Córolo 18 - Cebaara Bible 2010

¹ A Yawe Aarɔn pye: «Mɔ ní mɔ jáabèle, ní mɔ tóow kpaʔa wóbèle ní, n fàra mɔ na, yele a ra kolomi myɛ túgoro tugu bee bi kpéʔele tɛɛcǎngi kéele na lè. Mɔ ní mɔ jáabèle a ra yele sáriga-wòlori fáli kolomɔ myɛ túgoro tugu.

² Mí wɔ́ɔ pan ní mɔ senyɛnbèle ní, pe lè Levii syɛɛnfelegi wòolo, pe lè mɔ tofɔdulugi wòolo, koro ga pye be pínɛ ní mɔ ní bàā báara mɔ ma, lǎli ni mɔ ní mɔ jáabèle ga pye lè fáliw na séeraw fànikpaʔa yɛ́ʔɛ ma.

³ Pe a ra lúro mɔ ma, si pye fànikpaagi fáli myɛ na. Kàjáa pe a kɔ́ nùuni tɛɛcǎngi yayigelere wàlá sáriga-wòlo-yafaangi na í, jàngó pe a kɔ́ kùu í, poro yoo, yele yoo.

⁴ Pe a pínɛ ní mɔ ní, si pye Syɛ́ɛnmi Tɛɛfaraga fànikpaʔa kɔrɔsiile fáli na, gee bee n jo fànikpaagi fáli myɛw. Syɔɔnwaa nikwɔɔ ga yɛlɛ bi nùuni yele na í.

⁵ Yele a ra tɛɛcǎngi kɔ̀rɔsíi si wɔ́ɔ ra sáriga-wòlo-yafaangi kɔ̀rɔsíi koro ga pye Yawe fundanʔari a kɔ́ folo yiri Isirayɛli ye kurugo í.

⁶ Wéle, yele senyɛnbèle be lè Levii ye, mii n be cò n yirige Isirayɛli ye níngi ni, pe n kaan Yawe ma, níì le yele kɔ́yi ni, yakanʔa, koro ga pye paa báara Syɛ́ɛnmi Tɛɛfaraga fànikpaʔa ni.

⁷ Mɔ ní mɔ jáabèle a yele sáriga-wòlori fáli cò, wee myɛ wi kàlifáa yele ma lè sáriga-wòlo-yafaangi kéele na, ní fànipariw màʔama yárira kéele na. Yele a ra fáliw bee kpéʔele. Yele sáriga-wòlori fáli i nyɛ faliwaa, wee mii kaan yele ma lè yakanʔa. Syɔɔnwaa nikwɔɔ ga nùuni yaà, pe a wi kpóo.»

Sáriga-wòlobèle lɛɛlɛ kéele

⁸ A Yawe gi joo Aarɔn ma níì wi pye: «Mii si na, wéle, yáriri be láʔala ni kaangi mii ma lè, mii n di kpaàweleri kaan mɔ ma. Dee myɛ Isirayɛli ye yaari kɔlɔ̀ na mii ma lè, mii n di kaan mɔ ní mɔ jáabèle ma di pye yele nyɛ́nɛ-wòloli yakanʔa. Gee bee a pye bàngwɔɔ làlwa kéele.

⁹ Dee ti a pye lè mɔ lɛɛli yakaan-càndeleri ni, dee ti a kòro lè sìnzorigo ni, toro di nyɛ dee naa: Isirayɛli ye yakaanyi myɛ, yi lè be míimi sáriga, ní be kapeegèle kùsulugo sáriga myɛw, ní be kolomi sáriga myɛw, dee bee myɛ a pye mɔ ní mɔ jáabèle lɛɛlɛ, ti i nyɛ yacandelere.

¹⁰ Mɔ a ra líi di na àmɛɛ di nyɛ lè yacandelere, nǎnbèle myɛ a ra líi di na. Ti a córo yacanra mɔ ma.

¹¹ Gee naa ní wɔ́ɔ i nyɛ mɔ wóʔo, koro gi nyɛ sáriga-yirigew Isirayɛli ye wóo be yakaanyi myɛ ni lè, n fàra gee myɛ na be kpéʔele lè sáriga-fíigeo. Mii n dee bee kaan mɔ ní mɔ nanbiigèle, ní mɔ calipiigèle ma n koro pye bàngwɔɔ làlwa kéele. Mɔ kpaʔa wówee faala wi ga pye lè fɔɔnrɔ fun, woro a lìi di na.

¹² Bee myɛ bi nyɛ lè sìnjǎnmi, ní wee myɛ wi nyɛ lè dùvɛɛnfɔnw wojaɔn, ní bilew wojaɔn, yaliiseliri bee pe ba ni kaangi Yawe ma lè, mii n toro myɛ kaan mɔ ma.

¹³ Pe tári yaliiselire ní pe a ra maa bi ba ra kaangi Yawe ma lè, dee bee a pye mɔ wóro, mɔ kpaʔa wówee faala wi ga pye lè fɔɔnrɔ fun, woro a lìi di na.

¹⁴ Yáriri myɛ ti a yaʔa lè péw Kolocɔlɔɔ ma, Isirayɛli ni, toro a pye mɔ wóro.

¹⁵ Cere yalee piiselio pe a kaan Yawe ma lè, syɔɔn yoo, yaweʔe yoo, wi a pye mɔ wóo. Koro ní ki myɛ ní, ki n yɛlɛ mɔ í da syɔɔn piiseliw nyùnzyɔɔrɔ kpéʔele, mí wɔ́ɔ maa yawee-nɔ́nʔɔgèle pìiselibéle nyunzyɔɔrɔ kpéʔele.

