Danyɛli 11 - Cebaara Bible 2010

¹ Mii si na, Dariyusi wi lè Mɛdiw, woro fǎngi yɛɛzelile na, mii maa pye wi taana ni fànʔa nii wi ni, ní i wi dɛ̀ɛmɛ́.

² Tɔ́ɔliw ni, mii a kányɛɛgi joo tɛ̀ɛn mɔ na. «Wéle, fànʔafɔɔlɔ taanri a ní tɛ́ɛn Pɛrisi fǎngi na, sicɛrɛ wów si ba lɔnɛʔɛrɛ kpóʔoro bi sɔ̀lɔ wozanbèle myɛ na. Lǎli ni wi fǎngi ga baa kpɔ́ʔɔ lè wi lɔnɛʔɛri báriga ni, wi a pe myɛ sɔ́ɔn wáa Yavan fǎngi na.

Kapɛɛnni, solomɔkulo, ní wòrogulo fànʔafɔbèle nínge ni

³ Kàjáa fànnɛʔɛgɛ fanʔafɔlɔ a ba yìri, wi a ra wi fǎngi kpéʔele ní séekpɔɔɔ ní, bàā wi nyɛnɛ kérigèle kpéʔele.

⁴ Woro si ga baa yìri lǎlee ni lè, wi fǎngi a ba tɔ́nʔɔnɔ bi tíla nyɛ̀ʔɛni káfalaya sicɛrɛ kabanya myɛ na. Wi yòdaʔayi si a gi taa í, fǎngi bee si a ní pye àmɛɛ ki da séli pye lè í, níì cán ki a cɛnɛ bi tíla tíla pèle nikwɔɔlɔ na, pe lè pe o nyɛ wi wòolo í.

⁵ Wòrogulo kàbangi fànʔafɔlɔ fànʔa a ba kpɔ́ʔɔ. Wi kùndigiwaa fànʔa si a kpɔ́ʔɔ sɔ̀lɔ wi wógi na, wi a pye fǎngi na. Wi fǎngi a tɔ̀nɔ́ pye séekpɔɔɔ fanʔa.

⁶ Yɛ́ɛgèle kèle ga kwɔ́ɔ, pe a pwɔɔ peyɛɛ na, wòrogulo kàbangi fànʔafɔlɔ calipile a kári solomɔkulo kàbangi fànʔafɔlɔ ma, koro ga pye pe sa bɛ̀ɛ nibin na. Kàjáa li kɔ́gi fànʔa a kwɔ́ɔ, woro si a gbǎn sa kòro woyéreo ní í, wi kɔ́gi fànʔa a kwɔ́ɔ. Li a le kɔyɔ ni, ní bele ní be kári ní li ní lè, loro ní li tóow ní n fàra wee wi li dɛ̀ɛmɛ́ lè lǎli bee ni.

⁷ Wàa a yiri li narigi ni bi pye li tóow sìndɛʔɛ ni, wi a pan kapɛɛnkpumɔnbèle ma bi ba jée solomɔkulo kàbangi kèniriye ni, bi fànʔa taa si wi nyɛnɛ kéeli pye yaà.

⁸ Alí be kolocɔlɔbèle, ní be tunmɔgbalari màdebēle, ní be lɔ́ri yárira di lè wálifiiw, ní tɛ́ɛw wóro, wi a toro myɛ koli kári Ezyipiti ma. Koro kàdoʔo ma wi a léeli solomɔkulo kàbangi fànʔafɔlɔ na bi yɛ́ɛgèle kèle kwɔ́ɔ.

⁹ Wee bee a ní pan ba jée wòrogulo kàbangi fànʔafɔlɔ fànʔa ni, si lúru sa jée wi tári ni.

¹⁰ Wi nànbiigèle a kári kapɛɛnni na, ke a kapɛɛnkpumɔn-syɛɛnnɛʔɛmɛ gboogéle saʔa kpóʔoro. Lǎli bee ni pe wàa nibin a kári yɛʔɛ̀ ma bi càmi àmɛɛ lɔ̀ʔɔ kabi n fala lè, bi sɔ̀lɔ bi ní lúru pan. Wi a kapɛɛnni kpúmɔn bi sa nan kènirigi na.

