Danyɛli 5 - Cebaara Bible 2010

Fànʔafɔw Bɛlisyasari lìigbɔɔli kéele

¹ A fànʔafɔw Bɛlisyasari lìigbɔɔlɔ sámaga wi syɛɛnkpolobèle ma be pye lè saala kagunɔ, a wi dùvɛɛnw gbaa saala kagunɔw bee nyɛ́nɛ na.

² N Bɛlisyasari yaʔa dùvɛɛnw gbaala na, a wi gi joo n gbàn níì jo be sa yalegèle láa paa maa woro ma, ke lè tɛ́ɛw ní wálifiiw wòʔolo, koro gele wi tóow Nebukadinezari da sáà láa kpɔ̀ʔɔrɔli kpaʔa ni Zyerusalɛmi ni lè, koro ga pye fànʔafɔw, ní wi cébèle, ní wi cefàra-mí-láabèle, ní wi syɛɛnkpolobèle í ba gbaa ge ni.

³ Lǎli bee ni a be pan ní yalegèle ní fànʔafɔw ma, ke lè tɛ́ɛw wòʔolo, koro gele pe da sáà láa kpɔ̀ʔɔrɔli kpaʔa ni ki lè Kolocɔlɔɔ kpáagi Zyerusalɛmi ni lè. A fànʔafɔw ní wi syɛɛnkpolobèle, ní wi cébèle, ní wi cefàra-mí-láabèle ba ni gbo ge ni.

⁴ A be dùvɛɛnw gbaa, ní i kolocɔlɔbèle sòoló be lè tɛɛ̀, ní wálifiio, ní kanyɛɛnrɛ, ní tunmɔrɔ, ní tiire, ní kàdɛnɛrɛ.

⁵ A be fala n syɔɔn kɔ́lɔ kabɛʔɛlɛ nyaa a ge yiri ni sɛ́bɛ fètindaʔali zìnmɛ na, fànʔafɔ-gbaagi gúngo laso na. A fànʔafɔw kabenyɔɔri bee nyaa, dee ti da ni sɛ́bɛ lè.

⁶ Lǎli bee ni a fànʔafɔw césaliga fàli, a wi sɔ̀nguri curugo, a ki wi sárigèle ceri, a wi yégunyi i cɛ̀lɛ́ ni cínɛ yiyɛɛ na.

⁷ A fànʔafɔw yákpogi wáa ní fànʔa ní n gi joo níì jo paa maa ní kanyaabèle, ní Kalide ye, ní cɛ́lɛfɔbèle ní. A fànʔafɔw baa gi joo Babilɔni sícilibèle ma níì jo: «Syɔ́ɔnwee wi ga gbàn n sɛ́bɛri naa wéle níì di kɔ́rɔw joo mii ma lè burogbɔɔ-nyɛ̀nʔɛ a le wi na, tɛɛ̀ nyɔ̀ʔɔmɔ si wɔ́ɔ le wi yátiigi ni, wí pye fǎngi kùndigi-taanri wóo.»

⁸ A fànʔafɔw sícìlibēle myɛ jée, kàjáa pe ga gbàn n sɛ́bɛri wéle í, wàlá n di kɔ́rɔw joo fànʔafɔw ma í.

⁹ A koro gi kaan a fyáakpɔɔrɔ tɔ̀nɔ n fànʔafɔw Bɛlisyasari cò, a wi césaligi fàli, a wi syɛɛnkpolobèle fúnyo nyáʔami be na.

Danyɛli n kalarali sɛ́bɛrɛ kɔ́rɔ joo

¹⁰ A fànʔafɔjew sáà jée lìíli kpaʔa ni, fànʔafɔw, ní wi syɛɛnkpolobèle syɛɛnjóoro báriga ni, ní sáà gi joo níì jo: «Ee fànʔafɔw, ki n yɛlɛ mɔ í kòro sìi na làla o làla! Mɔ sɔnguri a kɔ́ curugo í, mɔ césaligi ga yɛlɛ bi fàli í!