¹⁶ Nànbile nyùnzyɔɔ-wáliw a pye, bi séli yeʔe nibin wóbèle na, wálifiio támabéle kagunɔ, tɛɛcǎngi wáli na, bi yɛlɛ ní gee ní mɔ ga tímana lè. Támaw bee wàa nibin líbeganma i nyɛ gerabéle toko.

¹⁷ Kàjáa mɔ a kɔ́ nyùnzyɔɔ-wáli syɔɔ nɔ̀ɔ pìiselio, wàlá byà pìiselio, wàlá sikaà pìiselio kéele na í. Níì cán pe i nyɛ yacanya. Mɔ a ra be sìsyaanw ŋuu sáriga-wòlo-yafaangi na, sáā be sǐnmi sórogi. Sáriga wii, wee náagi sórogi ni kwóo lè á wi núngi Yawe dɛ́nɛ.

¹⁸ Be káari a pye mɔ wóro àmɛɛ fìcibigi nyɛ, gee be fíigi lè, ní àmɛɛ kàliige céeli nyɛ lè.

¹⁹ Dee myɛ Isirayɛli ye yirigi lè ni kaangi Yawe ma yakaanjǎnri ni, mii n dee bee kaan mɔ ní mɔ piibèle ma pe lè nǎnbèle, ní cébèle, bàngwɔɔ joogaanna lii mɔ ní mɔ yodaʔayi ma, lee li a kòro beè lè Yawe yɛ́ʔɛ ma làla o làla.»

²⁰ A Yawe gi joo Aarɔn ma níì wi pye: «Mɔ a kɔrigɔ taa be tári ni í. Lɛɛlɛ a pye mɔ ma pe níngi ni í. Mii wi nyɛ mɔ lɛɛli, ní mɔ kɔ́rigi Isirayɛli ye níngi ni.

Gee gi lè Levii ye wógi

²¹ «Yáʔawee myɛ wi wóo Isirayɛli ni lè, mii n wee bee kaan Levii pìíbèle ma wi pye be kɔ́rigi, fáliw be kpéʔele Syɛ́ɛnmi Tɛɛfaraga fànikpaʔa ni lè, woro sàraw wii.

²² Isirayɛli ye a ní nùuni Syɛ́ɛnmi Tɛɛfaraga fànikpaʔa na í, jàngó pe a kɔ́ kapeele taʔa peyɛɛ na si kùu í.

²³ Levii ye a ra Syɛ́ɛnmi Tɛɛfaraga fànikpaʔa fáli kpéʔele, sáā be kolomi túgoro tugu. Gee bee a pye bàngwɔɔ làlwa kéele yele yìrigèle myɛ syɛ̀ɛnnɛ ma. Pe a kɔrigɔ taa Isirayɛli ye níngi ni í.

²⁴ Yáʔawee Isirayɛli ye a ra wóo lè bàā kaangi Yawe ma, mii n wi kaan Levii ye ma wi pye be kɔrigɔ. Koro na mii jo pe a kɔrigɔ taa Isirayɛli ye níngi ni í.»

²⁵ A Yawe gi joo Mowizi ma níì jo:

²⁶ «Ki joo Levii ye ma mí be pye: ‹Isirayɛli ye yáʔawee mii kaan yele ma lè, wi pye yele kɔ́rigi, lǎli ni yele ga wi taa lè, ki n yɛlɛ ye yáʔawaa wòlo yáʔaw bee ni ye kaan Yawe ma yakanʔa.

²⁷ Yele woyirigegi a córo yele ma àmɛɛ kàsyɔɔgi yaliire woyirigege nyɛ lè, ní àmɛɛ ɛrɛzɛn lógi yalenyɛyɛ woyirigege nyɛ lè.

²⁸ Kánmi bee na yele a wɔ́ɔ ra yakanʔa yirigi yáʔaw myɛ ni yele taagi Isirayɛli ye ma lè. Yakaanyi yele a ra wóo bàā kaangi Yawe ma lè, yele a ra yee bee kaangi Aarɔn ma wi lè sáriga-wòlow.

²⁹ Yakaanyee myɛ yi ga kaan yele ma lè, yaa yakaanya wóo yee bee myɛ nibin nibin ni yaa kaangi Yawe ma. Gee yele a yaʔa kɔlɔ̀ na Kolocɔlɔɔ ma lè, ye gi yirige lɛɛjanni ni.›

³⁰ Ki joo be ma mí be pye: ‹Yele ga ni ki wojangi yirigi lǎlee ni lè, ki yáʔaw a córo Levii ye ma àmɛɛ kàsyɔɔgi yaliire woyirigege, ní ɛrɛzɛn lógi yalege woyirigege nyɛ lè.

³¹ Yele ní yele kpaʔa wóbèle a ra gi líi tɛɛgaa faala ni. Níì cán fáliw yele kpéʔele Syɛ́ɛnmi Tɛɛfaraga fànikpaʔa ni lè, koro sàraw wii.

³² Yele ga ki wojangi yirige lǎli ni lè, kapeele faala a pye yele na kéeli bee na í. Yele a kɔ́ ra Isirayɛli ye yakaanjǎnyi nɔ́ɔnri í, jàngó yele a kɔ́ kùu í.› »