Córolo 30 - Cebaara Bible 2010

¹ Gee myɛ Yawe da joo n gbàn Mowizi ma lè, a wi gi joo Isirayɛli ye ma.

Nyɔɔfaliyi làlwa kéele

² A Mowizi gi joo Isirayɛli syɛɛnfeleyi kùndigibéle ma níì jo: «Tundunri Yawe joo n gbàn lè, toro di nyɛ dee naa:

³ ‹Lǎli ni nàɔn ga nyɔɔfaliga kpéʔele Yawe ma lè, wàlá wi ga kàli n wiyɛɛ bwɔɔ ní keelaa ní, wi a kɔ́ wi syɛ́ɛnri yaʔa sìnvoro í, gee myɛ gi yiri wi nyɔ́ɔgi ni lè, ki n yɛlɛ wi gi foro.

⁴ N cɔlɔɔ yaʔa wi tóow kpaʔa ni, wi ga wi nyɔ́ɔgi fàli Yawe ma, wàlá n wiyɛɛ bwɔɔ ní keelaa ní,

⁵ wi nyɔɔfaligi bee ní kéelee ní wi wiyɛɛ bwɔɔ lè, gee bee ga baa joo wi tóow ma, wi tóow ga pyèri wi ga yafyɛn joo wi ma í, wi nyɔɔfaliyi myɛ a córo wi ma, n fàra syɛ́ɛnri myɛ na, dee ní wi wiyɛɛ bwɔɔ lè.

⁶ Kàjáa cángee na ki ga joo wi tóow ma lè, tofɔw ga gi cée cángi bee, wi nyɔɔfaliyi ní wi wiyɛɛ bwɔɔli syɛ́ɛnraa faala a córo wi ma í. Yawe a wi kùsulugi syɔɔ, àmɛɛ wi tóow cée lè.

⁷ Lǎli ni si wi ga cèpɔrigɔ kpéʔele lè, wi ga nyɔɔfaliya kpéʔele, wàlá a syɛɛnrɛ fòʔo n yiri wi nyɔ́ɔgi ni, dee ní wi wiyɛɛ bwɔɔ lè,

⁸ ki ga joo wi nǎnw ma cángee na lè, wi nǎnw ga pyèri wi ga yafyɛn joo wi ma cángi bee í, wi nyɔɔfaliyi a córo wi ma n fàra syɛ́ɛnri na, dee ní wi wiyɛɛ bwɔɔ lè.

⁹ Kàjáa wi nǎnw ga pye wi ga yére gi ni cángee na ki joo wi ma lè í, gee bee a wi nyɔɔfaligi ní wi wiyɛɛ bwɔɔli syɛ́ɛnrɛ sàa, dee wi fòʔo n joo lè. Yawe a wi kùsulugi syɔɔ.

¹⁰ Lɔgucaa, wàlá céwee be yaʔa lè, pe wàa ga nyɔɔfaliga kpéʔele n wiyɛɛ bwɔɔ ní syɛ́ɛnree faala ní lè ti a córo wi ma.

¹¹ N cɔlɔɔ yaʔa wi nǎnw kpaʔa ni wi ga nyɔɔfaliya kpéʔele wàlá n kàliga tɛ́ʔɛ n wiyɛɛ bwɔɔ,

¹² á gi joo wi nǎnw ma, á wi pyèri wi na, wi ga gi cée í, céw bee nyɔɔfaliya myɛ, ní wi wiyɛɛ bwɔɔli syɛ́ɛnrɛ myɛ a córo wi ma.

¹³ Kàjáa cángee na ki ga joo nǎnw ma lè, wi ga yi sàa, nyɔɔfaliyi myɛ ní wi wiyɛɛ bwɔɔli syɛ́ɛnrɛ myɛ ti yiri wi nyɔ́ɔgi ni lè ti a córo í, wi nǎnw n di sàa, Yawe a wi kùsulugi syɔɔ.

¹⁴ Nyɔɔfaliga o nyɔɔfaliga, ní kàliga o kàliga céw kpéʔele n wiyɛɛ bwɔɔ lè, wi nǎnw a gbǎn gi yaʔa gi foro wàlá bi gi sàa.

¹⁵ Wi nǎnw ga pyèri a gi canyaa kwɔ́ɔ, wi ga yafyɛn joo ní wi ní í, gee bee a céw nyɔɔfaliya myɛ, ní wi wiyɛɛ bwɔɔli syɛ́ɛnrɛ myɛ yaʔa di córo wi ma. Wi n yi yaʔa a yi córo wi céw ma, àmɛɛ wi pyèri wi na cángee na yi kéeli joo wi ma lè.

¹⁶ Kàjáa wi ga yi sàa yi cânloʔogi kàdoʔo ma, woro wi a wi céw kapeele túgoro tugo.› »

¹⁷ Làlwa kérigèle bee Yawe joo Mowizi ma nàɔn ní wi cɔɔ̀ kéele na, ní tofɔlɔ ní wi pyà kéele na, wi lè pìcaa, bi wi yaʔa wi tóow kpaʔa ni.