Danyɛli 4 - Cebaara Bible 2010

¹ Mii Nebukadinezari, mii maa pye wodɛ́ɛɔn ní sági mii kpáagi ni, níì pye fundaanra na mii fànʔafɔ-gbaagi ni.

² A mii ŋúnɔgɔ ŋúnɔ, a gi zɔ̀nviikɔnirɔ wáa mii na. N mii yaʔa mii yasinɛgi na, sɔ̀nguri di pye mii na lè, ní mii fúngi yanyaara, a toro fyáakpɔɔrɔ wáa mii na.

³ A mii gi joo n gbàn níì jo paa maa mii yɛ́ʔɛ ma ní Babilɔni sícilibèle myɛ ní, koro ga pye pe ba ŋúnɔgi kɔ́rɔ joo mii ma.

⁴ Lǎli bee ni a cɛ́lɛfɔbèle, ní kanyaabèle, ní Kalide ye, ní wélefɔbèle pan. A mii baa ŋúnɔgi joo be ma, kàjáa pe ga gi kɔ́rɔw joo mii ma í.

⁵ A Danyɛli pan poro kàdoʔo ma n baa yére mii yɛ́ʔɛ ma, pe wɔ́ɔ i wi yiri Bɛlitisyasari, mii kolocɔlɔw dɔʔɔma wii, kolocɔlɔcǎnbèle pìle i nyɛ wi ni.

⁶ A mii ŋúnɔgi joo wi ma, níì jo: «Bɛlitisyasari, mɔ wi lè cɛ́lɛfɔbèle kùndigi, mii n gi cán ncan mɔ ni kolocɔlɔcǎnbèle pìle nyɛ, ncan kalaralaa faala ga gbàn mɔ ma í, yáriree mii nyaa ŋúnɔgi na lè, di kɔ́rɔw joo mii ma.

⁷ N mii yaʔa mii yasinɛgi na, yanyaayi mii nyaa mii sɔ̀nguri ni lè, yoro yi nyɛ yee naa: Mii n tiige nyaa tári nínge ni, ki maa tɔnɔ gbanʔama.

⁸ Tíigi bee maa kpɔ́ʔɔ níì nìri, ki fínaagi maa kári fwɔɔ n sáà nan nyɛ̀ʔɛni na, syɔɔn ye maa ni gi nyaagi bi be yaʔa yaà tári láʔagéle myɛ ma.

⁹ Ki wári maa nyɔɔ, a gi yasanri nɛʔɛ, a yáriri myɛ i lìile taagi gi ni. Sìnbirigi yaweere maa ni kòró ki nyínmi ni, féjɛɛngèle maa ni kòró ki káganyi ni, sìi yáriri myɛ maa ni di lìíli taagi gi ni.

¹⁰ Yanyaari mii nyaa mii sɔ̀nguri ni n mii yaʔa mii yasinɛgi na lè, mii maa ni wéle, a mii nyɛ̀ʔɛni tundunwaa nyaa, a wi yìri nyɛ̀ʔɛni na n tìgi naa.

¹¹ A wi yákpoli wáa ní fànʔa ní ni gi nyuu níì jo: ‹Ye tíigi kpúmɔn, ye gi káganyi cɛnɛ. Yé wári láʔa, yé gi yasanri cariga. Ki n yɛlɛ sìnbirigi yaweere í fàn bi yiri ki nyínmi ni, féjɛɛnri si yìri ki káganyi na.

¹² Kàjáa ye gi tiinyungi, ní gi nǐnri yaʔa tári ni, ní túnmɔri, ní kanyɛɛnri yapwɔɔrɔ ní, sìnbirigi nyàā nínge ni. Ki n yɛlɛ nyɛ̀ʔɛni kásaga í da gi nyíngi, ki pínɛ da tári nyàā káa ní sìnbirigi yaweere ní.

¹³ Ki syɛɛnmɛ fúngi a yiri gi ni, yaweʔe fúngo si kaan gi ma, làrigēle kɔrɔsiin si sɔ̀lɔ gi na.

¹⁴ Kajoo-mí-cerili naa i nyɛ nyɛ̀ʔɛni tundunbéle wólo koro ga pye niweebèle í gi cán wee wi nyɛ lè Pe Myɛ Nyúngo na, woro wi nyɛ syɔɔn ye fǎnyi myɛ kùndigi, wi i gi kaangi ni yɛlɛgi ní wi nyɛnɛ kéeli ní, wi i nǎnbèle myɛ kàdotɔɔn télegi gi na.

