Córolo 20 - Cebaara Bible 2010

Meriba lógi kéele

¹ A Isirayɛli syɛ́ɛnmi myɛ nan Sɛn fìími tára na yɛ́ɛli yézelige na. A syɛ́ɛnmi tɛ́ɛn Kadɛsyi ni. A Miriyami kùu yaà beè, a be wi tɔ́n nɛɛ bee.

² Lɔ̀ʔɔ ga taa syɛ́ɛnmi ma í, a be peyɛɛ gbóʔoro Mowizi, ní Aarɔn kánmi na.

³ A syɛ́ɛnbèle kàsii cò ní Mowizi ní níì jo: «Lǎli ni wolo senyɛnbèle kùu Yawe yɛ́ʔɛ ma lè, wolo maa yɛlɛ bi dée pínɛ kùu ní be ní !

⁴ Nyàʔá na yele Yawe syɛ́ɛnbèle kɔ́ri n pan fìimɛ tári naa ma, koro ga pye wolo ní wolo yaweeri í ba kùu naa?

⁵ Nyàʔá na yele wolo kɔ́ri n yirige Ezyipiti ni n pan ní wolo ní tɛɛpeegi naa ma ? Ki o nyɛ syɔɔn í gbǎn lùguro lùgu naa í, děsyaantiige wàlá ɛrɛzɛn tírige, wàlá girenadi tíige o naa í. Alí lògbaʔa a taa naa í.»

⁶ A Mowizi ní Aarɔn núngo syɛ́ɛnmi taana n kári syɛ́ɛnmi tɛɛfaraga fànikpaʔa kpaaweele ma n sáà too n yɛ́ɛyi cíbele tári na. A Yawe nìjangbɔɔri tiyɛɛ dɛ̀ɛn be na.

⁷ A Yawe gi joo Mowizi ma níì jo:

⁸ «Kàgbeeli láa, mi syɛ́ɛnmi kpóʔoro, mɔ ní mɔ yɛʔɛfɔw Aarɔn ní. Yele a sa joo ní fálagi ní pe nyɛnɛ na, ki a gi lǒgi kaan. Mɔ a fálagi lògaa yirige be ma, mɔ a syɛ́ɛnmi ní yaweeri kaan di gbaa.»

⁹ A Mowizi kàgbeeli láa li da pye lè Yawe yɛ́ʔɛ ma n yɛlɛ ní gi ní àmɛɛ Yawe da gi joo n gbàn wi ma lè.

¹⁰ A Mowizi ní Aarɔn syɛ́ɛnmi yeri n kpóʔoro fálagi yɛ́ʔɛ ma ní baa gi joo be ma níì jo: «Ki n yɛlɛ ye lóʔo yele niceebèle, wolo í lɔ̀ʔɔ yirige lé fálagi naa ni yele ma ?»

¹¹ A Mowizi kɔ́gi yìrige n fálagi kpúmɔn ní wi kàgbeeli ní tɔlɔyɔ siin. A lònɛʔɛgɛ yiri, a syɛ́ɛnmi gbaa, n fàra yaweeri na wɔ́ɔgēle.

¹² Lǎli bee ni a Yawe gi joo Mowizi ní Aarɔn ma níì jo: «Amɛɛ gi nyɛ lè yele ga tága mii na n mii tɛ̀ɛn wojaɔn ní Isirayɛli ye nyɛ́nɛ na í, yele ban ye a syɛ́ɛnmi naa lége tári ni, dee mii joo mii a kaan bi ma lè í.»

¹³ Meriba lóyi yii, tɛ́ɛgee ni Isirayɛli ye da kàsii cò ní Yawe ní lè, á wi wiyɛɛ dɛ̀ɛn be níngi ni wojaɔn ní.

Edɔmi fànʔafɔw ga fɔ̀lɔ Isirayɛli ye í foro woro tári ni í

¹⁴ N Mowizi yaʔa Kadɛsyi ni a wi tundunbéle tun Edɔmi fànʔafɔw ma níì jo: «Mɔ senyɛnw wi lè Isirayɛli, woro wi jo: ‹Wɔʔɔyee myɛ yi nan wolo na lè, mɔ n yi cán.

