Danyɛli 2 - Cebaara Bible 2010

Nebukadinezari ŋúnɔzeligi

¹ Nebukadinezari fǎngi yɛɛziin wólo na, a Nebukadinezari ŋúnɔ ní ŋúnɔyɔ ní. A wi fúngi nyáʔami wi na, a ŋúnɔmi pɛ́ɛ wi na.

² A fànʔafɔw tun a be sáà cɛ́lɛfɔbèle, ní kanyaabèle, ní dɛ̀ɛ́bèle, ní Kalide ye yeri, pe ba fànʔafɔw ŋúnɔyɔ tɛ̀ɛn wi na. A be pan n baa yére fànʔafɔw yɛ́ʔɛ ma.

³ A fànʔafɔw be pye: «Mii n ŋúnɔ ní ŋúnɔgɔ ní, mii fúngi si n curugo mii na, àmɛɛ mii caa bi ŋúnɔgi bee cán lè.»

⁴ A Kalide ye joo ní fànʔafɔw ní Arameyɛnri ni níì wi yari: «Ee fànʔafɔw, ki n yɛlɛ mɔ í kòro sìi na làla o làla. Ŋúnɔgi joo wolo ma wo nyɛ lè mɔ falipyebèle, wolo si a gi kɔ́rɔw joo mɔ ma.»

⁵ A fànʔafɔw níì syɛ́ɛnri láa n Kalide ye pye: «Wéle, gee mii kɔ̀rirɔ n tímana lè, yele ga pye yele ga ŋúnɔgi ní gi kɔ́rɔw tɛ̀ɛn mii na í, yele a tɔ̀nɔ́ cɔ̀nʔɔ wii, yele kpáayi si pye gurubɛɛtooro.

⁶ Kàjáa yele ga ŋúnɔgi, ní gi kɔ́rɔw joo mii ma, yele a yakaanra, ní kpɔʔɔrɔ, ní mɛ́ɛkpoloyo taa mii ma. Koro na, ye ŋúnɔgi ní ki kɔ́rɔw joo mii ma.»

⁷ A be níì wi yari tɔziin wógi na: «Ki n yɛlɛ fànʔafɔw í ŋúnɔgi joo wolo ma wo nyɛ lè wi falipyebèle, wolo si a gi kɔ́rɔw joo.»

⁸ A fànʔafɔw syɛ́ɛnri láa níì jo: «Mii n gi cán kányɛʔɛ na, yele i caa bi làlaa taa, níì cán yele n gi nyaa, gee mii kɔ̀rirɔ n tímana lè.

⁹ Yele si ga tɔ̀nɔ n pye yele ga ŋúnɔgi joo mii ma í, kútiinijanw wi a ceri yele na. Yele n sámaga n yaʔa bi jànvaa ní námara syɛ́ɛnraa tímana bi joo mii ma, si sige bi taa làrigèle í ba kàri nya. Koro na ki n yɛlɛ ye ŋúnɔgi joo mii ma, koro ga pye mii a gi cán yele fánʔa i nyɛ bi gbǎn gi kɔ́rɔw joo mii ma.»

¹⁰ A Kalide ye fànʔafɔw yari: «Syɔɔn faala o naa tári na, wee wi a gbǎn gi joo, gee fànʔafɔw caa lè í. Koro na fànʔafɔwaa faala, wogbɔɔɔ wàlá séefɔlɔ, pe wàa ga kɔ́ɔ̀ ŋàʔanaga kéeli naa làa joo n gbàn cɛ́lɛfɔwaa, wàlá kanyaawaa, wàlá Kalide ye wówaa faala ma níì jo li kpéʔele í.

¹¹ Yárigee fànʔafɔw caa lè, ki n gbàn dɛ, syɔɔn faala o beè wee wi a gbǎn gi joo fànʔafɔw ma lè í, kapye kolocɔlɔbèle ban í, poro bele tɛɛkòrogo gi lè ki o nyɛ syɔɔn ye níngi ni í.»

¹² A gee bee gi kaan a fànʔafɔw fúngo tanʔa, a wi fúngi tɔ̀nɔ n yìri gbanʔama, a wi gi joo n gbàn níì jo be Babilɔni sícilibèle myɛ kpóo.