¹⁵ Koro gi pye ŋúnɔgi, gee mii fànʔafɔw Nebukadinezari ŋúnɔ lè. Mɔ, Bɛlitisyasari, ki kɔ́rɔw joo mii ma, níì cán mii fǎngi tɛ́nɛmɛ síciliwaa faala ga gbàn n gi kɔ́rɔw joo n tɛ̀ɛn mii na í. Kàjáa mɔ na, mɔ fánʔa a taa, níì cán mɔ ni kolocɔlɔcǎnbèle pìle nyɛ.› »

Danyɛli i fànʔafɔw ŋúnɔgɔ kɔ́rɔ nyuu

¹⁶ Lǎli bee ni Danyɛli, pe wɔ́ɔ̄ yiri lè Bɛlitisyasari, a fyáara woro cò, a wi fúngi nyáʔami wi na n làlaa kwɔ́ɔ. A fànʔafɔw jo: «Bɛlitisyasari, ŋúnɔgi ní gi kɔ́rɔw a kɔ́ mɔ fúngi curugo í.» A Bɛlitisyasari wi yari: «Ni kàfɔlɔ ki n yɛlɛ ŋúnɔgi í pye mɔ nigoobèle wóʔo, ki kɔ́rɔw í pye mɔ kasiitun-nyɛnbèle wóo.

¹⁷ Tíigi mɔ nyaa lè a gi kpɔ́ʔɔ níì nìri, koro gee fínaʔa gi nan lè fwɔɔ nyɛ̀ʔɛni na, ki si i nyaagi tári myɛ ni,

¹⁸ á tíigi bee wára nyɔɔ, á gi yasanri nɛʔɛ ní i lìile kaangi pe myɛ ma, koro gee láara ni sìnbirigi yaweere da ni kòró lè, féjɛɛnri si i kòró ki káganyi ni,

¹⁹ mɔ wii, ee fànʔafɔw, mɔ wi baa kpɔ́ʔɔ nya, níì nìri, mɔ n kpɔ́ʔɔ n yìri fwɔɔ n nan nyɛ̀ʔɛni na, mɔ fangi n kpɔ́ʔɔ n nan tári láʔagéle na.

²⁰ Fànʔafɔw n nyɛ̀ʔɛni tundunwaa nyaa, a wi yìri nyɛ̀ʔɛni na n baa tundunri naa joo níì jo: ‹Ye tíigi kpúmɔn, ye gi kálagi, kàjáa ye gi tiinyungi, ní gi nǐnri yaʔa yaà tári ni, túnmɔri ní kanyɛɛnri yapwɔɔrɔ na, sìnbirigi nyàā nínge ni, nyɛ̀ʔɛni kásaga í da gi nyíngi. Ki lɛɛli í pye ní sìnbirigi yaweere ní, fwɔɔ bi taa làrigēle kɔrɔsiin í sɔ̀lɔ gi na.›

²¹ Koro kɔ́rɔw wi nyɛ wee naa fànʔafɔw: Wee wi nyɛ lè Pe Myɛ Nyúngo na, woro kakɔrirɔlɔ lii, lee li a pye lè mii kàfɔw fànʔafɔw na.

²² Pe a mɔ nɛnɛ yirige syɛ́ɛnbèle nínge ni, mɔ tɛɛkòrogi a pye ní sìnbirigi yaweere ní, nyàági ki a pye mɔ yaliiri àmɛɛ nǐyi nyɛ lè. Nyɛ̀ʔɛni kásaga a ra ŋuu mɔ na, làrigēle kɔrɔsiin a sɔ̀lɔ mɔ na fwɔɔ bi taa mɔ í gi cán, wee wi nyɛ lè Pe Myɛ Nyúngo na, woro wi nyɛ syɔɔn ye fǎngi myɛ nyúngo na, wi i gi kaangi wee má ki wi dɛ́nɛ bi gi kaan lè.

²³ Amɛɛ ki da joo n gbàn lè níì jo tiinyungi ní gi nǐnri í kòro yaà tári ni, ki kɔ́rɔw wi nyɛ fǎngi a ní ba lúrugo kaan mɔ ma lǎli ni mɔ ga baa gi cán lè ncan Nyɛ̀ʔɛni [Kolocɔlɔɔ] i nyɛ nyǔngi na.

²⁴ Koro na, ee fànʔafɔw, mii láliiw yaʔa wi mɔ dɛ́nɛ! Mí láʔa mɔ kapeebyeri na máā síngi, mí kakoloyi yaʔa, máā nyinimɛ taagi foomɔfɔbèle na, mɔ ŋɔ́ndaali a mɔn.»

