Córolo 31 - Cebaara Bible 2010

Kapɛɛnni Madyan ye kánmi na

¹ A Yawe gi joo Mowizi ma níì jo:

² «Ki n yɛlɛ mi Isirayɛli ye gɔ̀lɔ́w wòlo Madyan ye na, koro kàdoʔo ma mɔ a kùu bi kári mɔ syɛ́ɛnbèle kurugo.»

³ A Mowizi gi joo syɛ́ɛnbèle ma níì jo: «Ki n yɛlɛ ye kapɛɛnkpumɔn-yárira le nǎnbèle pèle na yele níngi ni, pe kári be sa kapɛɛnni kpúmɔn ní Madyan ye ní, koro ga pye bi Yawe gɔ̀lɔ́w wòlo Madyan ye na.

⁴ Ye pèle wòlo Isirayɛli syɛɛnfeleyi ni, syɛɛnfelege o syɛɛnfelege nànbēle saala kagunɔ, ye tórigo kapɛɛnni na.»

⁵ A be nànbēle cɔɔnri Isirayɛli sirakamayi ni, syɛɛnfelege o syɛɛnfelege ni, saala kagunɔ. A be pye nànbēle selebingéle kɔrɔni, bele kɔ́yɔ ni kapɛɛnkpumɔn-yáriri pye lè.

⁶ A Mowizi saala kagunɔbèle bee tórigo kapɛɛnni na, bele be nyɛ́nɛ n wòlo lè syɛɛnfelege o syɛɛnfelege ni, saala kagunɔ, poro ní Fineyasi wi lè sáriga-wòlow Eleyazari jáaw, woro wee wi da ni tɛɛcǎngi yárira tugu lè n fàra syɛ́ɛnbèle yìrile búruwiibēle na.

⁷ A be kapɛɛnkpumɔn-yáriri láa n sáà too Madyan ye na n yɛlɛ ní gi ní àmɛɛ Yawe da gi joo n gbàn Mowizi ma lè, a be nǎnbèle myɛ kpóo.

⁸ A be Madyan fànʔafɔbèle kagunɔ kpóo, bele làrigboolo ni, pe lè Evii, ní Erekɛmi, ní Suuri, ní Huri, ní Ereba. A be wɔ́ɔ̀ Beyɔɔri jáaw Balaami kpóo ní ŋɔsée ní.

⁹ A Isirayɛli ye Madyan ye cébèle ní be pìíbèle cò n kári, níì be yaweeri gboogéle koli n fàra yaweeyee na be tɛ̀ɛ́n lè.

¹⁰ Kěyee ni pe da pye wodɛ́ɛnbéle ní lè, a be yee bee myɛ sórigo, n fàra be vǒyi myɛ na.

¹¹ A be yáriri myɛ láa n yiri, dee pe da koli lè n fàra syɛ́ɛnbèle, ní yaweeri myɛ na pe da cò kapɛɛnni na lè.

¹² Púlobèle ní yaweeri be cò kapɛɛnni na lè, n fàra lɔ́ri na be koli lè, a be kári ní dee bee ní Mowizi, ní Eleyazari ma wi lè sáriga-wòlow, n fàra Isirayɛli syɛ́ɛnmi na bi pye lè wodɛ́ɛnmɛ ní Mowabi tɛɛfiiyi na, Zyuridɛnw nyɔ́ɔ na, Zyeriko zǐnmi na.

¹³ Mowizi ní sáriga-wòlow Eleyazari, n fàra syɛ́ɛnmi kùndigibéle myɛ na, a poro yiri n sáà be fàra tɛɛkòrogi kàdoʔo ma.

¹⁴ A Mowizi fúngi tɔ̀nɔ n tanʔa sùlasiibèle kàfɔɔlɔ kurugo, be pye lè saala kagunɔ kagunɔw kùndigibéle, ní dabata-daw kùndigibéle, poro bele be yìri kapɛɛnni ma n lúru n pan lè.

¹⁵ A Mowizi be pye: «A yele si cébèle myɛ yaʔa lé sìngbóo ní ?

¹⁶ Wéle, poro pe da Isirayɛli ye kárima a be sìnzinmɛ naʔama kpéʔele Yawe na Peyɔɔri kéeli na, Balaami syɛɛnjóori báriga ni. Lǎli bee ni a káfalagi yáama yìri Yawe syɛ́ɛnmi nínge ni.

¹⁷ Tɔ́ɔliw ni, ye nànbiigèle myɛ kpóo pìíbèle ni, cɔlɔɔ o cɔlɔɔ wi sínɛ ní nàɔn ní lè n nàngeele cán n kwɔ́ɔ ye wɔ́ɔ woro kpóo.