¹³ A kajoo-mí-cerili bee jáari, a gi nyaa sícilibèle n yɛlɛ pe be kpóo, a pe i Danyɛli ní wi pínɛnyɛnbèle caa bi kpóo.

Kolocɔlɔɔ n fànʔafɔw ŋúnɔgɔ tɛ̀ɛn Danyɛli na

¹⁴ Lǎli bee ni a Danyɛli joo ní fànʔafɔw gáridibéle kundigi Ariyɔki ní sícilimɛ, ní yákirii ni, woro wee wi da yiri bi Babilɔni sícilibèle kpóo lè.

¹⁵ Wi n fànʔafɔw sùlasiibéle kafɔlɔ Ariyɔki pye: Nyàʔá na fànʔafɔw wi kajoo-mí-cerili kéele wáriga nya? A Ariyɔki kéeli bee joo n tɛ̀ɛn Danyɛli na.

¹⁶ A Danyɛli kári fànʔafɔw ma n sáà wi nyɛ́ɛri wi làlaa kaan woro ma woro a gi kɔ́rɔw joo wi ma.

¹⁷ Koro kàdoʔo ma a Danyɛli kári wi kpaʔa ma, ní sáà kéeli bee tɛ̀ɛn Hananya, ní Misyayɛli, ní Azariya na be lè wi pínɛnyɛnbèle,

¹⁸ jàngó pe nyɛ̀ʔɛni Kolocɔlɔɔ nyɛ́ɛri gbanʔama wi nyinidaari na, kalarali bee kéele na, koro ga pye woro Danyɛli ní woro pínɛnyɛnbèle a kɔ́ kùu ní Babilɔni sícilizanbèle ní í.

¹⁹ Lǎli bee ni a kalarali tɛ̀ɛn Danyɛli na yanyaʔa ni yébiligi ni. A Danyɛli si nyɛ̀ʔɛgèle Kolocɔlɔɔ kpɔ̀ʔɔrɔ.

²⁰ Danyɛli n syɛ́ɛnri láa n gi joo níì jo: «Kolocɔlɔɔ mɛ́ɛgi n yɛlɛ bàā kpɔ̀ʔɔrɔ́ làla o làla kwɔ́ɔmɔ fun! Níì cán woro má sícilimi ní fǎngi nyɛ.

²¹ Woro wi làrigèle ní kérigèle kàragí. Wi i fànʔafɔbèle cáan, ní wɔ́ɔ i fànʔafɔbèle télegi. Wi i sícilimɛ kaangi sícilibèle ma ní wɔ́ɔ i cánna kaangi kacánbèle ma.

²² Woro wi kérigèle tèé, gele ge cùru, níì làra lè. Woro wee wi yébilimi kèlē cán lè, á gbɛ̀ɛ́nmi pínɛ n tɛ́ɛn ní wi ní.

²³ Mii tóobèle Kolocɔlɔɔ, mɔ má mii bariga kaangi, ní i mɔ sòoló sícilimi, ní fǎngi kéele na mɔ kaan mii ma lè, yárigee wolo nyɛ́ɛri mɔ ma lè, mɔ n gi tɛ̀ɛn mii na, gee gi nyɛ lè fànʔafɔw kéele, mɔ n li tɛ̀ɛn wolo na!»

²⁴ Koro kàdoʔo ma a Danyɛli kári Ariyɔki ma, woro wee má fànʔafɔw da gi joo n gbàn lè níì jo wi Babilɔni sícilibèle kpóo. A wi kári wee bee ma, ní sáà gi joo wi ma kánmi naa na níì jo: «Mɔ a kɔ́ Babilɔni sícilibèle kpóo í. Kári ní mii ní fànʔafɔw yɛ́ʔɛ ma, mii a sa ŋúnɔgi kɔ́rɔ joo fànʔafɔw ma.»

²⁵ A Ariyɔki fala n kári ní Danyɛli ní fànʔafɔw yɛ́ʔɛ ma ní sáà wi pye: «Mii n nànwaa nyaa Zyuda wóbèle ni be cò n pan lè, wee wi a mɔ ŋúnɔgi kɔ́rɔ joo mɔ ma lè.»

Tɔdɔnʔɔnɔ-dàányi ǹdevanʔa

²⁶ A fànʔafɔw gi joo Danyɛli ma, pe wɔ́ɔ̄ yiri lè Bɛlitisyasari, níì wi pye: «A mɔ a gbǎn mii ŋúnɔgi joo lé bi tɛ̀ɛn mii na si gi kɔ́rɔw joo?»

