Córolo 33 - Cebaara Bible 2010

Isirayɛli ye tánʔagèle tɛɛ̀yéregéle kéele

¹ A Isirayɛli syɛ́ɛnbèle yiri Ezyipiti tári ni àmɛɛ kapɛɛnkpumɔnbéle kabiya nyɛ lè, Mowizi ní Aarɔn si i nyɛ be yɛ́ɛgi na, be tánʔagèle tɛɛ̀yéregéle ge nyɛ gele naa.

² A Mowizi i be káriganmi, ní be tɛ́ɛnganmi sɛ́bɛ n yɛlɛ ní gee ní Yawe joo n gbàn lè. Be tánʔagèle tɛɛ̀yéregéle ge nyɛ gele naa n yɛlɛ ní be yìriganmi ní.

³ Pe n yìri n yiri Aramisɛsi ni, yɛ́ɛli yézelige canya kɛɛ ní kagunɔ wógi na. Sɔ̀lɔ-mí-yaʔali séri canʔa nyǐndaliga na Isirayɛli ye yiri peyɛɛ ma Ezyipiti ye myɛ nyɛ́nɛ na.

⁴ A Ezyipiti ye si i pìiselibèle myɛ tɔ́ngi, poro bele Yawe da kpúmɔn n kpóo pe níngi ni lè, Yawe maa wɔ́ɔ̀ kútiiw ceri be kolocɔlɔbèle na.

⁵ A Isirayɛli ye yìri n yiri Aramisɛsi ni n sáà tɛ́ɛn Sukɔti ni.

⁶ A pe ga yiri Sukɔti ni, a be sáà tɛ́ɛn Etami ni, ki lè fìími tára nyɔ́ɔ na.

⁷ A pe ga yìri Etami ni, a be kolo n fala Pi-Hahirɔti ma, Baali-Sefɔn zǐnmi na, ní sáà tɛ́ɛn Migidɔli yɛ́ʔɛ ma.

⁸ A pe ga yìri Pi-Hahirɔti yɛ́ʔɛ ma, a be foro sólomi lɔ̀ʔɔ nínge ni n fala fìími tára kabaan na. A be canya taanri tánʔana kpéʔele Etami fìími tára ni, ní sáà tɛ́ɛn Mara ma.

⁹ A pe ga yìri Mara ni, a be i syée n sáà nan Eliimi na. Pùnweegéle kɛɛ ní siin, ní sɛʔɛtiiye togoye taanri ní kpɔrigɔ maa pye Eliimi ni. A pe tɛ́ɛn yaà beè.

¹⁰ A pe ga yìri Eliimi ni, a be sáà tɛ́ɛn Nyɛ́nɛri solomɔ lɔ́ʔɔ nyɔ́ɔ na.

¹¹ A pe ga yìri Nyɛ́nɛri solomɔ lɔ́ʔɔ nyɔ́ɔ na, a be sáà tɛ́ɛn Sɛn fìími tára ni.

¹² A pe ga yìri Sɛn fìími tára ni, a be sáà tɛ́ɛn Dofika ma.

¹³ A pe ga yìri Dofika ni, a be sáà tɛ́ɛn Alusyi ma.

¹⁴ A pe ga yìri Alusyi ni, a be sáà tɛ́ɛn Erefidimi ma, syɛ́ɛnmi ga lɔ̀ʔɔ taa nɛɛ bee bi gbaa í.

¹⁵ A pe ga yìri Erefidimi ni, a be sáà tɛ́ɛn Sinayii fìími tára ni.

¹⁶ A pe ga yìri Sinayii fìími tára ni, a be sáà tɛ́ɛn Kiburɔti-Hataava ma.

¹⁷ A pe ga yìri Kiburɔti-Hataava ni, a be sáà tɛ́ɛn Haserɔti ma.

¹⁸ A pe ga yìri Haserɔti ni, a be sáà tɛ́ɛn Iritima ma.

¹⁹ A pe ga yìri Iritima ni, a be sáà tɛ́ɛn Irimɔn-Perɛsi ma.

²⁰ A pe ga yìri Irimɔn-Perɛsi ni, a be sáà tɛ́ɛn Libina ma.

²¹ A pe ga yìri Libina ni, a be sáà tɛ́ɛn Irisa ma.

²² A pe ga yìri Irisa ni, a be sáà tɛ́ɛn Kehelata ma.

²³ A pe ga yìri Kehelata ni, a be sáà tɛ́ɛn Syafɛɛri nyanbelegi taana.

²⁴ A pe ga yìri Syafɛɛri nyanbelegi ma, a be sáà tɛ́ɛn Harada ma.

²⁵ A pe ga yìri Harada ni, a be sáà tɛ́ɛn Makelɔti ma.

²⁶ A pe ga yìri Makelɔti ni, a be sáà tɛ́ɛn Tahati ma.

²⁷ A pe ga yìri Tahati ni, a be sáà tɛ́ɛn Tera ma.

²⁸ A pe ga yìri Tera ni, a be sáà tɛ́ɛn Mitika ma.

²⁹ A pe ga yìri Mitika ni, a be sáà tɛ́ɛn Hasyimɔna ma.

³⁰ A pe ga yìri Hasyimɔna ni, a be sáà tɛ́ɛn Moserɔti ma.

³¹ A pe ga yìri Moserɔti ni, a be sáà tɛ́ɛn Bene-Yaakan ma.

³² A pe ga yìri Bene-Yaakan ni, a be sáà tɛ́ɛn Hɔri-Gidigadi ma.

