Córolo 6 - Cebaara Bible 2010

Lalwaw wi nyɛ lè Naziirio nyɔɔfaliga kéele na

¹ A Yawe gi joo Mowizi ma níì jo:

² «Ki joo Isirayɛli ye ma mí be pye: ‹ Lǎli ni nànwaa, wàlá cewaa ga wiyɛɛ wàli n láʔa wozanbèle na lè ní naziiri nyɔɔfaliga ní, n wiyɛɛ yaʔa kɔlɔ̀ na Yawe ma,

³ wi a láʔa dùvɛɛnw, ní sinmɛ o sinmɛ na, wi a kɔ́ dùvɛɛn vinɛgiri gbaa í, wàlá vinɛgiriwaa, wee be sámaga ní sinmaa ní lè í. Wi a kɔ́ ɛrɛzɛn lɔ́ʔɔ faala gbaa í. Wi a kɔ́ ɛrɛzɛnpírio wàlá ɛrɛzɛnwaaɔ faala lìi í.

⁴ Wi naziirimi làla myɛ fúngo ni, wi a kɔ́ ɛrɛzɛn tírige yárigaa faala lìi í, bi séli gi cèéli na bi ba nan gi koriri na.

⁵ Wi naziiri nyɔɔfaligi làla myɛ ni, nyùngunu-ŋɔ́nɔ ga yɛlɛ bi jée wi nyúngi ni í, bi taa cányi í ba foro, yee ni wi wiyɛɛ yaʔa kɔlɔ̀ na Yawe ma lè, wi a kòro wojaɔn ní, wi a wi ǹjoori yaʔa di tɔnɔ.

⁶ Lǎli myɛ ni wi wiyɛɛ yaʔa kɔlɔ̀ na Yawe ma lè, wi a kɔ́ nùuni kpóō na í.

⁷ Wi a kɔ́ wiyɛɛ nɔ́nʔɔ wi toò, wàlá wi nɔɔ̀, wàlá wi senyɛnnàɔn, wàlá wi senyɛnjaà kútɔɔ na í. Níì cán wi Kolocɔlɔw kàlifaala túgoro i nyɛ wi nyúngi ni.

⁸ Wi i nyɛ wojaɔn ní Yawe ma wi naziirimi làla myɛ ni.

⁹ Wàa ga pàla n kùu wi taana n wi naziirimi nyúngo nɔ́nʔɔ, wi a wi nyúngi kùnu wi jéemununi canʔa na. Wi a gi kùnu canya kɔrɔsiin wógi na.

¹⁰ Canya kɔrɔtaanri wógi na wi a pan ní kàtogèlē siin, wàlá lòbwɔɔpiigéle siin ní sáriga-wòlow ma Syɛ́ɛnmi Tɛɛfaraga fànikpaʔa kpaaweele ma.

¹¹ Sáriga-wòlow a làa nibin wòlo sáriga kapeeli kéele na si làa wòlo sáriga-sórigoo bi wi kapeeli kùsulugo fáli kpéʔele kúw kéele na. Naziiriw a wi nyúngi sámaga yaʔa kɔlɔ̀ na cángi bee na.

¹² Wi a ní wi naziirimi làla yaʔa kɔlɔ̀ na Yawe ma, si yɛɛlɛ nibin bàpɔbile wòlo sáriga kolomi kéele na. Canzɔ̀lɔgwɔɔyi a córo í. Níì cán wi naziirimi n nɔ́nʔɔ.

¹³ Làlwaw wi nyɛ wee naa naziiriw kéele na cángee na wi ga wi naziirimi làla foro lè: Pe a pan ní wi ní Syɛ́ɛnmi Tɛɛfaraga fànikpaʔa kpaaweele ma.

¹⁴ Wi a ba wi yakaangi kaan Yawe ma, ki a pye yɛɛlɛ nibin tɛɛlɛ fun bàpɔbile, loro í pye sáriga-sórigoo, ní yɛɛlɛ nibin tɛɛlɛ fun bàcaa, woro í pye kapeegèle kùsulugo sáriga, ní tɛɛlɛ fun bàpɔlɔ, woro í pye pínɛnyɛnnɛgɛ sáriga,

¹⁵ ní levé fun búru sɛ̀ʔɛlɛ nibin, ní míivɔɔnimɔ kagbalaya be kála ní sìnmɛ ní lè, bi fàra levé fun ŋɔ̀mipiigéle na, gele na pe a sìnmɛ wo wo lè, ní wi yakaangi n fàra wi sáriga-yólogow na.

¹⁶ Sáriga-wòlow a pan ní yakaanri bee ní Yawe yɛ́ʔɛ ma, si ba kapeeli kùsulugo sáriga yaweele ní sáriga-sórigow yaweele wòlo sáriga.

¹⁷ Wi a pínɛnyɛnnɛgi bàpɔlɔ wòlo sáriga Yawe ma, bi fàra levé fun búruw sɛ̀ʔɛnyɛnɛ na. Sáriga-wòlow a pan ní míimi yakanʔa, ní sáriga-yólogow ní.

¹⁸ Naziiriw a wi nyúngi kùnu Syɛ́ɛnmi Tɛɛfaraga fànikpaʔa kpaaweele na, si wiyɛɛ yaʔali nyúngo njooro láa bi le pínɛnyɛnnɛgi sáriga láara ni, náagi na.

¹⁹ Sáriga-wòlow a bàpɔw fókaan-pegwɔʔɔ láa, si levé fun búrupilaa nibin wòlo sɛ̀ʔɛli ni, ní levé fun ŋɔ̀migaa nibin, bi dee bee le naziiriw kɔ́yɔ ni, wi nyúngi kùnunɔ kàdoʔo ma, gee wi da yaʔa kɔlɔ̀ na Kolocɔlɔɔ ma lè.

²⁰ Sáriga-wòlow a dee bee fíige fíige Yawe yɛ́ʔɛ ma sáriga-fíigeo. Yacanga gii, gee ki a pye lè sáriga-wòlow wóʔo, bi fàra fìcibigi na be fíige lè, ní céeli be yirige lè. Koro kàdoʔo ma naziiriw a naa gbǎn dùvɛɛn gbaa.

²¹ Gee bee gi nyɛ làlwaw naziirio nyɔɔfaliga kpéʔelele kéele na Yawe ma, wi naziirimi yakanʔa làlwa wii. Gee sée ga níì taa wi na lè, wi koro fàra dee na. Gee gi joo n gbàn nyɔɔfaligi kéele na wi kpéʔele lè, wi a gi foro bi yɛlɛ ní naziirimi làlwa ní.› »

Dùbaw kpéʔelele syɛ́ɛnrɛ

²² A Yawe gi joo Mowizi ma níì jo:

²³ «Ki joo Aarɔn ní wi jáabèle ma mí be pye: ‹Kánmi naa na yele a ra dùbaw kpéʔele Isirayɛli ye ma si jo:

²⁴ Ki n yɛlɛ Yawe í dùbaw taʔa mɔ na, sáā mɔ kpáaw wéle.

²⁵ Ki n yɛlɛ Yawe í wi yɛ́ɛgi gbɛ̀ɛnmɛ yirige mɔ ma, si nyɔɔ mɔ na.

²⁶ Ki n yɛlɛ Yawe í wi yɛ́ɛgi yìrige bi mɔ wéle, si yɛɛ̀nyinge kaan mɔ ma.›

²⁷ Kánmi bee na pe a mii mɛ́ɛgi taʔa Isirayɛli ye na, mii si dùbaw taʔa be na.»