Danyɛli 12 - Cebaara Bible 2010

Wɔʔɔgbɔɔgi làla ní nyán-yirili kéele

¹ «Lǎli bee ni Misyɛli a yìri, wi lè kùndigikpɔɔw bee, woro wee wi yére ni mɔ syɛ́ɛnbèle pìibēle dɛ̀ɛmɛ́ lè. Wɔʔɔgbɔʔɔ lala li a pye, gee gi lè ki felege da kɔ́ɔ̀ pye í nlaa syɛɛnfeleyi nyɛ beè lè fwɔɔ n taa n baa nan lǎli bee na. Lǎli bee ni mɔ syɛ́ɛnbèle bele mɛ́ɛyɛ yi a pye lè wozɛbɛyɛ ní sɛ́bɛw ni, poro a syɔɔ.

² Bele be ŋúnɔ lè támiigi ni, poro pèle saʔa a nyán, pe pèle a nyán sìibangwɔɔw kánma na, pèle si nyán faʔari, ní bàngwɔɔ fɛ̀ɛ́ri kánma na.

³ Bele pe ga pye lè keele cánvɔɔlɔ, poro a ba ra daragi àmɛɛ nyɛ̀ʔɛni nìjanra darigala nyɛ lè, ní bele pe ga syɛɛnnɛʔɛmɛ tama sínni kólogo na lè, poro a pye àmɛɛ ŋɔripiigèle nyɛ lè làla o làla, kwɔ́ɔmɔ fun.

⁴ Mɔ si na Danyɛli, syɛ́ɛnri bee kɔn, mí fɛ̀ɛ taʔa sɛ́bɛw na fwɔɔ bi taa làrigwɔɔli í ba nan. Syɛ̀ɛnnɛ saʔa a ra wi wéle, cánni si kpɔ́ʔɔ.»

Làrizanni kéele n kòro kalarala

⁵ Mii Danyɛli, a mii i wéle, a mii níì nǎnbèle pèle siin nyaa woyérebéle ní, wàa n pye woyéreo ní cábigi jeligɔgee nyɔ́ɔ na, wee si i nyɛ gee nyɔ́ɔ na woyéreo ní.

⁶ A poro wàa gi joo nǎnwee ma wi da lɛn fàniw búrogo le lè ní i nyɛ cábigi lɔ̀ʔɔ ǹjoʔo ni, níì wi pye: «Làlìí ni kakpoloyi bee a ba kwɔ́ɔ?»

⁷ A mii nǎnw joomɔ lóʔo, wee wi da lɛn fàniw búrogo le lè, níì pye cábigi lɔ̀ʔɔ ǹjoʔo ni, wi maa wi kàliige kɔ́gi ní wi kàmɔnɔ kɔ́gi yìrige n wáa nyɛ̀ʔɛgèle ma, níì kàli wee na wi nyɛ lè sìi na làla o làla kwɔ́ɔmɔ fun, níì jo kérigèle bee a pye làlaa, ní làrigèle, ní làlaa tíla ni, ní lǎli ni syɛɛnfelegi wojanga fanʔa ga baa kwɔ́ɔ lè péw, kérigèle bee myɛ a kpéʔele foro.

⁸ Mii n gi lóʔo, kàjáa mii ga gi kɔ́rɔw cán í. A mii jo: «Ni Kàfɔlɔ, nyàʔá ki a ba pye kérigèle bee kwɔ́ɔmɔ?»

⁹ A wi mii yari: «Danyɛli, da syée, níì cán syɛ́ɛnri bee a kòro syɛɛnlarara, fɛ̀ɛ si taʔa di na, bi taa sa nan lǎli kwɔ́ɔmɔ na.

¹⁰ Syɛ̀ɛnnɛ saʔa a jée mùnu bi fílige, bi pye fɔɔnrɔ fun. Syɛɛnpeebèle sáā kapeeyi kpéʔele, syɛɛnpeebèle a tée keele kɔ́rɔ cán í. Kàjáa bele pe a cìlige lè, poro a keele kɔ́rɔ cán.

¹¹ Bi láa lǎlee na canʔa o canʔa sárigaw a ba yaʔa lè, ní lǎli ni kálagifɔw kapeekpɔʔɔ a sámaga yérige lè, cányi nyɔ́ɔ a pye saala kɔrɔni ní togoye sicɛrɛ ní kpɔrigɔ.

¹² Wee wi ga baa sige lè n nan canya saala kɔrɔni ní togoye kɔrɔni ní kpɔrigɔ ní kagunɔ na, wee bee i nyɛ dùba pyà!

¹³ Mɔ si na, da syée fwɔɔ mi sa nan gi kwɔ́ɔmi na. Mɔ a ŋɔ́n daa, si yìri bi yére mɔ kɔ́rigi láala kéele na cányi kwɔ́ɔmɔ na.»