¹¹ Nànwaa i naa mɔ fangi tɛ́nɛmɛ ni, wee ni kolocɔlɔcǎnbèle pìle nyɛ lè. Mɔ tóow làla ni, gbɛ̀ɛ́nmi, ní cánni, ní sícilimi maa ni taagi wi ma, sícilimi bi kolocɔlɔbèle wómɔ wíri lè. A gi wɔ́ɔ̀ pye fànʔafɔw Nebukadinezari wi lè mɔ tóow, woro maa wi télege cɛ́lɛfɔbèle, ní kanyaabèle, ní kacánbèle, ní wélefɔbèle nyúngo na.

¹² Níì cán woro wee wi lè Danyɛli, á fànʔafɔw da mɛ́ʔɛ le wi na ni wi yiri Bɛlitisyasari, woro ni bingaara pile, ní kérigèle cánna, ní cánni, ní ŋúnɔyi kɔ́rɔ joolo fanʔa, ní kàseegèle kɔ́rɔ tɛ̀ɛnnɛ, ní yíbegbanyi syɛɛnlurugoro kaanna nyɛ. Koro na, ki n yɛlɛ pe Danyɛli yeri yaà, wi a ba di kɔ́rɔw joo.»

¹³ Lǎli bee ni a be pan ní Danyɛli ní fànʔafɔw yɛ́ʔɛ ma. A fànʔafɔw baa gi joo Danyɛli ma níì wi pye: «Mɔ lé wi nyɛ Danyɛliw, wi lè wojobèle ni, bele mii tóow, fànʔafɔw sáà cò lè Zyuda ma n pan?

¹⁴ Mii n mɔ kéeli lóʔo a gi jo kolocɔlɔbèle pìle i nyɛ mɔ ni, ncan gbɛ̀ɛ́nmi, ní cánni, ní bìngaara sícilimɛ i nyɛ mɔ ma.

¹⁵ Pe n pan mii ma ní sícilibèle, ní kanyaabèle ní, koro ga pye pe ba sɛ́bɛri naa wéle si di kɔ́rɔw joo tɛ̀ɛn mii na, kàjáa pe ga gbàn n syɛɛnkanyi kɔ́rɔ joo mii ma í.

¹⁶ Mii n mɔ kéeli lóʔo a gi jo mɔ n gbàn ni kèlē kɔ́rɔ nyuu, ní wɔ́ɔ̀ gbàn ni yíbegbanyi syɛɛnlurugoro kaangi. Tɔ́ɔliw ni doò, mɔ ga gbàn n sɛ́bɛri naa wéle níì di kɔ́rɔw joo mii ma, burogbɔɔ-nyɛ̀nʔɛ a le mɔ na, mɔ a tɛɛ̀ nyɔ̀ʔɔmɔ le mɔ yátiigi ni, si pye kùndigi-taanri wów fǎngi ni.»

¹⁷ A Danyɛli gi joo fànʔafɔw yɛ́ʔɛ ma níì wi yari: «Mɔ yakaanri yaʔa miyɛɛ ma, mɔ kpɔ́ʔɔri kaan wàa nikwɔɔ ma. Mii si a sèʔé sɛ́bɛri wéle fànʔafɔw ma, si di kɔ́rɔw joo wi ma.

¹⁸ Ee fànʔafɔw, Kolocɔlɔɔ wi lè Pe Myɛ Nyúngo na, wi maa fǎngi, ní kpɔʔɔgbɔɔri, ní kpɔ́ɔmi, ní nìjanri kaan mɔ tóow Nebukadinezari ma.

¹⁹ Kpɔʔɔgbɔɔri ti da kaan wi ma lè syɛ́ɛnbèle myɛ, ní syɛɛnfeleyi myɛ, ní syɛɛnfeleri joofɔɔlɔ myɛ maa ni fɛ̀ɛgí wi na, ní i cɛ̀lɛ́ wi yɛʔɛ̀ ma dee bee kéele na. Wi maa ni be kúu, bele wi caa bi kpóo lè, ní i be yaari sìi na, bele wi caa bi yaʔa lè, ní i be kpólogi, bele wi caa bi kpólo lè, ní i be cɛ́rɛgi, bele wi caa bi cɛ́rɛ lè.

