Córolo 8 - Cebaara Bible 2010

Fètingèle tɛ́ʔɛganma kéele

¹ A Yawe gi joo Mowizi ma níì jo:

² «Ki joo Aarɔn ma mí wi pye: ‹Lǎli ni mɔ ga fètingèle tɛ́ʔɛ tɛ́ʔɛ lè, fètingèle kɔrɔsiin n yɛlɛ bàā ge gbɛ̀ɛ́nmi yirigi fètindaʔali yɛ́ʔɛ ma.› »

³ A Aarɔn gi kpéʔele kánmi bee na, n fètingèle tɛ́ʔɛ tɛ́ʔɛ fètindaʔali na yɛʔɛ̀ ma n yɛlɛ ní gi ní àmɛɛ Yawe da gi joo n gbàn Mowizi ma lè.

⁴ Wéle, kánmee na fètindaʔali da sámaga lè poro bi nyɛ bee naa: Pe maa li sámaga ní tɛɛ̀ saʔa ní, wee be kpúmɔn lè. Pe maa fètindaʔali sámaga nlaa nɔ́gi na n sáà nan ǹjoʔo ma tiifyɛɛnri niwiriye na, n yɛlɛ ní kánmee ní Yawe da tɛ̀ɛn Mowizi na lè.

Levii ye yaʔali kɔlɔ̀ na Kolocɔlɔɔ ma

⁵ A Yawe gi joo Mowizi ma níì jo:

⁶ «Levii ye cò mi yirige Isirayɛli ye níngi ni, mi be jée mi mùnu.

⁷ Kánmee na mɔ a be jée mùnu lè poro bi nyɛ bee naa: Mɔ a lɔ́ʔɔ nyari nyari be na kapeeli kéele na. Pé nyùngunu-ŋɔ́nɔ tɛ́ʔɛ bi be céri myɛ síire kùnu, si be yaleri jée, si peyɛɛ jée mùnu.

⁸ Koro kàdoʔo ma pe a náapebile cò bi pan, bi fàra li míivɔɔnimi yakanʔa na, bee ni be sìnmɛ nyáʔami lè. Mí ní pan ní náapebilaa ní, loro í pye kapeeli kùsulugo sáriga.

⁹ Mɔ a pan ní Levii ye ní Syɛ́ɛnmi Tɛɛfaraga fànikpaʔa ma, mí wɔ́ɔ Isirayɛli syɛ́ɛnmi myɛ kpóʔoro.

¹⁰ Mɔ a pan ní Levii ye ní Yawe yɛ́ʔɛ ma. Isirayɛli ye si ba be kɔ́yi taʔa Levii ye na.

¹¹ Aarɔn a Levii ye kpéʔele sáriga-fíigeo Yawe yɛ́ʔɛ ma Isirayɛli ye sìndɛɛgi ni, bi be yaʔa kɔlɔ̀ na Yawe fáliw kéele na.

¹² Levii ye a be kɔ́yi taʔa náapegèle nyúnyo na, mɔ si làa wòlo kapeeli kùsulugo sáriga, làa si pye sáriga-sórigoo Yawe ma, bi Levii ye kapeegèle kùsulugo fáli kpéʔele.

¹³ Mɔ a Levii ye yérige Aarɔn ní wi jáabèle yɛ́ʔɛ ma, si be kpéʔele sáriga-fíigeo Yawe ma.

¹⁴ Mɔ a Levii ye wàli bi yirige Isirayɛli ye níngi ni. Levii ye a pye mii wòolo.

¹⁵ Koro kàdoʔo ma Levii ye a jée bàā báara syɛ́ɛnmi tɛɛfaraga fànikpaʔa ni. Kánmi bee na mɔ a be jée mùnu si be kpéʔele sáriga-fíigeo.

¹⁶ Níì cán pe n yaʔa mii ma kɔlɔ̀ na wobobéle ní Isirayɛli ye níngi ni. Mii n be láa be pye mii wòolo nànbiiseligèle sìndɛʔɛ ni, Isirayɛli nànbiilɛɛgèle myɛ sìndɛʔɛ ni Isirayɛli ye níngi ni.

¹⁷ Níì cán Isirayɛli nànbiiseligèle myɛ i nyɛ mii wòʔolo, n syɛ́ɛnbèle wòʔolo pínɛ yaweeri wòʔolo ni. Cángee na mii Ezyipiti tári nànbiiseligéle kpúmɔn n kpóo lè, mii maa Isirayɛli wógèle yaʔa niyɛɛ ma kɔlɔ̀ na.

¹⁸ Mii si n Levii ye láa Isirayɛli ye nànbiiseligèle myɛ sìndɛʔɛ ni.

¹⁹ Mii n Levii ye kaan Aarɔn ní wi jáabèle ma Isirayɛli ye níngi ni paa báara Isirayɛli ye ma Syɛ́ɛnmi Tɛɛfaraga fànikpaʔa ni, jàngó paa Isirayɛli ye kapeegèle kùsulugo fáli kpéʔele, kánmi bee na káfalagi yáamaa faala a nan Isirayɛli ye na í, àmɛɛ gi nyɛ lè Isirayɛli ye a nùuni tɛɛcǎngi na í.»

²⁰ A Mowizi, ní Aarɔn, ní Isirayɛli syɛ́ɛnmi myɛ gi kpéʔele Levii ye na n yɛlɛ ní gee myɛ ní Yawe da joo n gbàn Mowizi ma be kéeli na lè.

²¹ A Levii ye peyɛɛ jée n mùnu níì be yaleri jée. A Aarɔn be kpéʔele sáriga-fíigeo Yawe yɛ́ʔɛ ma. Aarɔn n be kapeegèle kùsulugo fáli kpéʔele, jàngó bi be jée mùnu.

²² Koro kàdoʔo ma a Levii ye jée ni be fáliw kpéʔele syɛ́ɛnmi tɛɛfaraga fànikpaʔa ni, Aarɔn ní wi jáabèle si i be kɔ̀rɔsíi, n yɛlɛ ní gi ní àmɛɛ Yawe da gi joo n gbàn Mowizi ma lè Levii ye kéeli na.

²³ A Yawe gi joo Mowizi ma níì jo:

²⁴ «Gee naa ki a pye Levii ye kéeli na : Bi séli yɛ̀ʔɛlɛ toko ní kagunɔ wóbèle na bàā syée poro yɛ́ʔɛ ma wóbèle kurugo, poro myɛ a jée fáliw ni, bàā báara Syɛ́ɛnmi Tɛɛfaraga fànikpaʔa ni.

²⁵ Wee wi ga yɛ̀ʔɛlɛ togoye siin ní kpɔrigɔ taa lè, wi a láʔa wi fáliw na, wi a ní da báara í.

²⁶ Wi a ra wi senyɛnbèle dɛ̀ɛmɛ́ Syɛ́ɛnmi Tɛɛfaraga fànikpaʔa ni, bàā yáriri kɔ̀rɔsíi dee di kàlifáa be ma paa di kɔ̀rɔsíi lè, kàjáa wi a ní da faliwaa kpéʔele í. Kánmi bee na mɔ a ra Levii ye fáliw pyeganma kéele cɔɔnri yáriri kéele na di kàlifáa be ma lè.»