Córolo 28 - Cebaara Bible 2010

LALWA KERIGELE SARIGA-WOLORI KEELE NA a) Canʔa o canʔa wów

¹ A Yawe gi joo Mowizi ma níì jo:

² «Syɛ́ɛnri naa joo mi gbàn Isirayɛli ye ma mí be pye: ‹Ye yákirii yaʔa mii yakaangi na yaa maa ní gi ní ki lǎli ni ki lè mii sárigaw lìile, wee náagi sórogi ni kwóo lè á wi núngi mii dɛ́nɛ.›

³ Mɔ a gi joo be ma si be pye: ‹Sárigaw ní yele a ra maa Yawe ma lè, wee náagi sórogi ni kwóo lè woro wi nyɛ wee naa: Yɛ̀ʔɛlɛ nibin nibin tɛɛlɛ fun bàpiigéle siin-ziin canʔa o canʔa. Wee bee a pye bàngwɔɔ sáriga-sórigoo.

⁴ Mɔ a bàpilaa nibin wòlo sáriga nyǐngi nyɔ́ɔ na, si lee wòlo cângwɔɔgi nyɔ́ɔ na

⁵ ní míivɔɔnimɔ cúlobéle taanri yakanʔa ní, bee pe a nyáʔami lè olivye tɔ́nʔɔnɔɔ sinmɛ lítiri nibin ní tíla ni.

⁶ Bàngwɔɔ sáriga-sórigoo wii, wee félege pe da wòlo Sinayii nyanbelegi na lè, sáriga wii, wee náagi sórogi ni kwóo lè á wi núngi Yawe dɛ́nɛ.

⁷ Bàpile o bàpile sáriga a wòlo ní sáriga-yólogoo lítiri nibin ní tíla ní. Tɛɛcǎngi ni mɔ a sáriga-yólogow dùvɛɛn kaan Yawe ma.

⁸ Mɔ a bàpii-siin wóli wòlo sáriga cângwɔɔgi nyɔ́ɔ na, ní míimi yakanʔa, ní nyǐngi nyɔ́ɔ sáriga-yólogoo yakaan-felenijanga ní. Sáriga wii, wee náagi sórogi ni kwóo lè á wi núngi Yawe dɛ́nɛ.

b) Cândɛnɛgi canʔa wóo

⁹ « ‹Ki ga pye cândɛnɛgi canʔa na, yele a yɛ̀ʔɛlɛ nibin nibin tɛɛlɛ fun bàpiigéle siin wòlo sáriga, ní míivɔɔnimɔ cúlobéle kɔrɔni ní, bee pe a nyáʔami sìnmɛ ni lè, n fàra sáriga-yólogow na.

¹⁰ Cândɛnɛgi sáriga-sórigoo wii, wee wi a ra wóo lè cândɛnɛgɛ o cândɛnɛgɛ n fàra bàngwɔɔ sáriga-sórigow ní sáriga-yólogow na.

c) Yéyi cânzeliye wóo

¹¹ « ‹Yele yeʔe o yeʔe cânzelige na, yele a náapebiigéle siin, ní bàpɔlɔ nibin, ní yɛ̀ʔɛlɛ nibin nibin bàpiigéle kɔrɔsiin wòlo sáriga-sórigoo Yawe ma, ti pye tɛɛlɛ fun.

¹² Náapɛɛlɛ o náapɛɛlɛ sáriga yakanʔa a pye míivɔɔnimɔ cúlobéle kpanjɛrɛ, bee ni pe a sìnmɛ nyáʔami lè, bàpɔw sáriga yakanʔa si pye míivɔɔnimɔ cúlobéle kɔrɔni, bee pe a nyáʔami sìnmɛ ni lè,

¹³ bàpile o bàpile sáriga yakanʔa si pye míivɔɔnimɔ cúlobéle taanri, bee ni pe a sìnmɛ nyáʔami lè. Sáriga-sórigoo wii, wee náagi sórogi ni kwóo lè á wi núngi Yawe dɛ́nɛ.

¹⁴ Náapɛɛlɛ o náapɛɛlɛ yakanʔa a pye sáriga-yólogoo duvɛɛn lítiribéle taanri, bàpɔlɔ wógi si pye lítiribéle siin, bàpile wógi si pye lítiri nibin ní tíla. Yeʔe o yeʔe cânzelige sáriga-sórigow wi nyɛ wee bee yɛ́ɛli fúngo ni.

