Córolo 4 - Cebaara Bible 2010

LEVII TULUGI WOOLO FALI a) Kehati yòdaʔayi

¹ A Yawe gi joo Mowizi ní Aarɔn ma níì jo:

² «Ye Kehati yòdaʔayi wòolo córo Levii yòdaʔayi wòolo ni, bi yɛlɛ ní be túluyi, ní be narigbaayi ní,

³ bi séli yɛ̀ʔɛlɛ toko ní kpɔrigɔ wóbèle na bàā syée poro yɛ́ʔɛ ma wóbèle kurugo bi sa nan yɛ̀ʔɛlɛ togoye siin ní kpɔrigɔ wóbèle na, bele myɛ be nan bi gbǎn ra faliwaa kpéʔele lè Syɛ́ɛnmi Tɛɛfaraga fànikpaʔa ni.

⁴ Kehati yòdaʔayi wòolo fáli wi nyɛ wee naa Syɛ́ɛnmi Tɛɛfaraga fànikpaʔa ni, yacandeleri fáli wi a pye.

⁵ Lǎli ga nan pe yìri tɛɛ̀tɛ́nɛgi ni bàā syée, Aarɔn ní wi jáabèle a jée bi fànipariw tìrige bi tɔ́n séeraw kásu na.

⁶ Pe a dofɛn sáliga taʔa wi na, si fàniga tɛ́ʔɛ bi wi tɔ́n, ki myɛ í pye kɔ́luruna cére na, si wi láali tíingéle le wi na.

⁷ Búruw wi kaan Kolocɔlɔɔ ma lè, pe a kɔ́luruna cére fàni tɔ́n woro tàbaliw na, si tásaayi, ní yagbaagèle, ní yalegèle taʔa wi na n fàra pɛ́ɛgèle na sáriga-yólogow kéele na. Búruw wi kaangi lè làla o làla, woro sáā kòró wi na.

⁸ Pe a fàninyɛɛn-tèleo taʔa yáriri bee na, si di tɔ́n ní dofɛn sáliga ní, si tàbaliw láala tíingéle le wi na.

⁹ Pe a kɔ́luruna cére fàni tɛ́ʔɛ bi gbɛ̀ɛ́nmi yirigele fetindaʔala, ní li fètingèle, ní li lele yáriri, ní li cɔɔnkoli-yáriri, ní li sǐnmi yalegéle myɛ tɔ́n. Toro di nyɛ li falipye-yáriri.

¹⁰ Pe a li ní li yayigeleri myɛ le dofɛn sáliga ni bi taʔa li yalaagi na.

¹¹ Pe a kɔ́luruna cére fàni tɔ́n tɛ́ɛw sáriga-wòlo-yafanʔa na, si gi mígi ní dofɛn sáliga ní, si gi láali tíingéle le gi na.

¹² Yayigeleri ní pe báara tɛɛcǎngi ni lè pe a ti myɛ láa bi mígi kɔ́luruna cére fàni ní, si dofɛn sáliga tɛ́ʔɛ bi di tɔ́n, si di taʔa yalaagi na.

¹³ Pe a cɔ́ɔngi myɛ wòlo sáriga-wòlo-yafaangi ni si fàninyɛɛɔn tɔ́n gi na.

¹⁴ Pe a gi fáliw yayigelere myɛ taʔa gi na ti lè naàniganw yaleye, ní gǎngèle singànaya, ní cɔ́ɔngi yakoliyo, ní nyari-nyarili pɛ́ɛgéle, gee bee n jo sáriga-wòlo-yafaangi yayigelere myɛw, si dofɛn sáliga tɔ́n gi na, si gi láali tíingéle le gi na.

¹⁵ Lǎli ni Aarɔn ní wi jáabèle ga yacanri ní tɛɛcǎngi yayigelere myɛ tɔ́n n kwɔ́ɔ lè, Kehati yòdaʔayi wòolo a pan tɛɛkòrogi làriyìrile ni bi ba di láa, kàjáa pe a kɔ́ tánga yacanri na í, pe ga koro pye pe a kùu. Toro di nyɛ Kehati yòdaʔayi wòolo túgoro Syɛ́ɛnmi Tɛɛfaraga fànikpaʔa ni.

¹⁶ Eleyazari wi lè sáriga-wòlow Aarɔn jáaw, woro wi a pye fètinni sìnmɛ, ní nùndaanni yáriga, ní canʔa o canʔa míimi yakanʔa, ní kàlifaali sìnmɛ kɔ̀rɔsiile fáli na. Wi a wɔ́ɔ pye kpɔ̀ʔɔrɔli fànikpaʔa, ní gi fúngi yárira myɛ kɔ̀rɔsiile nyúngo na, gee bee n jo tɛɛcǎngi ní gi yayigeleri.»

