Córolo 9 - Cebaara Bible 2010

Sɔ̀lɔ-mí-yaʔali séri cângbeʔelege

¹ A Yawe joo ní Mowizi ní Sinayii fìími tára ni, pe yirili kàdoʔo ma Ezyipiti tári ni yɛɛziin wóli yézelige na, wi n jo:

² «Isirayɛli ye n yɛlɛ bàā Sɔ̀lɔ-mí-yaʔali séri kpéʔele làridɛ̀ɛ́nni ni.

³ Yele a ra wi kpéʔele làridɛ̀ɛ́nni ni, yégi naa canya kɛɛ ní sicɛrɛ wóʔo cângwɔʔɔ nyɔ́ɔ na, yele a ra wi kpéʔele làridɛ̀ɛ́nni ni bi yɛlɛ ní wi làlwa kérigèle myɛ, ní wi kajoodɛɛngèle myɛ ní.»

⁴ A Mowizi joo ní Isirayɛli ye ní jàngó paa Sɔ̀lɔ-mí-yaʔali séri kpéʔele.

⁵ A be Sɔ̀lɔ-mí-yaʔali séri kpéʔele yezeligi canya kɛɛ ní sicɛrɛ wóʔo cângwɔʔɔ nyɔ́ɔ na, Sinayii fìími tára ni. Gee myɛ Yawe joo n gbàn Mowizi ma lè, a Isirayɛli ye gi kpéʔele.

⁶ Nǎnbèle pèle si maa pye yaà, bele pe da nɔ́nʔɔ lè nànwaa kúcere na, pe ga pye bi gbǎn kpéʔele Sɔ̀lɔ-mí-yaʔali séri na cángi bee í. A be pan Mowizi ní Aarɔn ma cángi bee wonijanga.

⁷ A nǎnbèle bee baa Mowizi pye: «Wolo n nɔ́nʔɔ nànwaa kúcere kéele na. A gi si yɛlɛ lé wolo lɛɛlɛ í yiri Isirayɛli ye níngi ni yakaangi kéele ni Yawe ma làridɛ̀ɛ́nni ni ?»

⁸ A Mowizi be pye: «Ki n yɛlɛ ye sige bi taa mii í gi lóʔo, gee Yawe a joo gbàn yele kéeli na lè.»

⁹ A Yawe gi joo Mowizi ma níì jo:

¹⁰ «Ki joo Isirayɛli ye ma mí be pye: ‹Yele níngi ni nànwaa wàlá yele yìrigèle wòolo be maa lè poro wàa ga wiyɛɛ nɔ́nʔɔ kpóō kéele na, wàlá wi ga kári kùleelile ni, wi a sèʔé gbǎn Sɔ̀lɔ-mí-yaʔali séri kpéʔele Yawe ma,

¹¹ pe a wi kpéʔele yɛ́ɛli yeziin wóʔo, canya kɛɛ ní sicɛrɛ wóʔo cângwɔʔɔ nyɔ́ɔ na. Pe a sárigaw bàpile pínɛ káa ní levé fun búru, ní nángwɔɔ wazororo ní.

¹² Pe a kɔ́ di tàa yaʔa di syɔ́ɔn í. Pe si a kɔ́ yaweeli kacelegaa faala kabi í. Pe a wi kpéʔele bi yɛlɛ ní gee myɛ ní gi sɛ́bɛ lè Sɔ̀lɔ-mí-yaʔali séri kéele na.

¹³ Syɔ́ɔnwee wi lè wi ga nɔ́nʔɔ í, wi si ga kári kùlo ni í, níì Sɔ̀lɔ-mí-yaʔali séri yaʔa sìngbeʔele ni, wee bee n yɛlɛ bi kwɔ́ɔ yirige wi syɛ́ɛnbèle nínge ni. Níì cán wi ga baa wi yakaangi kaan làridɛ̀ɛ́nni ni í. Wi a wi kapeeli túgoro tugo.