¹⁵ Sikepɔlɔ nibin a wòlo sáriga Yawe ma kapeeli kéele na, bi fàra bàngwɔɔ sáriga-sórigow, ní sáriga-yólogow na.

d) Sɔ̀lɔ-mí-yaʔali séri wóo kéele

¹⁶ « ‹Yɛ́ɛli yézelige, ki canya kɛɛ ní sicɛrɛ wógi a pye Yawe Sɔ̀lɔ-mí-yaʔali séri.

¹⁷ Yégi bee canya kɛɛ ní kagunɔ wógi a pye séri canʔa. Levé fun búruw a ra líi canya kɔrɔsiin fúngo ni.

¹⁸ Cânzeligi a pye kpóʔorojànna yele ma, yele a kɔ́ canʔa o canʔa fáliwaa faala kpéʔele í.

¹⁹ Yele a ba sáriga-sórigow wòlo Yawe ma, wee náagi sórogi ni kwóo lè. Wi a pye náapebiigéle siin, ní bàpɔlɔ nibin, ní yɛ̀ʔɛlɛ nibin nibin bàpiigéle kɔrɔsiin, ti pye tɛɛlɛ fun.

²⁰ Ke yakaangi a pye míivɔɔnimɔ, bee ni pe a sìnmɛ nyáʔami lè. Náapɛɛlɛ wógi a pye míivɔɔnimɔ cúlobéle kpanjɛrɛ, bàpɔlɔ wómi si pye cúlobéle kɔrɔni.

²¹ Yɛ̀ʔɛlɛ nibin nibin bàpiigèle kɔrɔsiin wómɔ si pye làa nibin cúlobéle taanri.

²² Yele a sikepɔlɔ nibin wòlo sáriga kapeeli kéele na jàngó yele kapeegèle kùsulugo fáli í kpéʔele.

²³ Yele a ra sárigaw bee wóo bi fàra nyɛ̀ʔɛ nyɔ́ɔ o nyɛ̀ʔɛ nyɔ́ɔ sáriga-sórigow na, woro wi a pye bàngwɔɔ sáriga-sórigow.

²⁴ Yele a ra wee bee wóo canʔa o canʔa cányi kɔrɔsiin fúngo ni, wi pye sáriga lìile, wee náagi sórogi ni kwóo lè á wi núngi Yawe dɛ́nɛ. Wi a ra wóo bi fàra bàngwɔɔ sáriga-sórigow, ní sáriga-yólogow na.

²⁵ Canya kɔrɔsiin wógi a pye kpóʔorojànna yele ma, yele a kɔ́ canʔa o canʔa fáliwaa faala kpéʔele í.

e) Yaliiseliri séri wóo

²⁶ « ‹Yaliiseliri séri canʔa na, yele ga ni yaliifɔnri míimɛ sáriga wóo Yawe ma yele cégboogèle séri na, ki a pye kpóʔorojànna yele ma, yele a kɔ́ canʔa o canʔa fáliwaa faala kpéʔele í.

²⁷ Yele a ba sáriga-sórigoo wòlo, wee núngo gi Yawe dɛ́nɛ lè, wi a pye náapebiigéle siin, ní bàpɔlɔ nibin, ní yɛ̀ʔɛlɛ nibin nibin bàpiigéle kɔrɔsiin.

²⁸ Míimi yakanʔa ni pe a sǐnmi nyáʔami bi pínɛ wòlo ní yaweegèle bee ní lè, náapɛɛlɛ o náapɛɛlɛ wómɔ a pye míivɔɔnimɔ cúlobéle kpanjɛrɛ, bàpɔw wómɔ si pye cúlobéle kɔrɔni.

²⁹ Yɛ̀ʔɛlɛ nibin nibin bàpiigèle kɔrɔsiin wómɔ si pye, làa nibin cúlobéle taanri.

³⁰ Yele a sikepɔlɔ nibin wòlo sáriga jàngó yele kapeegèle kùsulugo fáli í kpéʔele.

³¹ Yele a ba sárigaw bee wòlo bi fàra bàngwɔɔ sáriga-sórigow, ní wi míimi yakanʔa, ní wi sáriga-yólogow na. Sárigaw bee yaweegéle a pye tɛɛlɛ fun wòʔolo.