Córolo 25 - Cebaara Bible 2010

Isirayɛli ye n jée yasunzunri ni

¹ A Isirayɛli ye tɛ́ɛn Syitimi ni, a be fala ni kálagimi kpéʔele ní Mowabi cébèle ní.

² A cébèle bee i be yiri ni syée poro kolocɔlɔbèle sáriga tɛ́ɛyɛ ma. A Isirayɛli syɛ́ɛnbèle i líi ní i tíri ni tuun bele bee kolocɔlɔbèlē taana.

³ A Isirayɛli ye pínɛ ní Baali-Peyɔɔri ní. A Yawe fúngi tanʔa Isirayɛli ye kurugo gbanʔama.

⁴ A Yawe gi joo Mowizi ma níì wi pye: «Syɛ́ɛnbèle kùndigibéle myɛ cò mi cɔ̀rɔ Yawe yɛ́ʔɛ ma, cángi na, koro ga pye Yawe fundanʔagbɔɔri í lúru Isirayɛli kurugo.»

⁵ A Mowizi gi joo Isirayɛli kútiijoobèle ma níì be pye: «Yele myɛ nibin nibin n yɛlɛ bi ye syɛ̀ɛnnɛ kpóo, poro bele be pínɛ ní Baali-Peyɔɔri ní lè.»

⁶ Wéle, a Isirayɛli ye nànwaa kàri n pan ní Madyan ye céwaa ní wi senyɛnbèle tɛ́ʔɛ ma, Mowizi, ní Isirayɛli syɛ́ɛnmi myɛ nyɛ́nɛ na, lǎli ni be pye ni nyaan lè Syɛ́ɛnmi Tɛɛfaraga fànikpaʔa kpaaweele na.

⁷ Amɛɛ Fineyasi gee bee nyaa lè wi lè Eleyazari jáaw, ní i nyɛ sáriga-wòlow Aarɔn pìinyanbiige, a woro yìri n yiri syɛ́ɛnmi nínge ni n kári ní tàbaa ní wi kɔ́gi ni.

⁸ A wi kári Isirayɛli ye nǎnw kurugo n sáà jée wi fànikpaagi ni n sáà tàbaaw tɛ́ʔɛ n Isirayɛli ye nǎnw, ní céw bee súu n fùru vanabèle ni pe myɛ siinw. Kánmi bee na káfalagi yáama láʔa Isirayɛli ye na.

⁹ Syɛ́ɛnmi bi kùu káfalagi yáama báriga ni lè, pi n pye sirakama ní selebingéle siin.

¹⁰ A Yawe gi joo Mowizi ma níì jo:

¹¹ «Fineyasi wi lè Eleyazari jáaw, ní i nyɛ sáriga-wòlow Aarɔn pìinyanbiigi, woro n mii fundanʔari láʔa Isirayɛli ye na. Níì cán mii yejaagi félege maa yìri wi ma, koro na mii ga Isirayɛli ye kálagi n kwɔ́ɔ mii yejaagi báriga ni í,

¹² koro na mɔ a gi joo wi ma si wi pye mii n jo mii a mii joogaanni kpéʔele wi ma li lè yɛɛ̀nyingi wólo.

¹³ Gee bee a pye woro ní wi yòdaʔayi ma naa wi kàdoʔo ma bàngwɔɔ sáriga-wòloro fáli joogaanna, níì cán yejaʔa maa pye wi ni wi Kolocɔlɔw kéele na, a wi Isirayɛli yòdaʔagi wòolo kapeegéle kusulugo fáli kpéʔele.»

¹⁴ Isirayɛli ye nǎnwee be pínɛ n kpóo ní Madyan ye céw ní lè, pe maa ni wi yiri Zimirii, wi lè Salu jáaw. Salu maa pye wi tofɔlɛɛyi narigbaaya kundigiwaa Simeyɔn yòdaʔayi ni.

¹⁵ Madyan ye céw be kpóo lè, pe maa ni wi yiri Kozibii, wi lè Suuri jáaw. Suuri maa pye wi tofɔlɛɛyi narigbaaya kundigiwaa Madyan ni.

¹⁶ A Yawe gi joo Mowizi ma níì jo:

¹⁷ «Ye too Madyan ye na, yaa be kpúmɔn yaa kúu.

¹⁸ Níì cán pe n pye yele nigoolo n námaraw kpéʔele n yele pùuni ní Peyɔɔri kéeli ní, n fàra Kozibii kéeli na, wi pye lè Madyan ye kùndigiwaa jáa, wi lè pe senyɛnjew, wee be kpóo lè káfalagi yáama lala ni, bee bi pye lè Peyɔɔri kéeli na.»

Isirayɛli syɛɛnfeleyi córoziin wólo

¹⁹ Káfalaga yáami bee sɔ̀lɔgwɔɔlɔ kàdoʔo ma,