²⁷ A Danyɛli fànʔafɔw yari: «Kalaralee fànʔafɔw caa bi cán lè, sícilibèle, wàlá kanyaabèle, wàlá cɛ́lɛfɔbèle, wàlá wélefɔbèle ban pe a gbǎn li tɛ̀ɛn fànʔafɔw na í.

²⁸ Kàjáa Kolocɔlɔwaa i nyɛ nyɛ̀ʔɛni na, wee wi kalaragèle tèé lè, woro wi canzanyi kèlē tɛ̀ɛn fànʔafɔw Nebukadinezari na. Mɔ ŋúnɔgi gi nyɛ gee naa n fàra yanyaayi na mɔ nyaa lè n mɔ yaʔa mɔ yasinɛgi na.

²⁹ Ee fànʔafɔw, bi mɔ yaʔa mɔ yasinɛgi na, mɔ maa ni sɔ̀ngí gee na ki a kɔ́ ba kpéʔele lè kàdoʔo ma, wee si wi kalaragèle tèé lè, a woro si gi tɛ̀ɛn mɔ na, gee gi maa ba kpéʔele lè.

³⁰ Amɛɛ kalarali bee tɛ̀ɛn mii na lè, gee bee ga jo mii sícilimi bi nɛʔɛ n sɔ̀lɔ niweebèle myɛ wómɔ na í, kàjáa koro n pye jàngó gi kɔ́rɔw í joo fànʔafɔw mɔ ma, mɔ si mɔ fúngi sɔ̀ngumɔ cán.

³¹ Ee fànʔafɔw, mɔ maa ǹdevanʔa nyaa ŋúnɔgi na, ki maa tɔnɔ. Ndevaangi bee maa tɔ̀nɔ n kpɔ́ʔɔ, ní i daragi n baa sɔ̀lɔ. Ki maa pye woyérege ní mɔ yɛ́ʔɛ ma, ki nyaani maa pye fyáakpɔɔrɔ.

³² Ndevaangi bee nyúngo maa pye tɛɛteleo, ki fìcibigi ní gi kɔ́yi maa pye wálifiio, ki fícarigi, ní gi céegèle maa pye kanyɛɛnrɛ,

³³ gi kasanayi maa pye tunmɔrɔ, á ki yedefabiyi pye tunmɔrɔ ní cóoro.

³⁴ Mɔ maa ni wéle, lǎli ni kàdɛnɛgɛ láʔa yaà lè kɔlɔ̀ faala dɛɛmɛnɛ fun n baa ǹdevaangi yédefabiya kpúmɔn n tɔ́nʔɔnɔ, yi pye lè tunmɔrɔ ní cóoro.

³⁵ Lǎli bee ni, a túnmɔri, ní cóori, ní kanyɛɛnri, ní wálifiiw, ní tɛ́ɛw pínɛ n tɔ́nʔɔnɔ n pye àmɛɛ sùweʔe nyɛ lè kàsyɔʔɔ na, káfugo làla ni. A káfalagi di láa ti túlugi ga níì nyaa í. Kàjáa kàdɛnɛgi ki da ǹdevaangi kpúmɔn lè, a koro yìri n kpɔ́ʔɔ n pye nyanbelege, n tári myɛ nyìn.

³⁶ Koro gi pye ŋúnɔgi. Wolo si a gi kɔ́rɔw joo fànʔafɔw ma.

³⁷ Ee fànʔafɔw, mɔ i nyɛ fànʔafɔbèle fànʔafɔlɔ, níì cán nyɛ̀ʔɛgèle Kolocɔlɔɔ n fǎngi fáliga, ní séew, ní fǎngi, ní nìjanri kaan mɔ ma.

³⁸ Tɛʔɛ o tɛʔɛ ni syɔɔn piibèle nyɛ wodɛ́ɛnbéle ní lè, wi n bele bee ní sìnbirigi yaweere, ní féjɛɛnri le mɔ kɔ́yi ni, níì mɔ télege toro myɛ nyúngo na. Mɔ wi nyɛ tɛ́ɛw nyúngo.