¹¹ Wòrogulo kàbangi fànʔafɔlɔ fúngo a tanʔa gbanʔama, wi a yiri bi too solomɔkulo kàbangi fànʔafɔlɔ na, woro wee wi a syɛɛnnɛʔɛmɛ kpóʔoro lè, kàjáa solomɔkulo kàbangi syɛɛnnɛʔɛmɛ a le wi kɔ́yi ni.

¹² Syɛɛnnɛʔɛmi bee a cò bi kári, kpɔɔmɔ si jée fànʔafɔw fúngo ni. Wi a syɛ̀ɛnnɛ selebingéle saʔa cáan, kàjáa ki a kòro wi wógi na í.

¹³ Níì cán solomɔkulo kàbangi fànʔafɔlɔ a lúru pan si ba syɛɛnnɛʔɛmɛ kpóʔoro, bee pi a nɛʔɛ bi sɔ̀lɔ wozelimi na lè. Làlaa ga kwɔ́ɔ, gee bee n jo yɛ́ɛgèle kèle ga kwɔ́ɔ, wi a pan ní kapɛɛnkpumɔn-nɛʔɛbéle, ní kapɛɛnkpumɔn-yárira saʔa ní.

¹⁴ Lǎli bee ni syɛ̀ɛnnɛ saʔa a yìri wòrogulo kàbangi fànʔafɔlɔ kurugo, bele be nyɛ lè mɔ syɛ́ɛnbèle ni, syɛɛntanʔabèle, poro a yìri koro ga pye bi yanyaagi kéele foro, kàjáa pe a kpírige too.

¹⁵ Solomɔkulo kàbangi fànʔafɔlɔ a pan ba tɛɛlúguyo sámaga bi kènirige syɔɔ taa. Wòrogulo kàbangi fànʔafɔlɔ kapɛɛnkpumɔnbéle, ní wi jàbɔbèle a gbǎn yére wi sige í, pe a fànʔa taa bi yére wi sige í.

¹⁶ Kàjáa wee wi a pan wi kánmi na lè, wi a ba gi kpéʔele gee wi caa lè, syɔɔn faala a gbǎn ba yére wi sige í. Wi a ba yére tácàndeleri ni bi yariga o yariga kálagi mɛnɛ mɛnɛ, gee wi ga fàra n taa lè.

¹⁷ Wi a gi tímana bi pan ní wi fǎngi sée myɛ ní, si ba bɛ̀ɛ ní wi ní. Wi a wi pìíw kaan wi ma wi cɔɔ̀, bi koro pye wi kálagili sábabu, kàjáa gee bee a pye í, koro a nyɔɔ wi na í.

¹⁸ Lǎli bee ni wi a wi yɛ́ɛgi wáa lǒgi nínge tátɛɛgéle ma bi kèle saʔa syɔɔ taa. Kàjáa nɛ̀ɛnyɛnɛgi ki a pye wi ni lè, kùndigiwaa a ba gee bee sàa, si gi sìndɛɛgi yaʔa ki lúru kòro wi na.

¹⁹ Koro kàdoʔo ma wi a náa kolo bi yɛʔɛ wáa wi tári kèniriye ma. Wi si a kpírige bi too, pe a ní wi nyaa í.

²⁰ Wee wi a ba tɛ́ɛn wi sìndɛɛgi ni lè, woro a syɛɛnjanmaɔ télege fǎngi tɛɛcàndelege ni, kàjáa canyaa ga kwɔ́ɔ, wi a tɔ́nʔɔnɔ, ki si a pye fundanʔara, wàlá kapɛɛnnɛ kéele na í.

²¹ Syɔɔnwee wi lè waa o wi córo í woro a ba tɛ́ɛn wi sìndɛɛgi ni, kàjáa pe a fǎngi kpɔ́ʔɔrɔ kaan wi ma í. Wi a pan ŋɔ́ndaali làla ni bi ba fǎngi lɛ́ɛlɛ syɔɔ ní gbánama syɛ́ɛnrɛ ní.