¹⁸ Kàjáa calipiigèle myɛ ge lè ke ga kɔ́ɔ̀ sínɛ ní nàɔn ní n nàngeele cán í, ye koro yaʔa sìi na yeyɛɛ ma.

¹⁹ Yele si na, ye tɛ́ɛn tɛɛkòrogi kàdoʔo ma canya kɔrɔsiin. Yele bele myɛ ye pèle kpóo lè, ní bele myɛ be tánga kpóō na lè, yele a yeyɛɛ jée mùnu candaanri wógi, ní canya kɔrɔsiin wógi na, yele ní bele yele cò n pan lè.

²⁰ Yele a wɔ́ɔ búroyi myɛ jée mùnu, n fàra sáliyi yárira myɛ, ní dee myɛ be sámaga ní sike-siire ní lè n fàra tíiri yayigelere myɛ na.»

²¹ Sùlasiibèle pe da kári kapɛɛnni na lè, a sáriga-wòlow Eleyazari be pye: «Gee gi sɛ́bɛ lè làlwaw ni, wee Yawe kaan Mowizi ma lè, koro gi nyɛ gee naa.

²² Tɛ́ɛw, ní wálifiiw, ní kanyɛɛnri, ní túnmɔri, ní kafiiri, ní pulɔnw,

²³ yáriree myɛ ti a gbǎn jée naà ni lè, yele a dee bee lége náagi ni bi di nɔ́nʔɔri láʔa di na. Dee myɛ si di lè ti a gbǎn jée naà ni í, lǒgi gi nɔ́nʔɔri láari lè koro a dee bee jée mùnu, yele a toro sámaga nyɔɔ ní lǒgi ní.

²⁴ Ye yele yaleri jée canya kɔrɔsiin wógi na, yele a mùnú nyɔɔ. Koro kàdoʔo ma yele a gbǎn lúru jée tɛɛkòrogi ni.»

Kapɛɛnni yakoliro lɛɛganma

²⁵ A Yawe Mowizi pye:

²⁶ «Yáriri be cò kapɛɛnni na lè, ti lè syɛ́ɛnbèle, ní yaweeri, ki n yɛlɛ mɔ ní sáriga-wòlow Eleyazari ní syɛ́ɛnmi narigbaaya kundigibéle í di córo.

²⁷ Yáriri di taa kapɛɛnni na lè, bele be kapɛɛnkpumɔn-yáriri láa n sáà kapɛɛnni kpúmɔn lè, ti lɛɛ poro ní syɛ́ɛnmi myɛ na.

²⁸ Sùlasiibèle be kári n sáà kapɛɛnni kpúmɔn lè, mɔ a tàa láʔala bele bee wóro na bi kaan Yawe ma, gee bee n jo syɛ́ɛnbèle, ní yaweekpologèle ní jòfanibèle, ní yaweeyiligèle. Syɛ̀ɛnnɛ nibin nibin a láʔala saala siin-ziin ní dabata-daw na, yaweegèlē nibin nibin si wɔ́ɔ láʔala saala siin-ziin ní dabata-daw na.

²⁹ Yele a dee bee láʔala tílayi na yi kaan be ma lè, mɔ si di kaan sáriga-wòlow Eleyazari ma di pye yakanʔa, gee gi láʔa n kaan Yawe ma lè.

³⁰ Tílagee gi kaan Isirayɛli ye ma lè, mɔ a syɛ̀ɛnnɛ nibin nibin láʔala togoye siin ní kpɔrigɔ kpɔrigɔw na, bi yaweegèlē nibin nibin láʔala togoye siin ní kpɔrigɔ kpɔrigɔw na yaweekpologèle, ní jòfanibèle, ní yaweeyiligèle na, gee bee n jo yaweeri myɛw bi kaan Levii ye ma, poro bele má Yawe kpɔ̀ʔɔrɔli fànikpaʔa fáli kpaawelere kàlifáa lè.»

³¹ A Mowizi ní sáriga-wòlow Eleyazari gi kpéʔele n yɛlɛ ní gi ní àmɛɛ Yawe da gi joo n gbàn Mowizi ma lè.

³² Bele be kári n sáà kapɛɛnni kpúmɔn lè, yáriri be sáà koli n pan lè, dee ti baa kòro lè, ti n pye: Yaweeyiligēle sirakamayɛ toko ní kpɔrigɔ ní taanri, ní selebingéle kɔrɔsiin ní saala kagunɔ,

³³ yaweekpologèle si i nyɛ sirakamayɛ taanri ní selebingéle kɔrɔni,

³⁴ ní jòfanibēle sirakamayɛ taanri ní saala kagunɔ,

³⁵ ní syɛ̀ɛnnɛ sirakama ní selebingéle kɔrɔni, gee bee n jo cébèle bele be lè pe da kɔ́ɔ̀ sínɛ ní nàɔn ní í.

