

³ A wi kùndigibéle taanri télege tári kacɔɔnribéle nyúngo na. Danyɛli si maa pye kùndigibèle bee taanri ni, poro má tári kacɔɔnribéle da yɛlɛ bàā be fáliw kèlē nyuu, jàngó gàlagí faala a kɔ́ nan fànʔafɔw na í.

⁴ Danyɛli tiimaa si maa sɔ̀lɔ kùndigibèle, ní tári kacɔɔnribéle na, níì cán bìngaara pile maa pye wi ni, a fànʔafɔw i sɔ̀ngí bi wi télege fǎngi myɛ nyúngo na.

⁵ Lǎli bee ni a kùndigibèle ní tári kacɔɔnribéle i keelaa caa bi kolomɔ taʔa Danyɛli na fǎngi kéelaa na. Kàjáa pe ga gbàn n kolomɔ kéelaa wàlá tɛɛpùununɔ faala nyaa wi na í, níì cán wi maa pye tágala syɔ́ɔn, dìgire kéele wàlá tɛɛpùununɔ da pye wi na í.

⁶ Lǎli bee ni a nǎnbèle bee jo: «Wolo a tée kolomɔ kéelaa taa Danyɛliw bee na í, fwɔɔ wo ga làa caa wi Kolocɔlɔw làlwa kàbaan na.»

⁷ A Kùndigibèle bee ní tári kacɔɔnribèle bee kpóʔoro n kári fànʔafɔw ma n sáà wi pye: «Fànʔafɔw Dariyusi, ki n yɛlɛ mɔ í kòro sìi na làla o làla!

⁸ Fǎngi kùndigibéle myɛ, ní pirefebèle, ní tári kacɔɔnribéle, ní yarifɔbèle, ní tátɛɛyi kàfɔɔlɔ n peyɛɛ nyaa n bɛ̀ɛ gi na níì jo làlwa kéelaa n yɛlɛ li jáari, lee li a gi joo gbàn lè si jo: ‹Canya toko ní kpɔrigɔ fúngo ni, syɔ́ɔnwee faala wi ga nyɛ́ɛri lè kolocɔlɔɔwaa wàlá syɔɔnwaa ma, kapye fànʔafɔw nibin ma ban í, pe a syɔ́ɔnw bee wáa càarabèle ma wéegi ni.›

⁹ Tɔ́ɔliw ni, ee fànʔafɔw, ki n yɛlɛ mɔ í làlwa kéeli bee sɛ́bɛ, si mɔ fɛɛw taʔa li na, koro ga pye li a ní kɔ́ gbǎn kàri í, n yɛlɛ ní Mɛdi ye, ní Pɛrisi ye làlwaw kánma ní, li a ní gbǎn sàa í.»

¹⁰ A fànʔafɔw Dariyusi wi fɛ̀ɛ́w taʔa kéeli sɛ́bɛ na li yɛlɛ bi yaʔa lè.

Pe n Danyɛli wáa càarabèle ma wéegi ni

¹¹ Lǎli ni Danyɛli gi cán lè fɛ̀ɛ́w n taʔa sɛ́bɛw na, a wi lúgu n jée wi kpáagi ni, beè kpaataʔagi kpaafungo fɛnɛtiribéle pye lè womúgubéle ní n wáa Zyerusalɛmi kàbangi na. A wi i kpùmɔnɔ́ wi yégunri na canʔa o canʔa tɔlɔyɔ taanri ni wi kolocɔlɔw nyɛ́ɛri, ní i wi sòoló, àmɛɛ wi da tàli ni gi kpéʔele lè.

¹² Lǎli bee ni a nǎnbèle bee kpóʔoro n kári n sáà jée n Danyɛli nyaa wi i nyɛ́ɛrigbɔʔɔ nyɛ́ɛri ní i wi Kolocɔlɔw mɛ́ʔɛ yeri.

¹³ Koro kàdoʔo ma a be kári n sáà fànʔafɔw nyaa n joo ní wi ní làlwaw kéele na, wee wi télege lè, níì wi pye: «Ee fànʔafɔw, mɔ ga fɛ̀ɛ́w taʔa làlwa kéeli naa sɛ́bɛ na ì, lee li jo lè: Canya toko ní kpɔrigɔ fúngo ni, wee wi ga nyɛ́ɛri lè Kolocɔlɔwaa ma, wàlá syɔɔnwaa ma kapye mɔ fànʔafɔw nibin ma ban í, wi a wáa càarabèle ma wéegi ni ì?» A fànʔafɔw be yari: «Kéeli bee i nyɛ kányɛʔɛ n yɛlɛ ní Mɛdi ye, ní Pɛrisi ye làlwaw kánma ní, wi lè wi a gbǎn sàa í.»

¹⁴ A be níì syɛ́ɛnri láa n gi joo fànʔafɔw ma níì jo: «Danyɛli wi nyɛ lè Zyuda wojobèle ni, wi o mɔ córo í, ee fànʔafɔw, wàlá làlwa kéelee na mɔ fɛ̀ɛ́w taʔa lè, wi i wi nyɛ́ɛrigi kpéʔele tɔlɔyɔ taanri cángi ni.»

¹⁵ Lǎli ni fànʔafɔw syɛ́ɛnri bee lóʔo lè, a gi tɔ̀nɔ n gbàn wi ma gbanʔama. A wi gi tímana wi fúngi ni bi Danyɛli syɔɔ, a wi i kanmaa caa bi wi syɔɔ fwɔɔ n taa a cángi baa too.