³⁹ Fàngaa nikwɔɔ si a ba yìri mɔ kadoʔo ma, gee ki a cɛ́rɛ sɔ̀lɔ mɔ wógi ni lè. Fàndaanri wóʔo si ní ba yìri, gee ki a pye lè kanyɛɛnrɛ, gee ki a tɛ́ɛn lè tári myɛ nyúngo na.

⁴⁰ Fànsicɛrɛ wóʔo si ní ba yìri, gee ki a nìri àmɛɛ tunmɔrɔ nyɛ lè. Amɛɛ túnmɔri yáriri myɛ jee ni di kàragí lè míige, ànbée fǎngi bee a wɔ́ɔ ba ra jaali ní tɔ́nʔɔnɔni kpéʔele àmɛɛ túnmɔri yáriri myɛ jee lè.

⁴¹ Ní àmɛɛ mɔ yédefabiyi, ní tɔ́lɔyi kabɛʔɛlɛ nyaa lè cóoro ní tunmɔrɔ, kánmi bee na fǎngi bee a tíla. Túnmɔri fàngaa si a pye gi ni, níì cán mɔ n gi nyaa a túnmɔri nyáʔami cóori ni.

⁴² Amɛɛ tɔ́lɔyi kabɛʔɛlɛ pye lè tunmɔrɔ ní cóoro, fǎngi bee a pye wonirige, ní wovaʔaga.

⁴³ Amɛɛ mɔ túnmɔri nyaa a di nyáʔami cóori ni lè, ànbée gi nyɛ pe a pínɛ syɔɔn ye joogaanna na ní peyɛɛ ní. Kàjáa pe a pwɔɔ peyɛɛ na í, àmɛɛ gi nyɛ lè túnmɔri a gbǎn pínɛ ní cóori ní í.

⁴⁴ Fànʔafɔbèle bee làla ni, nyɛ̀ʔɛni Kolocɔlɔɔ a fàngaa télege, gee gi lè ki a tée kálagi í, fǎngi bee a tée jée syɛɛnfelegaa fànʔa kɔ́yɔ ni í. Ki a fǎnyi bee myɛ tɔ́nʔɔnɔ bi kwɔ́ɔ, koro tiimaa si kòro beè kwɔ́ɔmɔ fun.

⁴⁵ Fǎngi bee gi nyɛ kàdɛnɛgi, gee gi wàli n láʔa nyanbelegi na lè kɔlɔ̀ dɛ̀ɛmɛnɛ fun ni n baa túnmɔri, ní kanyɛɛnri, ní wálifiiw, ní tɛ́ɛw tɔ́nʔɔnɔ. Kolocɔlɔɔ wogbɔɔw n gi tɛ̀ɛn fànʔafɔw na, gee gi maa ba kpéʔele lè kàdoʔo ma. Ŋúnɔgi i nyɛ kányɛʔɛ, a gi kɔ́rɔw i nyɛ kányɛʔɛ.»

⁴⁶ Lǎli bee ni a fànʔafɔw Nebukadinezari tìgi n too n yɛ́ɛgi cíbele tári na Danyɛli yɛ́ʔɛ ma n wi kpɔ́ʔɔ, níì gi joo n gbàn pe ba dùvɛɛn ní nùndanʔa yáriga wòlo sáriga Danyɛli ma.

⁴⁷ A fànʔafɔw gi joo Danyɛli ma níì wi pye: «Kányɛʔɛ na yele Kolocɔlɔw tɔ̀nɔ́ wi nyɛ kolocɔlɔbèle Kolocɔlɔɔ, ní fànʔafɔbèle Kàfɔlɔ, ní kalaragèle tɛ̀ɛnfɔlɔ. Níì cán mɔ n gbàn n kalarali naa tɛ̀ɛn.»

⁴⁸ A fànʔafɔw fala n Danyɛli lúrugo ǹjoʔo ma gbanʔama, níì lɔrɔ yárira saʔa kaan wi ma, níì wi télege Babilɔni tári myɛ nyúngo na, n wi kpéʔele Babilɔni sícilibèle myɛ kùndigikpɔɔɔ.

⁴⁹ A Danyɛli fànʔafɔw nyɛ́ɛri a wi Syadiraki, ní Mesyaki, ní Abɛdi-Nego télege a be pye Babilɔni tári kacɔɔnribèlē, á Danyɛli si kòro fànʔafɔw kàcoolo ni.