²⁰ Kàjáa lǎli ni wi baa wiyɛɛ gbɔ́ʔɔ wi fúngi ni lè, níì wi zɔ̌nw gbàn fwɔɔ n nan nɛ̀ɛgbɔʔɔgi na, lǎli bee ni, a wi nɛnɛ n yìrige wi fàngoli na, a wi nìjanri wòlo wi na.

²¹ A wi nɛnɛ n yirige syɔɔn ye níngi ni, a wi fúngi kàri n pye àmɛɛ yaweeri wóyo nyɛ lè, a wi tɛɛkòrogi pye seʔe jofanibèle nínge ni. A nyàági pye wi yaliiri àmɛɛ nǐyi nyɛ lè, a nyɛ̀ʔɛni kásaga i wi céri nyíngi fwɔɔ n taa a wi baa gi cán Kolocɔlɔɔ wi nyɛ lè Pe Myɛ Nyúngo na, woro wi nyɛ syɔɔn ye fǎngi nyúngo na, wi i gi kaangi wee má wi caa bi gi kaan lè.

²² Mɔ Bɛlisyasari wi lè wi jáaw, mɔ ga fɔ̀lɔ n miyɛɛ jɛ́rɛ mɔ fúngi ni í, àlí bi gi taa mɔ n kérigèle bee myɛ cán,

²³ níì miyɛɛ gbɔ́ʔɔ nyɛ̀ʔɛgèle Kàfɔlɔ kánma na. Mɔ n be pye a be pan ní wi kpáagi yalegéle ní mɔ yɛ́ʔɛ ma, a yele baa dùvɛɛnw gbaa ge ni, mɔ ní mɔ syɛɛnkpolobèle, ní mɔ cébèle, ní mɔ cefàra-mí-láabèle, níì kolocɔlɔbèle kpɔ̀ʔɔrɔ be lè wálifiio, ní tɛɛ̀, ní kanyɛɛnrɛ, ní tunmɔrɔ, ní tiire, ní kàdɛnɛrɛ, bele be lè pe o nyaagi í, pe o lúro í, cánna o be ma í. Kolocɔlɔwee kɔ́lɔ ni mɔ ŋɔ́ngari, ní mɔ kóloyi nyɛ lè, woro wi nyɛ mɔ ga wi kpɔ́ʔɔ í.

²⁴ Koro na si wi kabenyɔɔri bee tórigo a ti baa sɛ́bɛri naa sɛ́bɛ.

²⁵ Sɛ́bɛri di dee naa, dee ti baa sɛ́bɛ lè: MƐNE, MƐNE, TEKƐLI, PARISƐN.

²⁶ Syɛɛnkanyi bee kɔ́rɔ wi nyɛ wee naa: Mɛne kɔ́rɔw wi nyɛ Kolocɔlɔɔ n mɔ fangi córo, níì gi kwɔ́ɔ.

²⁷ Tekɛli kɔ́rɔw wi nyɛ mɔ n cáan cúlow na, a mɔ nyaa wovaʔaɔ ní.

²⁸ Parisɛn kɔ́rɔw si i nyɛ mɔ fangi a tíla tíla bi kaan Mɛdi ye, ní Pɛrisi ye ma.»

²⁹ A Bɛlisyasari fala n gi joo n gbàn níì jo be burogbɔɔ-nyɛ̀nʔɛ le Danyɛli na, pé tɛɛ̀ nyɔ̀ʔɔmɔ le wi yátiigi ni, pé wi kéeli jáari si jo woro wi a pye fǎngi kùndigi-taanri wóo.

³⁰ Yébiligi bee wonijanga ni, a pe baa Kalide ye fànʔafɔw Bɛlisyasari kpóo.