³³ A pe ga yìri Hɔri-Gidigadi ni, a be sáà tɛ́ɛn Yotibata ma.

³⁴ A pe ga yìri Yotibata ni, a be sáà tɛ́ɛn Aburona ma.

³⁵ A pe ga yìri Aburona ni, a be sáà tɛ́ɛn Esyɔn-Gebɛɛri ma.

³⁶ A pe ga yìri Esyɔn-Gebɛɛri ni, a be sáà tɛ́ɛn Sɛn fìími tára ni, ki lè Kadɛsyi ma.

³⁷ A pe ga yìri Kadɛsyi ni, a be sáà tɛ́ɛn Hɔri nyanbelegi taana, Edɔmi tári nyɔ́ɔ na.

³⁸ A sáriga-wòlow Aarɔn lúgu Hɔri nyanbelegi na n yɛlɛ ní gi ní àmɛɛ Yawe da gi joo n gbàn lè. A wi kùu yaà beè, koro n pye Isirayɛli ye yiri lè Ezyipiti tári ni, ki yɛ̀ʔɛlɛ togoye siin wóli yeye kagunɔ wóʔo cânzelige na.

³⁹ Lǎli ni Aarɔn kùu Hɔri nyanbelegi na lè, wi maa taa yɛ̀ʔɛlɛ togoye kɔrɔni ní taanri.

⁴⁰ Aradi fànʔafɔw wi lè Kanaan ye wów, wi pye lè wodɛ́ɛɔn ní Kanaan tári wòrogulo kàbangi na, a woro Isirayɛli ye panni kéele lóʔo.

⁴¹ A pe ga yìri Hɔri nyanbelegi taana, a be sáà tɛ́ɛn Salimona ma.

⁴² A pe ga yìri Salimona ni, a be sáà tɛ́ɛn Punɔn ma.

⁴³ A pe ga yìri Punɔn ni, a be sáà tɛ́ɛn Obɔti ma.

⁴⁴ A pe ga yìri Obɔti ni, a be sáà tɛ́ɛn Iye-Abarimi ma, Mowabi tári láʔagologo na.

⁴⁵ A pe ga yìri Iye-Abarimi ni, a be sáà tɛ́ɛn Dibɔn-Gadi ma.

⁴⁶ A pe ga yìri Dibɔn-Gadi ni, a be sáà tɛ́ɛn Alimɔn-Dibilatayimi ma.

⁴⁷ A pe ga yìri Alimɔn-Dibilatayimi ni, a be sáà tɛ́ɛn Abarimi nyanbeleyi nínge ni, Nebo yɛ́ʔɛ ma.

⁴⁸ A pe ga yìri Abarimi nyanbeleyi nínge ni, a be sáà tɛ́ɛn Mowabi tɛɛfiiyi na, Zyuridɛnw nyɔ́ɔ na, Zyeriko zǐnmi na.

⁴⁹ Pe n tɛ́ɛn Zyuridɛnw nyɔ́ɔ na, Mowabi tɛɛfiiyi na, n séli Bɛti-Hayesyimɔti na fwɔɔ n sáà nan Abɛli-Syitimi na.

Gee Yawe joo n gbàn Kanaan tári lɛɛganma kéele na lè

⁵⁰ A Yawe joo ní Mowizi ní, Mowabi tɛɛfiiyi na, Zyuridɛnw nyɔ́ɔ na, Zyeriko zǐnmi na,

⁵¹ wi n jo: «Ki joo Isirayɛli yòdaʔayi wòolo ma mí be pye: ‹Lǎli ni yele ga Zyuridɛnw jeli lè n sáà jée Kanaan tári ni,

⁵² ye tári syɛ̀ɛnnɛ myɛ nɛnɛ ye yirige di ni yeyɛɛ yɛ́ʔɛ ma. Ye be kàdɛnɛyi yasunyo myɛ kálagi ye yirige yaà, bi be tunmɔgbalari yasunyo myɛ kálagi yirige yaà, yé be sáriga-wòlo-tɛ́ɛyi myɛ kálagi.

⁵³ Yele a tári syɔɔ taa bi tɛ́ɛn di ni, níì cán mii n di kaan yele ma di pye yele wóro.

⁵⁴ Yele a tári lɛɛ kɔrigɔ ní gǒnwáara ní, bi yɛlɛ ní yele túluyi ní. Narigbaagee ga kpɔ́ʔɔ lè, ye gee bee kɔ́rigɔ kpɔ́ʔɔ, gee si ga cɛ́rɛ lè, ye gee bee kɔ́rigɔ cɛ́rɛ. Syɔɔn gɔnw ga too tɛ́ɛgee na lè, gee bee a pye wi woʔò. Yele a kɔ́rigi taa bi yɛlɛ ní yele tóobèle syɛɛnfeleye ní.

⁵⁵ Kàjáa bele be nyɛ tári bee ni lè, yele ga pye yele ga be nɛnɛ n yirige di ni yeyɛɛ yɛ́ʔɛ ma í, bele yele ga yaʔa be ni lè, pe a pye àmɛɛ wúuro nyɛ lè yele nyapiigèle ni, ní àmɛɛ ŋaafirigeye nyɛ lè yele lɛ̀ʔɛgèle ni. Táree ni yele a sa tɛ́ɛn lè, pe a pye yele kàsiitun-nyɛ̀nnɛ di ni.

⁵⁶ Ki si a ba pye, gee mii da kɔ̀rirɔ n tímana bi kpéʔele be na lè, mii í koro kpéʔele yele na.› »