Córolo 36 - Cebaara Bible 2010

Calipiigèle ge yɛlɛ bi kɔrigɔ lìi lè ke cèpɔrigi kéele

¹ Galaadi túlugi wòolo narigbaaya kundigibéle be lè Makiiri jáabèle, Makiiri wi lè Manase jáaw, be pye lè Zyozɛfu túlugi wòolo yodaʔayaa, a poro pan Mowizi, ní Isirayɛli narigbaayi kùndigibéle ma.

² Pe n baa gi joo níì jo: «Yawe n gi joo n gbàn mɔ ma mii kàfɔw, níì jo mɔ í tári lɛɛ Isirayɛli ye na ní gǒnwáara ní di pye be kɔrigɔ. A Yawe wɔ́ɔ̀ gi joo n gbàn mɔ ma mii kàfɔw níì jo mɔ í Selofihadi kɔ́rigi kaan wi pìíbèle ma, pe lè càbala.

³ Pe ga pɔri Isirayɛli ye yòdaʔayi syɛɛnfelege nanbèle bele ma lè, pe kɔ́rigi a ceri yiri wolo tóobèle kɔ́rigɔ ni bi fàra syɛɛnfelegee wòolo wóʔo na, bele má be pɔri lè, kánmi bee na kàa a ra yirigi wolo kɔ́rigi ni wo taa lè gǒnwáari na.

⁴ Zyubiilew yɛ́ɛlɛ ga nan Isirayɛli ye ma lǎlee ni lè, syɛɛnfelegee ni pe jée lè, pe kɔ́rigi a fàra syɛɛnfelegi bee wóʔo na. Kánmi bee na pe kɔ́rigi a yiri wolo tóolɛɛyi syɛɛnfelege wóʔo ni.»

⁵ A Mowizi Yawe tundunri joo n gbàn Isirayɛli ye ma, níì jo: «Zyozɛfu yòdaʔayi wòolo syɛɛnfelege tánʔa gii.

⁶ Gee Yawe joo n gbàn Selofihadi pìíbèle kéele na lè koro gi nyɛ gee naa, wi n jo: Pe a gbǎn cèpɔrigɔ kpéʔele ní nǎnbèle pèle ní, àmɛɛ ki be dɛ́nɛ lè, ki tɛ́nɛ pye pe gi kpéʔele ní be tofɔlɛɛyi túlugo syɛɛnfelege nanbèle pèle ní.

⁷ Kánmi bee na Isirayɛli ye kɔ́rigaa faala a yiri syɛɛnfelegaa wóʔo ni bi jée kàa wóʔo ni í. Kàjáa Isirayɛli ye myɛ nibin nibin a kòro be tofɔlɛɛyi syɛɛnfeleye kɔ́riyɔ na.

⁸ Kɔrigɔ ga pye calipilee faala ma lè Isirayɛli syɛɛnfeleyi ni, ki n yɛlɛ li pɔri li tofɔlɛɛyi túlugo syɛɛnfelege nanwaa ma. Koro ga pye Isirayɛli ye myɛ nibin nibin í kòro be tofɔlɛɛyi túluyo kɔ́riyɔ na.

⁹ Kɔrigaa faala a yiri syɛɛnfelegaa wóʔo ni bi jée kàa wóʔo ni í, kàjáa Isirayɛli ye syɛɛnfeleyi myɛ nibin nibin a kòro yi kɔ́riyɔ na.»

¹⁰ A Selofihadi calipiigèle gi kpéʔele n yɛlɛ ní syɛ́ɛnri ní Yawe da joo n gbàn Mowizi ma lè.

¹¹ Mala, ní Tiirisa, ní Hogila, ní Milika, ní Nowa, pe lè Selofihadi pìíbèle, a be pɔri pe tóow senyɛnnànbēle jaala ma.

¹² Pe n pɔri Zyozɛfu jáaw Manase túlugi wòolo yodaʔaya narigbaaya ni. A be kɔ́rigi kòro be tofɔlɛɛyi syɛɛnfelege túlugo ni.

¹³ Tundunri, ní làlwaw kajoogéle Yawe kaan Isirayɛli ye ma lè Mowizi nyɔ́ɔgi ni, Mowabi tɛɛfiiyi na, Zyuridɛnw nyɔ́ɔ na, Zyeriko zǐnmi na lè, toro dii.