³⁶ Tílagee be kaan bele ma be kári n sáà kapɛɛnni kpúmɔn lè, ki maa pye yaweeyiligēle sirakamayɛ kɛɛ ní kɔrɔni ní selebingéle kɔrɔtaanri ní saala kɔrɔsiin ní dabata.

³⁷ Yawe lɛɛli be yirige yaweeyiligèle ni lè, li maa pye yaweeyiligēle saala taanri ní togoye taanri ní kpɔrigɔ ní kagunɔ.

³⁸ Yaweekpologèle si i nyɛ sirakama ní selebingéle kɔrɔtaanri. Yawe lɛɛli si i nyɛ togoye taanri ní kpɔrigɔ ní siin.

³⁹ Jòfanibèle si i nyɛ sirakama ní selebingéle kagunɔ ní saala siin ní dabata. Yawe lɛɛli si i nyɛ togoye taanri ní nibin.

⁴⁰ Syɛ́ɛnbèle si i nyɛ selebingéle kɔrɔtaanri. Yawe lɛɛli si i nyɛ toko ní kpɔrigɔ ní siin.

⁴¹ Lɛɛli be láʔa n kaan Yawe ma lè a Mowizi li kaan sáriga-wòlow Eleyazari ma n yɛlɛ ní gi ní àmɛɛ Yawe da gi joo n gbàn Mowizi ma lè.

⁴² Tílagee ki da pye lè Isirayɛli ye wógi, koro gee Mowizi da wàli n láʔa kapɛɛnkpumɔn-nǎnbèle wóʔo na lè

⁴³ n koro pye syɛ́ɛnmi wóʔo, ki maa pye Yaweeyiligēle sirakamayɛ kɛɛ ní kɔrɔni ní selebingéle kɔrɔtaanri ní saala kɔrɔsiin ní dabata.

⁴⁴ Yaweekpologèle si i nyɛ sirakama ní selebingéle kɔrɔtaanri.

⁴⁵ Jòfanibèle si i nyɛ sirakama ní selebingéle kagunɔ ní saala siin ní dabata.

⁴⁶ Syɛ́ɛnbèle si i nyɛ selebingéle kɔrɔtaanri.

⁴⁷ Tílagee ki da pye lè Isirayɛli ye wógi, a Mowizi nibin nibin wòlo togoye siin ní kpɔrigɔ kpɔrigɔw ni, syɛ́ɛnbèle ní yaweeri ni n kaan Levii ye ma, poro bele má Yawe kpɔ̀ʔɔrɔli fànikpaʔa fáli kpaàwelere kàlifáa lè, n yɛlɛ ní gi ní àmɛɛ Yawe da gi joo n gbàn Mowizi ma lè.

Kínidɛnɛgɛ yakanʔa kéele Kolocɔlɔɔ ma

⁴⁸ Sùlasiibèle kàfɔɔlɔ be pye lè saala kagunɔ kagunɔw kùndigibéle, ní dabata-daw kùndigibéle lè, a poro pan Mowizi ma,

⁴⁹ ní baa wi pye: «Sùlasiibèle bele be pye wolo, mɔ falipyebèle kɔ́lɔ na lè, wolo n baa be córo, nàɔn nibin ga fɔ̀n wolo ni í.

⁵⁰ A wolo myɛ nibin nibin si pan ní tɛ́ɛw yárira ní ba kaan Yawe ma yakanʔa, dee wolo taa yaà lè, ti lè nyɔ̀ʔɔdirigèle, ní kajingèle, ní kabegèle vèʔebēle, ní líiyi vèʔebēle, ní yátiigi yalere, bi wolo kapeegèle kùsulugo fáli kpéʔele Yawe yɛ́ʔɛ ma.»

⁵¹ A Mowizi ní sáriga-wòlow Eleyazari yáriri bee myɛ syɔɔ be ma, dee di sámaga ní tɛ́ɛw ní lè.

⁵² Tɛ́ɛw myɛ ní saala kagunɔ kagunɔw kùndigibéle, ní dabata-daw kùndigibéle pan n baa kaan Yawe ma lè sáriga-yirigeo, ti líbeganmi maa pye cúlobéle togoye kɔrɔtaanri ní kpɔrigɔ félege.

⁵³ Kapɛɛnkpumɔn-nǎnbèle myɛ nibin nibin maa yariraa fuguri n láa n pye peyɛɛ wóro.

⁵⁴ A Mowizi ní sáriga-wòlow Eleyazari tɛ́ɛw syɔɔ saala kagunɔ kagunɔw kùndigibéle, ní dabata-daw kùndigibéle ma n pan ní wi ní syɛ́ɛnmi tɛɛfaraga fànikpaʔa ma, wi pye Isirayɛli ye ma sɔ̀ngudaara yáriga Yawe yɛ́ʔɛ ma.