Danyɛli 10 - Cebaara Bible 2010

Yanyaa-taanri wógi: Nǎnwee wi lɛn búrogi le lè

¹ Pɛrisi fànʔafɔw Sirusi fǎngi yɛɛdaanri wólo na, a syɛɛnraa tɛ̀ɛn Danyɛli na, pe wɔ́ɔ̄ yiri lè Bɛlitisyasari. Syɛ́ɛnri bee i nyɛ kányɛʔɛ, ti i kapɛɛnkpɔɔlɔ kéele nyuu. A wi syɛ́ɛnri bee cò, níì yanyaagi kɔ́rɔ cán.

² Cányi bee ni, mii Danyɛli, mii maa pye kùu káyaʔa na cégboʔolo taanri fúngo ni.

³ Mii ga yalii-nidaanmara faala lìi í, kaara, wàlá dùvɛɛn ga jée mii nyɔ́ɔgi ni í, mii ga sìnmɛ faala tíre í, fwɔɔ n taa a cégboogèle taanri baa foro.

⁴ Yɛ́ɛli yézelige canya toko ní sicɛrɛ wógi na, mii maa pye cábikpɔɔgi nyɔ́ɔ na, ki lè Tiigiri.

⁵ A mii nyapiigèle yìrige ni wéle, a mii nànwaa nyaa lɛn búrogo n pye wi na, tɛɛteleo sɛntiiri si i nyɛ wi ma sárigèle ni.

⁶ Wi céri maa pye àmɛɛ lɔgbanra kadɛɛnnɛ nyɛ lè, wi yɛɛcɔɔli si i nyɛ àmɛɛ nyɛ̀ʔɛ-nyɛ́ʔɛnɛnɛ gbɛɛnmɛ nyɛ lè, wi nyapiigèle si i nyɛ àmɛɛ naanyìnye nyɛ lè, wi kɔ́yi ní wi tɔ́lɔyi si i nyɛ àmɛɛ kanyɛɛnrɛ nyɛ, dee be kurugo lè, wi joomi si i nyɛ àmɛɛ syɛɛnnɛʔɛmɛ joomɔ nyɛ lè.

⁷ Mii Danyɛli, mii nibin wi yanyaagi nyaa, nǎnbèle be pye ní mii ní lè, poro da gi nyaa í, kàjáa fyáakpɔɔrɔ maa be cò, a be fàn n sáà làra.

⁸ A mii kòro yaà mii nibin ni yanyaagbɔɔgi bee wéle, a mii bárigaw kwɔ́ɔ, a mii yɛ́ɛgi kúrɔ, fànʔa faala ga níì pye mii ni í.

⁹ A mii wi joomi kàfulogo lóʔo. Lǎli ni mii wi joomi kàfulogo lóʔo lè, a mii pǐli yiri mii ni, a mii too n yɛ́ɛgi cíbele tári na.

¹⁰ Wéle, a kɔlɔ̀ baa tánga mii na n mii kaan a mii i cɛ̀lɛ́ ni forogi mii yégunri, ní mii kadaagèle na.

¹¹ Koro kàdoʔo ma a wi mii pye: «Danyɛli, mɔ wi lè nànnidaanmaw, ki n yɛlɛ mi syɛ́ɛnri kɔ́rɔ cán, dee mii a joo mɔ ma lè, yìri mi yére tɛ́ɛgee ni mɔ nyɛ lè. Níì cán pe n mii tun mɔ ma tɔ́ɔliw ni.» Lǎli ni wi syɛ́ɛnri bee joo mii ma lè, a mii i cɛ̀lɛ́ níì yìri n yére.

¹² A wi mii pye: «Danyɛli, mɔ a kɔ́ ra fɛ̀ɛgí í. Níì cán nlaa cânzeligee na gi jée mɔ fúngi ni lè bi cánna taa, si miyɛɛ jɛ́rɛ mɔ Kolocɔlɔw yɛ́ʔɛ ma lè, mɔ syɛ́ɛnri maa lóʔo, mɔ syɛ́ɛnri kéele si na mii pan.

¹³ Pɛrisi fǎngi kùndigi n mii yérige canya toko ní nibin fúngo ni. Kàjáa Misyɛli wi lè nyɛ̀ʔɛni tundunbéle kundigikpɔɔwaa, woro n pan n baa mii dɛ̀ɛmɛ, á mii kòro yaà Pɛrisi fànʔafɔbèle taana.

¹⁴ A mii pan wii tɔ́ɔliw ni ba gi tɛ̀ɛn mɔ na, gee gi yɛlɛ ba pye mɔ syɛ́ɛnbèle na cányee ni yi maa lè. Níì cán yanyaagaa ní i nyɛ cányi bee kéele na.»

¹⁵ Lǎli ni wi da ni syɛ́ɛnri bee nyuu mii ma lè, mii maa mii yɛ́ɛgi jùngu n le tári ni, níì pyèri tábi.

¹⁶ Wàa wéle wee, wi maa syɔɔn ye wíri, a woro baa tánga mii nyɔɔwari na. A mii nyɔ́ɔgi múgu, a mii i nyuu, a mii gi joo wee má wi da pye woyéreo ní mii yɛ́ʔɛ ma lè, níì wi pye: «Ni kàfɔlɔ, yanyaagi n funjurugogbɔɔrɔ wáa mii na, fànʔa ní o nyɛ mii ni í.

¹⁷ Kanmìí na mii kàfɔw falipyeo a gbǎn joo ní mii kàfɔw ní bi sɛɛ? Tɔ́ɔliw ni fàngáanna ní o nyɛ mii ni í, ŋɔngara ní o nyɛ mii ni í.»

¹⁸ Lǎli bee ni, wee wi syɔɔn wíri lè, a woro níì tánga mii na n fànʔa le mii ni.

¹⁹ Koro kàdoʔo ma a wi mii pye: «Mɔ a kɔ́ fyáa í, mɔ wee wi lè nànnidaanmaɔ, fûnnyingi í pye mɔ ma. Nìrimɛ le! Nìrimɛ le!» Lǎli ni wi da ni nyuu ní mii ní lè, a fànʔa níì jée mii ni, a mii jo: «Ni kàfɔlɔ, ki n yɛlɛ maa nyuu, níì cán mɔ n fànʔa le mii ni.»

²⁰ A wi mii pye: «A mɔ mii panni nyúngo cán lé mɔ ma? Tɔ́ɔliw ni, mii a lúru sa tún ní Pɛrisi kùndigiw ní. Lǎlee si ni mii ga kári lè, Yavan kùndigiw a pan.

²¹ Kàjáa, gee gi sɛ́bɛ kányɛɛgi sɛ́bɛ ni lè, mii i caa bi gi joo tɛ̀ɛn mɔ na. Wàa faala o mii dɛ̀ɛmɛ́ kapɛɛnni kpúmɔnnɔ na ní be ní í, kapye yele kùndigiw Misyɛli ban í.