¹⁶ Kàjáa a nǎnbèle bee kpóʔoro n kári fànʔafɔw ma, n sáà gi joo fànʔafɔw ma níì jo: «Ee fànʔafɔw, ki cán mi cán bi yɛlɛ ní Mɛdi ye, ní Pɛrisi ye làlwaw ní, fànʔafɔw ga keelaa yérige wàlá n làlwa kéelaa télege, li làa a gbǎn kàri í.»

¹⁷ Lǎli bee ni a fànʔafɔw gi joo níì jo paa syée ní Danyɛli ní pe sa wi wáa càarabèle ma wéegi ni. A fànʔafɔw syɛ́ɛnri naa joo Danyɛli ma níì wi pye: «Mɔ kolocɔlɔwee má mɔ kòro ni báara lè ki n yɛlɛ woro í mɔ syɔɔ.»

¹⁸ A be pan ní kàdɛnɛgɛ ní n baa tɔ́n wéegi nyɔ́ɔ na. A fànʔafɔw wi fɛ̀ɛ́w, ní wi syɛɛnkpolobèle fɛ̀ɛ taʔa gi na, jàngó yarigaa faala a kɔ́ kàri Danyɛli kéeli na í.

¹⁹ Koro kàdoʔo ma a fànʔafɔw lúru n kári wi fànʔafɔ-gbaagi ma, ní sáà syɔ́ɔn súnw na, wi ga fɔ̀lɔ be cefàra-mí-láawaa lége woro kurugo í, á ŋúnɔmi wɔ́ɔ̀ pɛ́ɛ wi na.

Danyɛli n yiri wojaɔn ní càarabèle wéʔe ni

²⁰ A fànʔafɔw sɔ̀li n yìri nyǐngi nyɔ́ɔ na nyǐnjerigi na n kári kelekele càarabèle wéʔe ma.

²¹ A wi ga sáà nùuni wéegi na, a wi Danyɛli yeri ní funbɛɛnrɛ yákpolo ní. Fànʔafɔw n syɛ́ɛnri láa n gi joo Danyɛli ma níì jo: «Danyɛli, mɔ wi lè Kolocɔlɔɔ woweew falipyeo, mɔ kolocɔlɔwee má mɔ kòro ni báara lè, a wi gbàn lé n mɔ syɔɔ càarabèle ma?»

²² A Danyɛli fala ni nyuu ní fànʔafɔw ní níì jo: «Ee fànʔafɔw, ki n yɛlɛ mɔ í kòro sìi na làla o làla.

²³ Mii Kolocɔlɔw n wi nyɛ̀ʔɛni tunduɔn tun a wi baa càarabèle nyɔ́ɔyɔ pwɔɔ n tɔ́n, níì cán mii n pye tɛɛlɛ fun wi yɛʔɛ̀ ma, mii si ga wɔ́ɔ̀ kapeʔe faala pye mɔ yɛ́ʔɛ ma í, ee fànʔafɔw.»

²⁴ Lǎli bee ni a gi pye fànʔafɔw ma fundaangbɔɔrɔ, a wi be pye be Danyɛli yirige wéegi ni, a be Danyɛli yirige wéegi ni, n gi nyaa tɛɛkpàliga faala ga pye wi na í, níì cán wi maa tága wi Kolocɔlɔw na.

²⁵ A fànʔafɔw gi joo n gbàn níì jo be pan ní nǎnbèle bee ní poro bele pe da sɔ́ɔn Danyɛli na lè, a pe baa be wáa càarabèle ma wéegi ni, poro ní be pìíbèle, ní be cébèle. Sáni pe nan wéegi nɔ́ʔɔ na lè, a càarabèle téè be cò n be kaceleyi myɛ kabagi kabagi.

²⁶ Koro kàdoʔo ma, a fànʔafɔw Dariyusi sɛ́bɛ sɛ́bɛ n tórigo syɛ́ɛnbèle myɛ, ní syɛɛnfeleyi ma, ní syɛɛnfeleri myɛ joofɔɔlɔ ma pe nyɛ lè tári myɛ ni, níì jo: «Ki n yɛlɛ yɛɛ̀nyingi í pye yele ma saʔa.

²⁷ Làlwa kéeli mii joo n gbàn lè loro li lee naa: Mii fǎngi tɛ́nɛmɛ myɛ ni, ki n yɛlɛ paa fɛ̀ɛgí Danyɛli Kolocɔlɔw na sáā wi kpɔ́ʔɔgi. Níì cán woro wi nyɛ Kolocɔlɔɔ woweew, wi a kòro beè làla o làla! Wi fǎngi a tée kálagi nyáana í, wi kùndigiri a kòro beè bi ba nan gi kwɔ́ɔmi na.

²⁸ Woro wi syɔɔn syoo, ni syɔɔn yirigi keele ni, woro wi fɛ̀ɛ́bèle ní kakpoloyi kpéʔele nyɛ̀ʔɛni ni, ní tári na. Woro wi Danyɛli syɔɔ càarabèle fànʔa ma.»

²⁹ Danyɛliw bee wi da báriga Dariyusi fǎngi làla ni, ní Pɛrisi ye Sirusi fǎngi làla ni.