¹⁴ Nibɔnbèle pe baa tɛ́ɛn ní yele ní lè, pe wàa ga ni caa bàā Sɔ̀lɔ-mí-yaʔali séri kpéʔele Yawe ma, wi a ra gi kpéʔele bi yɛlɛ ní gee ní gi sɛ́bɛ ní wɔ́ɔ̀ joo n gbàn Sɔ̀lɔ-mí-yaʔali séri kéele na lè. Làlwanijaɔn wi a pye yele na n nibɔnbèle pínɛ kànanbèle ni.› »

Fàfaangi n níì tìgi n tɛɛkòrojǎngi tɔ́n

¹⁵ Cángee na kpɔ̀ʔɔrɔli fànikpaʔa kóri lè, a fàfaangi fala n baa kpɔ̀ʔɔrɔli fànikpaʔa tɔ́n, ki lè Séeraw Fànikpaʔa. Ki maa ni pingi kpɔ̀ʔɔrɔli fànikpaʔa na bi séli cângwɔɔgi nyɔ́ɔ na bi sa nan nyǐngi nyɔ́ɔ na àmɛɛ naà nyɛ lè.

¹⁶ A gi kòro kánmi bee na làla o làla, a fàfaangi gi tɔ́n, ki ga pye yébiligi ni fàfaangi n pye mɔ a jo naà gii.

¹⁷ Fàfaangi ga yìri fànikpaagi ǹjoʔo ni lǎli ni lè, Isirayɛli ye i gáà yìri ni syée, fàfaangi ga sáà tìgi tɛ́ɛgee ni lè, Isirayɛli ye n tɛ́ɛn nɛɛ bee :

¹⁸ Isirayɛli ye maa ni yìrigí ni syée ni yɛlɛgi ní gee ní Yawe joo n gbàn lè, ní wɔ́ɔ i tɛ̀ɛ́n ni yɛlɛgi ní gee ní Yawe joo n gbàn lè. Bi fàfaangi yaʔa kpɔ̀ʔɔrɔli fànikpaʔa njoʔo ni, Isirayɛli ye n wɔ́ɔ̀ tɛ́ɛn yaà.

¹⁹ Fàfaangi ga kòro kpɔ̀ʔɔrɔli fànikpaʔa njoʔo ni n mɔn, Isirayɛli ye i gáà Yawe tundunri cò, pe a yìrí kári í.

²⁰ Fàfaangi ga canya cɛɛri kwɔ́ɔ kpɔ̀ʔɔrɔli fànikpaʔa njoʔo ni, pe i gáà tɛ́ɛn bi yɛlɛ ní gee ní Yawe joo n gbàn lè, ní wɔ́ɔ i yìrigí ni yɛlɛgi ní gee ní Yawe joo n gbàn lè.

²¹ Fàfaangi si ga pye yaà cângwɔɔgi nyɔ́ɔ na níì yìri nyǐngi nyɔ́ɔ na, pe n wɔ́ɔ̀ yìri nyǐngi nyɔ́ɔ na n kári. Fàfaangi ga kwɔ́ɔ canʔa nibin, ní yébilige nibin, níì yìri, pe n yìri n kári.

²² Fàfaangi ga kòro kpɔ̀ʔɔrɔli fànikpaʔa na canya siin, wàlá yeʔe nibin, wàlá yɛɛlɛ nibin, Isirayɛli ye n tɛ́ɛn n kòro yaà, pe a kári í. Fàfaangi si ga yìri lǎli ni lè, pe n yìri n kári.

²³ Pe maa ni tɛ̀ɛ́n ni yɛlɛgi ní gee ní Yawe joo n gbàn lè, ní wɔ́ɔ i yìrigí ni syée ni yɛlɛgi ní gee ní Yawe joo n gbàn lè. Pe maa Yawe làlwaw kèlē sámaga n cò, n yɛlɛ ní gee ní Yawe joo n gbàn Mowizi ma lè.