Córolo 19 - Cebaara Bible 2010

Nìcáa-nyɛ̀ɛngi cɔnʔɔ kéele

¹ A Yawe gi joo Mowizi ní Aarɔn ma níì jo:

² «Làlwawee Yawe télege lè, níì wi kéeli joo n gbàn, woro wi nyɛ wee naa, wi n jo: Ki joo Isirayɛli ye ma mí be pye paa maa ní tɛɛlɛ fun nìcáa-nyɛ̀nʔɛ ní mɔ ma, gee gi nyɔɔ n foro lè, zúu si ga kɔ́ɔ̀ taʔa gi na í.

³ Yele a ba gi le sáriga-wòlow Eleyazari kɔ́yi ni, wi a yiri ní gi ní tɛɛkòrogi kàdoʔo ma, pé sa gi kɔni wi yɛʔɛ̀ ma.

⁴ Sáriga-wòlow Eleyazari a nìcáagi sìsyaanwaa tàmi ní wi kabeli ní bi nyari nyari tɔlɔyɔ kɔrɔsiin Syɛ́ɛnmi Tɛɛfaraga fànikpaʔa yɛ́ʔɛ ma.

⁵ Pe a nɔ̀ɔ́w sórigo wi nyɛnɛ na. Pe a wi sáligi, ní wi káari, ní wi sìsyaanw, ní wi fíri sórigo.

⁶ Sáriga-wòlow a sɛdiri tiicerige, ní hizɔpi wára, ní yanyɛɛngi láa bi wáa naanyǐngi nínge ni, gee ni nɔ̀ɔ́w sóori lè.

⁷ Koro kàdoʔo ma sáriga-wòlow a wi búroyi jée si wéli lɔ̀ʔɔ ni, gee bee kàdoʔo ma wi a lúru jée tɛɛkòrogi ni. Kàjáa sáriga-wòlow a córo wonɔnʔɔɔ ní fwɔɔ bi taa ba nan cângwɔɔgi nyɔ́ɔ na.

⁸ Syɔ́ɔnwee wi nɔ̀ɔ́w sórigo lè, wi a wi búroyi jée si wéli lɔ̀ʔɔ ni, wi a córo wonɔnʔɔɔ ní fwɔɔ bi taa ba nan cângwɔɔgi nyɔ́ɔ na.

⁹ Nǎnwee wi ga pye lè nɔ́nʔɔrɔ fun, woro n yɛlɛ bi nɔ̀ɔ́w cɔ́nʔɔ koli bi sa tɛ́ʔɛ tɛɛkòrogi kàdoʔo ma tɛɛcàngaa ni. Pe a gi kɔn Isirayɛli ye syɛ́ɛnmi kéele na jàngó bi gi pye nɔ́nʔɔri láʔala lɔʔɔ, kapeegèle kùsulugo sáriga wii.

¹⁰ Wee wi ga nɔ̀ɔ́w cɔ́nʔɔ koli lè, wi a wi búroyi jée, si córo wonɔnʔɔɔ ní fwɔɔ bi taa ba nan cângwɔɔgi nyɔ́ɔ na. Gee bee a pye bàngwɔɔ làlwa kéele Isirayɛli ye, ní nibɔnbèle ma pe baa tɛ́ɛn ní be ní lè.

Làlwawaa jéemununi kéele na

¹¹ «Wee wi ga tánga kpóō na lè, gee bee n jo syɔɔn o syɔɔn kúcere na lè, wee bee a córo wonɔnʔɔɔ ní bi taa canya kɔrɔsiin.

¹² Wi a wiyɛɛ jée mùnu ní lǒgi bee ní, candaanri wógi, ní canya kɔrɔsiin wógi na, koro kàdoʔo ma wi a mùnú nyɔɔ. Kàjáa kapye wi ga wiyɛɛ jée n mùnu candaanri wógi, ní canya kɔrɔsiin wógi na í, wi a mùnú nyɔɔ í.