²² Kapɛɛnkpumɔnbèle pe a ba càmi àmɛɛ lɔ̀ʔɔ gáà kabi n fala lè, ànbée pe a ba kabi tìgi wi yɛʔɛ̀ ma, si kálagi ní joogaanni fànʔafɔbile ní.

²³ Syɛ́ɛnbèle taʔagwɔɔlɔ kadoʔo ma wi na, wi a námara kpéʔele. Wi fǎngi si ba kpɔ́ʔɔ ní syɛ̀ɛnnɛ cɛɛri ní.

²⁴ Wi a jée tári tɛɛcàndeleye ni yɛɛ̀nyinge na. Wi a gi kpéʔele, gee gi lè wi tóobèle, ní wi tóolɛɛbèle da gi kpéʔele í. Wi a yakoliri, ní fànʔa-na-yasyɔɔri, ní lɔnɛʔɛri lɛɛ wi taʔafɔbèle na, wi a kèlē caa tímana kèniriyi kánma na, gee bee a pye bi làlaa cɛɛri kwɔ́ɔ.

²⁵ Wi a wi fǎngi kpɔ́ʔɔ, si wɔ́ɔ lòmaana le bi pye sùlasiinɛʔɛbéle nyúngo na bi kári wòrogulo kàbangi fànʔafɔlɔ kurugo. Wòrogulo kàbangi fànʔafɔlɔ si yìri bi kári kapɛɛnni séʔe ma ní sùlasiinɛʔɛbéle ní, bele sée wi kpɔ́ʔɔ lè, bi sa kapɛɛnni kpúmɔn. Kàjáa wi fanʔa a sa taa í, níì cán pe a námara kèlē caa bi tímana wi kánmi na.

²⁶ Bele pe a ra wi lìidaanni líi lè, poro pe a wi kálagi, wi kapɛɛnkpumɔnbèle a cariga àmɛɛ lɔ̀ʔɔ gáà càmi n fala lè, syɛ̀ɛnnɛ saʔa a kpóo cáan.

²⁷ Fànʔafɔbèle siin a ra kapeʔe sɔ̀ngí be fúnyi ni bi kpéʔele, pe a ra jànvaaw nyuu peyɛɛ ma bi be yaʔa tàbali-níjanw na. Kàjáa gee bee a foro í, níì cán làrigwɔɔli a nan í, fwɔɔ bi taa lǎli i ba nan, lee li kɔ̀rirɔ n tɛ́ʔɛ lè.

²⁸ Wi a lúru kári wi tári ma ní lɔnɛʔɛrɛ ní. Wi fúngi a yìri joogaanjǎnni kánma na, wi a kàa pye li na si lúru kári wi tári ma.

²⁹ Lǎli li tɛ́ʔɛ lè, loro ga baa nan, wi a ní yìri bi kári wòrogulo kàbangi kánma na. Kàjáa kátali bee na, kérigèle a ní pye àmɛɛ ke da pye tɔzeligi na lè í.

³⁰ Kitiimi bàtobèle pèle a pan wi kánmi na. Wi bárigaw a kwɔ́ɔ, wi a kolo lúru. Wi fúngi a yìri gbanʔama joogaanjǎnni kurugo, wi ga lúru n pan, bele be joogaanjǎnni yaʔa lè, wi a ba yákirii yaʔa bele bee na.

³¹ Wi a sùlasiibéle kabiya tórigo pe sa tɛɛcàn-nìrigi nɔ́nʔɔ. Pe a canʔa o canʔa sárigaw kéele sàa, si kálagili kapeekpɔʔɔ sámaga yérige.

³² Wi a joogaanni kálagifɔɔlɔ fáana pùuni ní sícilizyɛɛnrɛ ní. Kàjáa syɛ́ɛnbèle bele pe be Kolocɔlɔw cán lè, bele bee a sámaga yére bàā báara.

³³ Bele be keele cán lè syɛ́ɛnbèle ni, poro a syɛɛnnɛʔɛmɛ tama. Pe si a kpírige too bi làlaa kwɔ́ɔ, ŋɔséew, ní naanyǐngi, ní púlori, ní yafuguru-mí-láari báriga ni.

³⁴ Lǎli ni pe ga kpírige n too lè, pe a dɛ̀ɛmɛnɛ cɛɛri taa, syɛ̀ɛnnɛ saʔa a pínɛ be ni ní gbánama ní.