Ŋúnɔgi forolo kéele

²⁵ A gee bee myɛ baa foro fànʔafɔw Nebukadinezari na.

²⁶ Yeye kɛɛ ní siin kwɔ́ɔlɔ kadoʔo ma, wi maa ba ni nyaari ni máari fànʔafɔ-gbaagi ǹjoʔo ni, Babilɔni ni.

²⁷ A fànʔafɔw jo: «Babilɔni wogbɔɔw mii faan lè n pye fǎngi tɛɛ̀tɛ́ɛnnɛ, mii séew fànʔa báriga ni, ní mii nìjanri kpɔ́ʔɔrɔ kéele na, koro ban gee naa ì?»

²⁸ Syɛ́ɛnri maa sèʔê pye fànʔafɔw nyɔ́ɔ na, a yákpolo yìri nyɛ̀ʔɛni na n wi pye: «Mɔ má syɛ́ɛnri naa nyuu fànʔafɔw Nebukadinezari. Mɔ fangi n syɔɔ mɔ ma.

²⁹ Pe a mɔ nɛnɛ yirige syɛ́ɛnbèle nínge ni, mɔ tɛɛkòrogi a sa pye ní sìnbirigi yaweere ní, nyàági ki a pye mɔ yaliiri, àmɛɛ nǐyi nyɛ lè. Làrigēle kɔrɔsiin a sɔ̀lɔ mɔ na, fwɔɔ bi taa mɔ í ba gi cán, wee wi nyɛ lè Pe Myɛ Nyúngo na, woro wi nyɛ syɔɔn ye fǎnyi myɛ nyúngo na, wi i gi kaangi wee má ki wi dɛ́nɛ bi gi kaan lè.»

³⁰ Lǎli bee wonijanna ni a syɛ́ɛnri foro Nebukadinezari na. A pe wi nɛnɛ n yirige syɛ́ɛnbèle nínge ni, a wi i nyàági káa àmɛɛ nǐyi nyɛ lè, a nyɛ̀ʔɛni kásaga i ŋuu wi céri na. A wi ǹjoori baa tɔnɔ n pye àmɛɛ nyɔ́ɔbèle síire nyɛ lè, a wi kajinri pye àmɛɛ féjɛɛnri wóro nyɛ lè.

Nebukadinezari pɔʔɔli kéele

³¹ A lǎli ga baa foro, mii Nebukadinezari, a mii nyapiigèle yìrige n wéle nyɛ̀ʔɛni na, a sɔ̀nguri níì lúru n jée mii ni, wee wi nyɛ lè Pe Myɛ Nyúngo na, mii n wi kaan bariga na, wee wi nyɛ lè sìi na làla o làla, mii n wi sòolo níì wi kpɔ́ʔɔ, woro wee kùndigire di nyɛ lè bàngwɔɔ kùndigire, wi fǎngi si wɔ́ɔ i beè yìrigèle myɛ syɛ̀ɛnnɛ nínge ni.

³² Tári syɛ̀ɛnnɛ myɛ o córo yarigaa wi ma í. Gee ki wi dɛ́nɛ lè koro wi kpéʔele nyɛ̀ʔɛni sùlasiibéle na, ní tári syɛ̀ɛnnɛ na, syɔɔn faala si o beè, wee wi a gbǎn yére wi kɔ́gi sige lè í si wi pye: «Nyàʔá mɔ kpéʔele?»

³³ Lǎli bee ni, a mii sɔ̀nguri lúru n jée mii ni. A mii fǎngi kpɔ́ʔɔrɔ, ní mii nìjanri, ní mii kpɔ́ɔmi lúrugo n kaan mii ma, a mii yarifɔbèle, ní mii wogbolobèle lúru ni mii caa. A be mii lúrugo n télege mii fǎngi na, a kàa kòro ni fàrá mii kpɔ́ʔɔri na ni syée.

³⁴ Tɔ́ɔliw ni, mii Nebukadinezari, mii i nyɛ̀ʔɛni Fànʔafɔlɔ sòoló, mii i wi kpɔ̀ʔɔrɔ́, mii i wi kpɔ́ʔɔgi, àmɛɛ wi kapyegèle myɛ nyɛ lè kányɛʔɛ wòʔolo, á wi kóloyi wɔ́ɔ̀ sín, wee wi a gbǎn be tìrige, bele be táanri nɛ̀ɛnyɛnɛgɛ ni lè.