¹³ Syɔ́ɔnwee faala wi ga tánga kpóō na lè, gee bee n jo syɔɔn o syɔɔn kúcere na lè, wi si ga wiyɛɛ jée n mùnu í, wee bee n Yawe kpɔ̀ʔɔrɔli fànikpaʔa nɔ́nʔɔ. Pe a wee bee kwɔ́ɔ yirige Isirayɛli ni, ncan pe ga nɔ́nʔɔri láʔala logaa nyari nyari wi na í, wi a córo wonɔnʔɔɔ ní, wi nɔ́nʔɔri sèʔé i nyɛ wi na.

¹⁴ Syɔɔn ga kùu fànikpaʔa ni, wee naa wi nyɛ làlwaw kéeli bee na: Syɔ́ɔnwee faala wi ga jée lè fànikpaagi ni, ní syɔ́ɔnwee faala wi nyɛ gi ni lè, wi a córo wonɔnʔɔɔ ní bi taa canya kɔrɔsiin.

¹⁵ Yalegee faala ga nyaa lè yaà, yatɔndelege si o nyɛ gi na í, ki a córo wonɔnʔɔgɔ ní.

¹⁶ Bi syɔɔnwaa faala yaʔa sìnbirige ni, wi ga tánga ŋɔsée syɛɛnkpóō na, wàlá syɔɔnwaa na, wee wi kùu wiyɛɛ ma lè, wàlá syɔɔn kaceleye na, wàlá kɔ̀ɔnnɔ na, syɔ́ɔnw bee a córo wonɔnʔɔɔ ní bi taa canya kɔrɔsiin.

¹⁷ Pe a kapeeli sáriga yawee-sórigolo cɔ́ɔngaa láa bi pùnweele lɔ́ʔɔ le gi ni, yalegaa ni, syɛɛnnɔnʔɔw kéele na.

¹⁸ Syɛɛnmunuwaa a hizɔpi wára láa bi tàmi lǒgi ni bi tɛ́ʔɛ fànikpaagi nyari nyari. Si wɔ́ɔ yáriri myɛ, ní syɛ́ɛnbèle nyari nyari pe nyɛ lè gi ni. Syɔ́ɔnwee wi tánga lè syɔɔn kaceleye na, wàlá syɔɔnwaa na, wee be kpóo lè, wàlá wee wi kùu wiyɛɛ ma lè, wàlá kɔ̀ɔnnɔ na, pe a wɔ́ɔ ra bele bee nyari nyari ní gi ní.

¹⁹ Syɛɛnmunuw a nyari-nyarili kpéʔele syɛɛnnɔnʔɔw na candaanri wógi, ní canya kɔrɔsiin wógi na. Wi a wi jéemununi fáli kpéʔele canya kɔrɔsiin wógi na. Syɛɛnnɔnʔɔw a wi búroyi jée si wéli lɔ̀ʔɔ ni, wi a mùnú nyɔɔ cângwɔɔgi nyɔ́ɔ na.

²⁰ Syɔ́ɔnwee wi nɔ́nʔɔ lè kapye wi ga wiyɛɛ jée n mùnu í, pe a wi kwɔ́ɔ yirige syɛ́ɛnmi ni, níì cán wi n Yawe tɛɛcǎngi nɔ́nʔɔ. Amɛɛ gi nyɛ lè jéemununi lɔ̀ʔɔ ga nyari nyari wi na í, wi i nyɛ syɛɛnnɔnʔɔɔ.

²¹ Gee bee a pye be ma bàngwɔɔ làlwa kéele, wee wi ga nɔ́nʔɔri láʔala lɔʔɔ nyari nyari lè, wee bee a wi búroyi jée. Wee wi ga wɔ́ɔ̀ tánga nɔ́nʔɔri láʔala lɔʔɔ na lè, wee bee a córo wonɔnʔɔɔ ní fwɔɔ bi taa ba nan cângwɔɔgi nyɔ́ɔ na.

²² Yariga o yariga na syɛɛnnɔnʔɔw ga tánga lè, gee bee a nɔ́nʔɔ. Syɔ́ɔnwee wi ga tánga wi na lè, wee bee a córo wonɔnʔɔɔ ní bi taa ba nan cângwɔɔgi nyɔ́ɔ na.»