Córolo 35 - Cebaara Bible 2010

Levii ye kěyi

¹ A Yawe joo ní Mowizi ní n wi yaʔa Mowabi tɛɛfiiyi na Zyuridɛnw taana, Zyeriko zǐnmi na.

² Wi n jo: «Ki joo mi gbàn Isirayɛli ye ma mí be pye kɔ́rigi pe a taa lè, pe kèyaa wòlo gi ni be kaan Levii ye ma beè pe a gbǎn tɛ́ɛn lè. Pé wɔ́ɔ tári kaan Levii ye ma, dee di kěyi bee màʔa lè.

³ Kěyi bee a pye be ma be tɛɛ̀tɛ́nɛyi, tári di yi màʔa lè, toro si pye be yaweekpologèle, ní be yaweeyiligèle, ní be kɔlɔ̀ yáriri, ní be yaweesanri myɛ kéele na.

⁴ Kěyi taana tára yele a kaan Levii ye ma lè, ti a séli gúnyi nyɔ́ɔ na bi sa nan mɛ́tiribéle saala siin ní dabata-da na bi yi màʔa.

⁵ Yele a mɛ́tiribéle saala kagunɔ kagunɔbèlē tímana kěyi kàdoʔo ma, pèle saala kagunɔ í pye canʔafolomɔ ma, pèle saala kagunɔ í pye wòrogulo ma, pèle saala kagunɔ í pye canʔajeemɛ ma, pèle saala kagunɔ í wɔ́ɔ pye solomɔkulo ma, kěgi si kòro níngi ni. Toro ti a pye pe yaweegboo-tɛ́ɛyi bi kěyi màʔa.

⁶ Kěyee yele a kaan Levii ye ma lè, yele a yi yàa kɔrɔni pye kàsuro-jée-kèye. Koro ga pye wàa ga syɔɔn kpóo, wi gbǎn fàn kári yaà beè. Si wɔ́ɔ kèyaa togoye siin ní siin kaan be ma bi fàra yee bee na.

⁷ Kěyee yele a kaan Levii ye ma lè, yi myɛ bìnɛw a pye kèye togoye siin ní kɔrɔtaanri n fàra yi taana tári na.

⁸ Kěyee yele a wòlo Isirayɛli ye lɛɛgèle ni bi kaan lè, kánmi naa na yi a wòlo, bele má saʔa nyɛ lè, saʔa a wòlo bele bee ma. Bele má cɛɛri nyɛ lè, cɛɛri a wòlo bele bee ma. Pe myɛ a yàa wòlo be kěyi ni bi yɛlɛ ní be kɔ́rigi lɛɛgéle ní bi kaan Levii ye ma.»

Kàsuro-jée-kèye

⁹ A Yawe gi joo Mowizi ma níì jo:

¹⁰ «Ki joo Isirayɛli yòdaʔayi wòolo ma, mí be pye: ‹Lǎli ni yele ga Zyuridɛnw jeli lè n jée Kanaan tári ni,

¹¹ yele a kèyaa nyɛ́nɛ wòlo yoro í pye kàsuro-jée-kèye yele ma, koro ga pye syɔ́ɔnwee wi ga fòʔo syɔɔnwaa na n kpóo lè, wi gbǎn fàn kári yaà beè.

¹² Kěyi bee a pye yele ma kàsuro-jée-kèye, sìsyaanw wolo gɔlɔ́-wòloo yɛ́ʔɛ na. Koro ga pye pe a kɔ́ syɛɛnkpoow kpóo wi kútiiw ní sìnjoo ni syɛ́ɛnmi yɛ́ʔɛ ma í.

¹³ Kěyee yele a kaan lè, yi yàa kɔrɔni a pye yele ma kàsuro-jée-kèye.

¹⁴ Yele a kèye taanri kaan naa Zyuridɛn jeligɔgi naa na, bi kèyaa taanri kaan yaà Kanaan tári ni, yi a pye kàsuro-jée-kèye.

¹⁵ Kěyi bee kɔrɔni a pye Isirayɛli ye má kàsuro-jée-kèye, ní nibɔnbèle má pe baa tɛ́ɛn ní yele ní lè, ní bele pe a canyaa kwɔ́ɔ lè si kári. Koro ga pye syɔ́ɔnwee faala wi ga fòʔo n syɔɔn kpóo lè, woro í gbǎn fàn bi kári yaà beè.

¹⁶ Syɔɔnwaa ga wi syɛɛnnyɛnnɛ kpúmɔn ní tunmɔrɔ yáriga ní, á wi kùu koro fúngo ni, syɛɛnkpóō wii. Pe a syɛɛnkpoow kpóo.

¹⁷ Wi ga kàdɛnɛgɛ cò wi kɔ́gi ni, gee ki a gbǎn syɔɔn kpóo lè, n tɛ́ʔɛ n wi kpúmɔn, á wi kùu koro fúngo ni, syɛɛnkpóō wii. Pe a syɛɛnkpóow kpóo.