¹⁷ A Yawe gi joo Mowizi ní Aarɔn ma níì jo:

¹⁸ «Yele a kɔ́ Kehati syɛɛnfelegi túlugo woolo kaan be kwɔ́ɔ bi yiri Levii ye níngi ni í.

¹⁹ Ki n yɛlɛ ye gee naa kpéʔele be ma koro ga pye be kòro sìi na lǎli ni pe ga nùuni tɛɛcàndelegi na lè, pe a kɔ́ kùu í. Koro gi nyɛ, Aarɔn ní wi jáabèle a pan ba jée bi be myɛ nibin nibin fáli ní be túgori tɛ̀ɛn tɛ̀ɛn be na.

²⁰ Pe a kɔ́ jée bi yacanri nyaa páā di míri í, níì cán gee bee a be kpóo.»

b) Gerisyɔn yòdaʔayi

²¹ A Yawe gi joo Mowizi ma níì jo:

²² «Ki n yɛlɛ mi wɔ́ɔ mi Gerisyɔn yòdaʔayi wòolo sɛ́bɛ bi yɛlɛ ní be túluyi, ní be narigbaayi ní,

²³ bi séli yɛ̀ʔɛlɛ toko ní kpɔrigɔ wóbèle na bàā syée poro yɛ́ʔɛ ma wóbèle kurugo bi sa nan yɛ̀ʔɛlɛ togoye siin ní kpɔrigɔ wóbèle na, bele myɛ be nan bi gbǎn ra faliwaa kpéʔele lè Syɛ́ɛnmi Tɛɛfaraga fànikpaʔa ni.

²⁴ Gerisyɔn ye túlugi wòolo fáli wi nyɛ wee naa, gee bee n jo be fáliw ní be túgori.

²⁵ Pe a ra kpɔ̀ʔɔrɔli fànikpaʔa ní Syɛ́ɛnmi Tɛɛfaraga fànikpaʔa faniya tugu, ní gi yatɔngi, n fàra dofɛn sáligi na be taari gi na lè, n fàra syɛ́ɛnmi tɛɛfaraga fànikpaʔa kpaaweetɔn-fàni na,

²⁶ ní kàcooli sùlulo fànibēle, ní kàcooli kpaaweetɔn-fàni lee be sùlu lè n kpɔ̀ʔɔrɔli fànikpaʔa, ní sáriga-wòlo-yafaangi màʔa lè, ní be mɛ́ɛngèle, ní yayigeleri myɛ di yaà lè. Pe a ra be fáliw kpéʔele.

²⁷ Fáliw myɛ Gerisyɔn yòdaʔayi wòolo a ra kpéʔele lè Aarɔn ní wi jáabèle pe a ra wi tèé be na, wi lè be túgori myɛ láala, ní be falisanw myɛ. Yáriri myɛ pe a ra tugu lè, yele a di kàlifáa be ma.

²⁸ Wee bee wi nyɛ Gerisyɔn yòdaʔayi túlugo woolo fáli, Syɛ́ɛnmi Tɛɛfaraga fànikpaʔa ni. Aarɔn wi lè sáriga-wòlow, woro jáaw Itamari wi a ra be kàragí fáliw bee ni.

c) Merarii yòdaʔayi

²⁹ «Mɔ a Merarii yòdaʔayi wòolo córo bi yɛlɛ ní be túluyi, ní be narigbaayi ní.

³⁰ Mɔ a be córo, bi séli yɛ̀ʔɛlɛ toko ní kpɔrigɔ wóbèle na, bàā syée poro yɛ́ʔɛ ma wóbèle kurugo bi sa nan togoye siin ní kpɔrigɔ wóbèle na, gee bee n jo bele myɛ be nan bi gbǎn jée Syɛ́ɛnmi Tɛɛfaraga fànikpaʔa fáli ni lè.

³¹ Gee ki a pye be kɔlɔ̀ na jàngó paa kɔ̀rɔsíi gi na lè Syɛ́ɛnmi Tɛɛfaraga fànikpaʔa fáli myɛ kéele na lè koro gi nyɛ gee naa: Kpɔ̀ʔɔrɔli fànikpaʔa tiikpakpaaya, ní gi tiingèle, ní gi gàángèle, ní ge yataʔayi,

³² ní kàcooli sùlulo gàángéle, ní ge yataʔayi, ní cèferigèle, ní mɛ́ɛngèle, ní yayigeleri, ní yáriree myɛ di nyɛ be fáliw mɛ́ʔɛ na lè, yáriri myɛ ti a pye be kɔlɔ̀ na lè paa kɔ̀rɔsíi di na, ye di córo pe mɛ́ɛyi na, yé di kàlifáa be ma mɛ́ɛyɛ na.