³⁵ Pèle a kpírige too bele ni be keele cán lè, koro ga pye pe sámaga nyɔɔ, pe jée mùnu, be fílige, bi taa ba nan kwɔ́ɔmi làla na, níì cán làrigwɔɔli a nan í fwɔɔ bi taa lǎli í ba nan, lee li kɔ̀rirɔ n tɛ́ʔɛ lè.

³⁶ Fànʔafɔw a ra gi kpéʔele, gee wi caa lè. Wi a ra wiyɛɛ gbɔ́ʔɔgi, sáā wiyɛɛ délegi kolocɔlɔbèle myɛ ǹjoʔo ni, wi a ra bingaari kèlē nyuu kolocɔlɔbèle Kolocɔlɔɔ kánmi na. Wi kérigèle a ra nyɔɔgi fwɔɔ bi taa fundanʔari làrivorolo í ba nan, níì cán gee gi kɔ̀rirɔ n tímana lè, ki a foro.

³⁷ Wi màko a pye wi toolɛɛbèle kolocɔlɔbèlē na í, wàlá cébèle yakpɔʔɔrɔ-nidaanmara na í. Wi màko a pye kolocɔlɔwaa faala na í, níì cán wi a wiyɛɛ gbɔ́ʔɔ bi télege pe myɛ nyúngo na.

³⁸ Wi si a kèniriyi kolocɔlɔɔ kpɔ́ʔɔ wi tɛɛ̀yéregi ni. Kolocɔlɔw bee wi lè wi toolɛɛbèle da wi cán í, wi a wee bee kpɔ́ʔɔ ní tɛ́ɛw, ní wálifiiw, ní lɔgbanri kàdɛɛngèlē ní, n fàra lɔgbanri yáriraa nikwɔɔ na.

³⁹ Kolocɔlɔ-nibɔɔn wi a wi dɛ̀ɛmɛ, wi keele tɛ́ʔɛ tɛɛniriyi na. Syɛ́ɛnbèle bele pe ga wi cán lè, wi a tɔ̀nɔ́ bele bee kpólo, si be télege syɛ̀ɛnnɛ saʔa nyúngo na, wi a tári lɛɛ be na di pye be tɔ̀nɔw.

⁴⁰ Lǎli kwɔ́ɔmɔ na, wòrogulo kàbangi fànʔafɔlɔ a kári sa too wi na. Solomɔkulo kàbangi fànʔafɔlɔ a fùuri sín wi na àmɛɛ káfalakpɔʔɔ nyɛ lè, ní wòtorobéle, ní syɔɔnfànbēle, ní bàtobéle saʔa ní. Wi a jée tátɛɛyaa ni, si kabi fala àmɛɛ lɔ̀ʔɔ gáà nyìn n kabi lè.

⁴¹ Wi a jée tácàndeleri ni. Saʔa si a kpírige too, kàjáa Edɔmi, ní Mowabi, ní Amɔn yòdaʔayi kùndigibéle a yiri wi kɔ́gi ni.

⁴² Wi a wi kɔ́yi sánʔa bi taʔa tátɛɛyaa na, Ezyipiti tári a syɔɔ í.

⁴³ Wi a fànʔa taa tɛ́ɛw ní wálifiiw tɛɛkɔnyɔ na, n fàra Ezyipiti lɔgbanri yárira myɛ na. Libii ye, ní Etyopii ye a taʔa wi na.

⁴⁴ Syɛɛnraa a yìri canʔafolomɔ ní solomɔkulo ma bi ba fyáara cáan wi na. Wi a yiri yaà bi kári ní fundanʔagbɔɔrɔ ní bi sa kálagila kpéʔele, bi syɛ̀ɛnnɛ saʔa kálagi kwɔ́ɔ.

⁴⁵ Wi a wi fànʔafɔ-gbaagi fànikpaaya kóri sólomi lòyo nínge ni, nìjanri nyanbejànga kàbaan na. Koro kàdoʔo ma wi a nan wi kwɔ́ɔmi na, syɔɔn faala a wi dɛ̀ɛmɛ í.