Córolo 34 - Cebaara Bible 2010

Kanaan láʔagoloyi kéele

¹ A Yawe gi joo Mowizi ma níì jo:

² «Syɛ́ɛnri naa joo mi gbàn Isirayɛli ye ma mí be pye: ‹Lǎli ni yele ga sáà jée lè Kanaan tári ni, dee yele a taa lè kɔrigɔ, toro di nyɛ dee naa ní di láʔagoloyi ní.

³ Wòrogulo kàbangi a séli Sɛn fìími tára na Edɔmi taana, kánmi bee na yele láʔagologi a séli solonɛʔɛmi lɔ̀ʔɔ láʔala na, canʔafolomɔ kabangi na.

⁴ Yele láʔagologi a ní wàli bi fala wòrogulo kàbangi na Akirabimi tɛɛ̀lúgugi ma, bi sɔ̀lɔ Sɛn ma, bi kári Kadɛsyi-Barineya wòrogulo kàbangi na, si taʔa fala Hasari-Adari ma, si sɔ̀lɔ Asimɔn ma.

⁵ Si yìri Asimɔn ma bi kolo fala Ezyipiti lǒgi ma bi kári sa láʔa Sólomi lɔ̀ʔɔ na.

⁶ Sólomi Lòkpɔʔɔ ki a pye yele canʔajeemɛ kabangi láʔagologo.

⁷ Yele Solomɔkulo kàbangi láʔagologo gi nyɛ gee naa: Bi séli Sólomi Lòkpɔʔɔ na, yele a gi wòlo bi kári sa láʔa Hɔri nyanbelegi na.

⁸ Bi ní séli Hɔri nyanbelegi na, yele a gi wòlo bi kári Lebo-Hamati tɛɛ̀jeeli kàbaan na, jàngó láʔagologi í sa láʔa Sedadi na.

⁹ Láʔagologi a ní taʔa fala Zifurɔn ma, bi kári sa láʔa Hasari-Enan na. Koro ki a pye yele Solomɔkulo kàbangi láʔagologo.

¹⁰ Yele a yele canʔafolomɔ kabangi láʔagologo wòlo, bi séli Hasari-Enan na bi kári sa nan Syefami na.

¹¹ Láʔagologi a séli Syefami ma bi tìgi fala Iribila ma, Ayɛn canʔafolomɔ kabangi na, si ní tìgi bi fala sa nan Kinerɛti sólomi lɔ̀ʔɔ nyɔ́ɔ na, canʔafolomɔ ma.

¹² Láʔagologi a ní tìgi bi fala Zyuridɛnw ma bi sa nan solonɛʔɛmi lɔ̀ʔɔ na. Toro ti a pye yele tári, ní di láʔagoloyi ní bi di màʔa.› »

¹³ A Mowizi syɛ́ɛnri naa joo n gbàn Isirayɛli ye ma níì jo: «Tári bee yele a lɛɛ yeyɛɛ na ní gǒnwáari ní. Yawe n jo ti n yɛlɛ bi kaan syɛɛnfeleyi kpanjɛrɛ ní tíla ma.

¹⁴ Níì cán Wurubɛn syɛɛnfelegi wòolo n yɛlɛ ní be narigbaayi ní, ní Gadi syɛɛnfelegi wòolo, n yɛlɛ ní be narigbaayi ní, poro n be kɔ́rigi lɛɛlɛ taa n kwɔ́ɔ, a Manase syɛɛnfelegi wòolo tíla wɔ́ɔ̀ be kɔ́rigi lɛɛlɛ taa n kwɔ́ɔ.

¹⁵ Syɛɛnfeleyee siin, ní syɛɛnfelegee tíla n yi kɔ́rigi lɛɛlɛ taa n kwɔ́ɔ Zyuridɛn jeligɔgi naa na, Zyeriko zǐnmi na, canʔafolomɔ kabangi na.»

Tálɛɛbèle mɛ́ɛyɛ

¹⁶ A Yawe gi joo Mowizi ma níì jo:

¹⁷ «Nǎnbèle bele pe a tári lɛɛ yele na lè, poro mɛ́ɛyi yi nyɛ yee naa: Sáriga-wòlow Eleyazari, ní Zyozuwe wi lè Nun jáaw.

¹⁸ Yele a wɔ́ɔ kùndigibéle nibin nibin nyɛ́nɛ wòlo syɛɛnfelege o syɛɛnfelege ni, be pye tári lɛɛlɛ ni.

¹⁹ Nǎnbèle bee mɛ́ɛyɛ yi nyɛ yee naa: Zyuda syɛɛnfelegi wóo wi nyɛ Kalɛbi wi lè Yefune jáaw.

²⁰ Simeyɔn yòdaʔayi syɛɛnfelege wóo si i nyɛ Syemuwɛli, wi lè Amihudi jáaw.

²¹ Bɛnzyamɛ syɛɛnfelegi wóo si i nyɛ Elidadi, wi lè Kisilɔn jáaw.

²² Dan syɛɛnfelegi wóo si wi nyɛ Kùndigiw Bukii, wi lè Yogilii jáaw.

²³ Zyozɛfu yòdaʔayi ni, Manase syɛɛnfelegi wóo wi nyɛ Kùndigiw Hannyɛli, wi lè Efɔdi jáaw.

²⁴ Efirayimi syɛɛnfelegi wóo si i nyɛ kùndigiw Kemuwɛli, wi lè Syifitan jáaw.

²⁵ Zabulɔn yòdaʔayi syɛɛnfelege wóo si i nyɛ kùndigiw Elisafan, wi lè Parinaki jáaw.

²⁶ Isakari yòdaʔayi syɛɛnfelege wóo si i nyɛ kùndigiw Palityɛli, wi lè Azan jáaw.

²⁷ Azɛɛri yòdaʔayi syɛɛnfelege wóo si i nyɛ kùndigiw Ahihudi, wi lè Syelomii jáaw.

²⁸ Nɛfitalii yòdaʔayi syɛɛnfelege wóo si i nyɛ kùndigiw Pedahɛli, wi lè Amihudi jáaw.»

²⁹ Bele má Yawe gi joo n gbàn lè níì jo be Kanaan tári lɛɛ Isirayɛli ye na, poro bɛɛ.