¹⁵ Wolo tóolɛɛbèle maa tìgi Ezyipiti ma. A wolo sáà tɛ́ɛn Ezyipiti ni n mɔn yaà. A Ezyipiti ye si kɔ́ baa wolo cò kanbeemɛ ni, wolo ní wolo tóolɛɛbèle.

¹⁶ A wolo si yákpogèle wáa Yawe kurugo, a wi wolo yákpogèle lóʔo, níì nyɛ̀ʔɛni tundunwaa tun a wi baa wolo yirige Ezyipiti ni. Wolo si wo nan bele Kadɛsyi na, kěgi gi nyɛ lè mɔ tásaligi láʔagologo na.

¹⁷ Wolo i caa bi foro mɔ tári ni. Wolo a jée séyi wàlá ɛrɛzɛn séyi ni í. Wolo a kɔ̀lɔ́bèle lògaa gbaa í. Wolo a sɔ̀lɔ fànʔafɔw kógbɔʔɔ ni bi kári, wolo a wàli kàliige, wàlá kàmɔnɔ ma í, fwɔɔ bi taa wolo í foro mɔ tári ni.› »

¹⁸ A Edɔmi wi yari: «Mɔ a foro mii tári ni í. Mɔ ga kíri níì koro pye, mii a yiri bi mɔ fàra ní ŋɔséew ní.»

¹⁹ A Isirayɛli ye wi pye: «Kogbɔɔgi ni wolo a sɔ̀lɔ. Mii ní mii yaweeri ga mɔ logaa gbaa, mii a gi sàra. Ki yaʔa mii í sɔ̀lɔ tɔ́lɔyi na yagana.»

²⁰ A wi wi yari: «Mɔ a sɔ̀lɔ í!» A Edɔmi ye fala ni be fàrá ní syɛɛnnɛʔɛmɛ, ní fànnɛʔɛgɛ ní.

²¹ Kánmi bee na Edɔmi cée, wi ga fɔ̀lɔ Isirayɛli í foro woro tári ni í. A Isirayɛli láʔa wi na.

Aarɔn kùúw kéele

²² A Isirayɛli syɛ́ɛnmi myɛ yìri Kadɛsyi ni n kári n sáà nan Hɔri nyanbelegi na.

²³ A Yawe gi joo Mowizi ní Aarɔn ma Hɔri nyanbelegi taana Edɔmi tári láʔagologo na níì jo:

²⁴ «Aarɔn a kùu bi kári wi syɛ́ɛnbèle kurugo. Níì cán tári mii kaan Isirayɛli ye ma lè, wi a jée di ni í, ncan yele n sìnloʔomɔ kpéʔele Meriba lógi tɛ́ʔɛ ni mii tundunri kánma na.

²⁵ Aarɔn, ní wi jáaw Eleyazari kɔ́ri mi lúgu Hɔri nyanbelegi na,

²⁶ mí sa Aarɔn yaleri wòlo wi na mi le wi jáaw Eleyazari na. Nɛɛ bee pe a Aarɔn láa, beè wi a kùu.»

²⁷ A Mowizi gi kpéʔele àmɛɛ Yawe gi joo n gbàn lè. A be lúgu Hɔri nyanbelegi na syɛ́ɛnmi myɛ nyɛ́nɛ na.

²⁸ A Mowizi Aarɔn yaleri wòlo wi na n le wi jáaw Eleyazari na. A Aarɔn kùu yaà nyanbelegi ǹjoʔo ni, koro kàdoʔo ma a Mowizi ní Eleyazari tìgi nyanbelegi na.

²⁹ A syɛ́ɛnmi myɛ baa gi nyaa ncan Aarɔn n kùu, a Isirayɛli kpáagi wòolo myɛ Aarɔn kùúgi nyɛnigɛ kpéʔele canya toko ní kpɔrigɔ fúngo ni.