¹⁸ Tiige yárigee ki a gbǎn syɔɔn kpóo lè, wi ga koro kàa cò kɔ́gi ni n tɛ́ʔɛ n wi kpúmɔn á wi kùu koro fúngo ni, syɛɛnkpóō wii. Pe a syɛɛnkpóow kpóo.

¹⁹ Sìsyaanw wolo gɔlɔ́-wòloo a syɛɛnkpóow kpóo. Wi ga wi fàra n nyaa wi a wi kpóo.

²⁰ Syɔɔn ga wi syɛɛnnyɛnnɛ círi ní paraga ní, wàlá n làra n wi sige níì wi wáa ní yarigaa ní, á wi kùu koro fúngo ni,

²¹ wàlá wi ga wi para níì wi kpúmɔn ní wi kɔ́gi ní, á wi kùu koro fúngo ni, pe a kpúmɔnfɔw kpóo, syɛɛnkpóō wii. Sìsyaanw wolo gɔlɔ́-wòloo ga wi fàra n nyaa, wi a wi kpóo.

²² Kàjáa syɔɔn ga wi syɛɛnnyɛnnɛ ŋɔrigɔ ki si ga pye nigooro ni í, wàlá n wi wáa ní yarigaa ní bi gi taa wi da làra n wi sige wii í,

²³ wàlá wi ga kàdɛnɛgɛ cáan wi na, gee ki a gbǎn syɔɔn kpóo lè, wi si da wi nyaa í, á wi kùu, bi gi taa wi da pye wi nigoò í, wi ga gi yìrige gi na bi kapeʔe kpéʔele wi na í,

²⁴ lǎli bee ni, syɛ́ɛnmi a kútiiw kúun kpúmɔnfɔw, ní sìsyaanw wolo gɔlɔ́-wòloo nínge ni bi yɛlɛ ní làlwa kérigèle naa ní.

²⁵ Syɛ́ɛnmi a syɛɛnkpóow syɔɔ sìsyaanw wolo gɔlɔ́-wòloo ma bi lúrugo tórigo kàsuro-jée-kěgi ma, gee ni wi da fàn n sáà jée lè, wi a kòro yaà beè bi taa sáriga-wòlobèle kàfɔlɔ í ba kùu, woro wee na be kàlifaali sìnjànma wo lè.

²⁶ Kàsuro-jée-kěgee ni syɛɛnkpóow fàn n sáà jée lè, wi ga tíi níì gi tári láʔala kána,

²⁷ sìsyaanw wolo gɔlɔ́-wòloo ga wi fàra n nyaa kàsuro-jée-kěgi kàdoʔo ma, wi ga syɛɛnkpóow kpóo, syɛɛnkpóoro kolomɔ a córo wi ma í.

²⁸ Níì cán syɛɛnkpóow n yɛlɛ wi kòro wi kàsuro-jée-kěgi ni bi taa sáriga-wòlobèle kàfɔlɔ í kùu. Sáriga-wòlobèle kàfɔlɔ ga baa kùu, wi a náa gbǎn lúru kári wi tálɛɛli ma.

²⁹ Kérigèle naa a pye làlwa kèlē yele, ní yele yìrigèle syɛ̀ɛnnɛ myɛ ma yele tɛɛ̀tɛ́nɛyi myɛ ni.

³⁰ Syɔɔnwaa ga wàa kpúmɔn n kpóo, pe a syɛɛnkpóow bee kpóo séerafɔɔlɔ syɛ́ɛnrɛ báriga ni. Kàjáa syɔɔn nibin séera a gbǎn gi yaʔa be syɔɔn kpóo í.

³¹ Syɛɛnkpóowee wi yɛlɛ ní kùu ní lè, yele a kɔ́ nyùnzyɔɔ-wáli syɔɔ wi sìíw kéele na í, níì cán pe a wi kpóo wii.

³² Yele a kɔ́ nyùnzyɔɔ-wáli syɔɔ wee má wi fàn n kári wi kàsuro-jée-kěgi ma lè í, jàngó wi lúru sa tɛ́ɛn wi tári ni bi sáriga-wòlobèle kàfɔlɔ yaʔa sìnguu ni í.

³³ Táree ni yele a sa pye lè, yele a kɔ́ di nɔ́nʔɔ í, níì cán sìsyaanw i tári nɔ́ɔnri. Sìsyaanwee wi ga wo tári ni lè, yafyɛn a gbǎn wi woli kapeele kusulugo fáli kpéʔele tári kéele na í, kapye wi wovɔw tiimaa sìsyaan ban í.

³⁴ Yele a kɔ́ tári nɔ́nʔɔ dee ni yele a sa tɛ́ɛn lè í, toro dee ni mii a pye lè wodɛ́ɛɔn ní. Níì cán mii wi nyɛ Yawe, wee wi nyɛ lè wodɛ́ɛɔn ní Isirayɛli ye níngi ni.› »