Córolo 24 - Cebaara Bible 2010

¹ A Balaami ga gi nyaa àmɛɛ gi Yawe dɛ́nɛ bi dùba taʔa Isirayɛli na lè, wi ga níì wiyɛɛ fáaga bi kári sa yíbege kpéʔele àmɛɛ tɔzeliyee nyɛ lè í, kàjáa a wi wi yɛ́ɛgi wáa fìími tára kabaan ma.

² A Balaami wi yɛ́ɛgi yìrige n wéle n Isirayɛli ye nyaa wodɛ́ɛnbéle ní n yɛlɛ ní be syɛɛnfeleyi ní. A Kolocɔlɔɔ Pǐli tìgi n tɛ́ɛn wi na.

³ A Balaami wi kpokala-jóomi joo níì jo: «Beyɔɔri jáaw Balaami syɛ́ɛnri, Nǎnwee nyapile li kérigèle nyaagi lè, woro syɛ́ɛnri.

⁴ Wee wi Kolocɔlɔɔ syɛ́ɛnri lúro lè, wee wi Séew Myɛ Kàfɔlɔ nyaagi lè yanyaʔa ni, wee wi tuun ni cíbele lè wi nyapiigèle si i nyɛ womúgugéle ní, woro syɛ́ɛnri.

⁵ Ee Zyakɔbi, mɔ fanikpaayi n tɔ̀nɔ n nyɔɔ. Mɔ tɛɛkòroyi, ee Isirayɛli!

⁶ Yi n càmi àmɛɛ lòcoologo nyɛ lè, àmɛɛ cábiga nyɔ́ɔ nángwɔɔbéle nyɛ lè, àmɛɛ alowɛsi tíiye nyɛ, yee Yawe cɔ́rɔ lè, àmɛɛ lɔ̀ʔɔ nyɔ́ɔ sɛdiri tíire nyɛ lè.

⁷ Lɔ̀ʔɔ i fóo ni yirigi wi lóyi ni, a wi lùguri sámaga n fɔɔn. Wi fànʔafɔw i yìrigí n sɔ̀lɔ Agagi na. Wi fǎngi n baa kpɔ́ʔɔ.

⁸ Kolocɔlɔɔ n wi yirige Ezyipiti ni. Wi i nyɛ wi ma àmɛɛ senɔ́ɔ fànʔa nyɛ lè. Wi i syɛɛnfeleyi káa, yi lè wi kàsiitun-nyɛ́nbèle. Wi i be kaceleyi kabagi, ní i be kpèé ní wi wɛ̀ɛ́gèle ní.

⁹ Wi i simana, wi i sìnɛ́ àmɛɛ càarabɔlɔ nyɛ lè, ní àmɛɛ càarajaa nyɛ lè, wìí wi a gbǎn wi yìrige? Syɔ́ɔnwee wi dùba kpéʔele mɔ ma lè, ki n yɛlɛ wee bee í pye dùba pyà. Wee si wi mɔ dángi lè, ki n yɛlɛ wee bee í dánga.»

¹⁰ A Balaki fúngi tanʔa gbanʔama Balaami kurugo, a wi kadaagèle kóri keyɛɛ na níì Balaami pye: «Mii n mɔ yeri mɔ í ba mii nigoobèle dánga, mi si wéle, mɔ n dùbaw kpéʔele n kwɔ́ɔ be ma tɔlɔyɔ taanri.

¹¹ Tɔ́ɔliw ni sɔ̀lɔ maa fé maa syée mɔ kaʔa ma! Mii maa jo mii a mɔ kpɔ́ʔɔ, Yawe si n mɔ bɔ̀nɔ di taali ni.»

Balaami n Isirayɛli nyɛ̀ʔɛnaw nìjanra kéele joo n tɛ̀ɛn

¹² A Balaami Balaki yari: «Tundunbèle mɔ da tun mii ma lè mii da gi joo be ma níì jo:

¹³ ‹Alí Balaki ga wi kpáagi nyìn wálifiiw, ní tɛ́ɛw na n kaan mii ma, mii a gbǎn Yawe syɛ́ɛnri kána í, dee wi joo n gbàn lè bi yarigaa faala kpéʔele í, wojanga yoo, wobeʔe yoo, fwɔɔ gee Yawe ga joo lè ì?›

¹⁴ Tɔ́ɔliw ni doò, mii wi syée wee mii syɛ́ɛnbèle ma, gee si syɛ́ɛnbèle naa a ba kpéʔele mɔ syɛ́ɛnbèle na lè cányee ni yi maa lè, da maa, mii a ba gi joo tɛ̀ɛn mɔ na.»

¹⁵ A Balaami wi kpokala-jóomi joo níì jo: «Beyɔɔri jáaw Balaami syɛ́ɛnri, Nǎnwee nyapile li kérigèle nyaagi lè, woro syɛ́ɛnri.

¹⁶ Woro wee wi tuun ni cíbele lè, wi nyapiigèle si i nyɛ womúgugéle ní, woro syɛ́ɛnri. Wee wi Kolocɔlɔɔ syɛ́ɛnri lúro lè, wi nyɛ lè Pe Myɛ Nyúngo na, wi n woro katimanagèle cán, ní wɔ́ɔ i Séew Myɛ Kàfɔlɔ nyaagi yanyaʔa ni.

¹⁷ Mii i gi nyaagi, kàjáa tɔ́ɔliw kéele ban í. Mii i gi sámagi ni wéle, kàjáa ki ga nùuni naa í. Ŋɔripile i yirigi Zyakɔbi ni. Fǎngi kàgbeele i yìrigí Isirayɛli ni. Li i Mowabi bɛ̀ɛ́nyi ǹjoʔo ma kpúmɔn, ní i Sɛti yòdaʔayi myɛ kpúmɔn ni cáan.

¹⁸ Wi n Edɔmi syɔɔ n taa. Wi n Seyiiri ye syɔɔ n taa pe lè wi nigoobèle. Isirayɛli n nyìn fǎngi na.

¹⁹ Wee wi yiri Zyakɔbi ni lè, wi i nyɛ fǎngi na. Kěyi syɛɛnsanbèlē be kòro lè, wi i bele bee kúu.»

Balaami i Isirayɛli nigoobèle kálagila kéele nyuu

²⁰ A Balaami Amalɛki wéle níì wi kpokala-jóomi joo níì jo: «Amalɛki i nyɛ syɛɛnfeleyi wózelige. Kàjáa gi kwɔ́ɔmi na wi a ba kálagi.»

²¹ A wi Kenii syɛ́ɛnbèle wéle níì wi kpokala-jóomi joo níì jo: «Mɔ tɛɛ̀tɛnɛgi n sámaga n yére. Mɔ zyaari i nyɛ fálagi ǹjoʔo ni.

²² Kàjáa Kenii a sógi, bi taa lǎli ni Asuuri ye a ba mɔ cò bi kári lè.»

²³ A Balaami wi kpokala-jóomi joo níì jo: «Acaa! Lǎli ni Kolocɔlɔɔ ga gee bee kpéʔele lè, wìí wi a kòro sìi na?

²⁴ Kàjáa bàtobéle a yìri Kitiimi ma bi pan. Pe a ba Asuuri kùru bi wɔ́ɔ Hebɛɛri kùru. Woro tiimaa si wɔ́ɔ kálagi.»

²⁵ A Balaami yìri n lúru n kári wi kàʔa ma. A Balaki wɔ́ɔ̀ fala wi kàbangáriga na.