³³ Merarii yòdaʔayi túlugo woolo fáli wi nyɛ wee bee, Syɛ́ɛnmi Tɛɛfaraga fànikpaʔa ni. Aarɔn wi lè sáriga-wòlow, woro jáaw Itamari wi a ra be kàragí.»

Levii ye córomi nyɔ́ɔ

³⁴ A Mowizi, ní Aarɔn, ní syɛ́ɛnmi kùndigibéle Kehati yòdaʔayi wòolo nanbéle córo n yɛlɛ ní be túluyi, ní be narigbaayi ní,

³⁵ n séli yɛ̀ʔɛlɛ toko ní kpɔrigɔ wóbèle na, n sáà nan yɛ̀ʔɛlɛ togoye siin ní kpɔrigɔ wóbèle na, bele myɛ be pye bi gbǎn jée Syɛ́ɛnmi Tɛɛfaraga fànikpaʔa fáli ni lè.

³⁶ Bele be córo be ni lè n yɛlɛ ní be túluyi ní, pe maa pye nànbēle selebinnɛ ní saala taanri ní togoye kɔrɔsiin ní kpɔrigɔ.

³⁷ Poro be nyɛ Kehati túlugi wòolo, bele be córo lè. Pe myɛ maa ni báara Syɛ́ɛnmi Tɛɛfaraga fànikpaʔa ni. Mowizi ní Aarɔn maa be córo n yɛlɛ ní syɛ́ɛnri ní Yawe da joo n gbàn Mowizi ma a wi joo lè.

³⁸ Gerisyɔn yòdaʔayi wòolo be córo lè n yɛlɛ ní be túluyi, ní be narigbaayi ní,

³⁹ n séli yɛ̀ʔɛlɛ toko ní kpɔrigɔ wóbèle na ni syée poro yɛ́ʔɛ ma wóbèle kurugo n sáà nan yɛ̀ʔɛlɛ togoye siin ní kpɔrigɔ wóbèle na, bele myɛ be pye bi gbǎn jée syɛ́ɛnmi tɛɛfaraga fànikpaʔa fáli ni lè,

⁴⁰ bele be córo lè n yɛlɛ ní be túluyi, ní be narigbaayi ní, pe n pye selebinnɛ ní saala taanri ní toko ní kpɔrigɔ.

⁴¹ Poro be pye Gerisyɔn yòdaʔayi túlugo woolo, bele be córo lè, poro bele pe da ni báara Syɛ́ɛnmi Tɛɛfaraga fànikpaʔa ni lè. Mowizi ní Aarɔn maa be córo n yɛlɛ ní Yawe syɛ́ɛnri ní.

⁴² Merarii yòdaʔayi túluyo woolo be córo lè n yɛlɛ ní be túluyi, ní be narigbaayi ní,

⁴³ n séli yɛ̀ʔɛlɛ toko ní kpɔrigɔ wóbèle na ni syée poro yɛ́ʔɛ ma wóbèle kurugo n sáà nan yɛ̀ʔɛlɛ togoye siin ní kpɔrigɔ wóbèle na, poro bele myɛ pe da pye bi gbǎn jée Syɛ́ɛnmi Tɛɛfaraga fànikpaʔa ni lè,

⁴⁴ poro bele be córo lè n yɛlɛ ní be túluyi wòolo ní, pe n pye selebinnɛ ní saala kɔrɔni.

⁴⁵ Poro be pye Merarii yòdaʔayi túlugo woolo bele be córo lè. Mowizi ní Aarɔn maa be córo n yɛlɛ ní syɛ́ɛnri ní Yawe da joo n gbàn Mowizi ma a wi joo lè.

⁴⁶ Levii wóbèle myɛ Mowizi, ní Aarɔn, ní Isirayɛli syɛ́ɛnmi kùndigibéle córo lè, n yɛlɛ ní be túluyi, ní be narigbaayi ní,

⁴⁷ n séli yɛ̀ʔɛlɛ toko ní kpɔrigɔ wóbèle na ni syée poro yɛ́ʔɛ ma wóbèle kurugo n sáà nan yɛ̀ʔɛlɛ togoye siin ní kpɔrigɔ wóbèle na, bele myɛ pe da pye bi gbǎn jée syɛ́ɛnmi tɛɛfaraga fànikpaʔa fáli ni bàā báara sáā túgori tugu lè,

⁴⁸ wojorobèle myɛ nyɔ́ɔ n pye selebingéle sicɛrɛ ní saala siin ní togoye kpanjɛrɛ.

⁴⁹ Pe maa be córo n yɛlɛ ní syɛ́ɛnri ní Yawe da joo n gbàn Mowizi ma a wi joo lè, a be be myɛ nibin nibin fáli, ní be túgori tɛ̀ɛn be na. Pe maa be córo n yɛlɛ ní gi ní àmɛɛ Yawe da gi joo n gbàn Mowizi ma lè.