Córolo 17 - Cebaara Bible 2010

Kore kabigi wòolo naànigaɔn yalegéle kéele

¹ A Yawe gi joo Mowizi ma níì jo:

² «Ki joo Eleyazari ma, wi lè sáriga-wòlow Aarɔn jáaw, mí wi pye wi naàniganw yalegéle yirige náagi ni, wí náagi wo léelige, níì cán ke i nyɛ yacanya.

³ Syɛ́ɛnbèle bee be kapeeli pye n bɔ̀nɔ be sìíw ni lè, ki n yɛlɛ mi be naàniganw yalegéle sámaga yafabi-fabiya maa sáriga-wòlo-yafaangi tɔ́ngi. Níì cán pe n pan ní ge ní Yawe yɛ́ʔɛ ma, koro na ke i nyɛ yacanya. Ke a pye fɛ̀ɛ Isirayɛli ye ma.»

⁴ Bele náagi sórigo n kpóo lè, pe naàniganw yalegéle ge pye lè kanyɛɛnrɛ wòʔolo, koro gele ní pe da pan lè a sáriga-wòlow Eleyazari ge láa n sámaga yafabi-fabiya n pye sáriga-wòlo-yafaangi yatɔngɔ.

⁵ A koro pye Isirayɛli ye ma sɔ̀ngudaara yáriga, jàngó syɔ́ɔnwee faala wi lè wi o nyɛ Aarɔn yòdaʔagaa í, wi a kɔ́ nùuni bi nùndaanni yáriga wòlo sáriga Yawe yɛ́ʔɛ ma í, si kɔ́ pye àmɛɛ Kore ní wi kabigi wòolo pye lè í, bi yɛlɛ ní gi ní àmɛɛ Yawe da gi joo lè Mowizi nyɔ́ɔgi ni.

Syɛ́ɛnmi i Mowizi ní Aarɔn sànʔá

⁶ Koro nyǐndaligi na a Isirayɛli syɛ́ɛnmi myɛ i Mowizi ní Aarɔn sànʔá níì jo: «Yele ye Yawe syɛ́ɛnbèle kaan a be kùu.»

⁷ Amɛɛ si syɛ́ɛnmi piyɛɛ gbóʔoro Mowizi, ní Aarɔn kánmi na lè, a pe ga be yɛ́ɛyi fíige Syɛ́ɛnmi Tɛɛfaraga fànikpaʔa kabaan na, wéle, a fàfaangi gi tɔ́n, a Yawe nìjangbɔɔri tiyɛɛ dɛ̀ɛn.

⁸ A Mowizi ní Aarɔn sáà nan Syɛ́ɛnmi Tɛɛfaraga fànikpaʔa yɛ́ʔɛ ma.

⁹ A Yawe gi joo Mowizi ma níì jo:

¹⁰ «Ye yiri syɛ́ɛnmi naa nínge ni mii si bi kálagi kwɔ́ɔ làla nibin ni.» A be too n yɛ́ɛyi cíbele tári na.

¹¹ A Mowizi gi joo Aarɔn ma níì jo: «Naàniganw yalele láa mi naagaa wòlo sáriga-wòlo-yafaangi ni mi le li ni, mí nùndaanni yáriga taʔa yaà, mi kári kelekele ní li ní syɛ́ɛnmi ma mi sa bi kapeegèle kùsulugo fáli kpéʔele. Níì cán Yawe fundanʔagbɔɔri n folo n yiri. Káfalagi yáama n séli.»

¹² A Aarɔn naàniganw yalele láa àmɛɛ Mowizi gi joo lè n fàn n kári n sáà jée syɛ́ɛnmi nínge ni. Wéle káfalagi yáama maa séli n kwɔ́ɔ syɛ́ɛnbèle nínge ni. A wi nùndaanni yáriga wòlo sáriga n syɛ́ɛnbèle kapeele kusulugo fáli kpéʔele.

¹³ A wi sáà yére kúbèle ní niweebèle nínge ni, a káfalagi yáama yére.

¹⁴ Syɛ́ɛnbèle bele nyɔ́ɔ káfalagi yáama kpóo lè, pe n pye selebingéle kɔrɔsiin ní saala taanri ní dabata. Bele be kùu Kore kéeli na lè, poro ga córo n le yaà í.

¹⁵ A Aarɔn lúru n pan Mowizi ma Syɛ́ɛnmi Tɛɛfaraga fànikpaʔa kpaaweele ma. Koro n gi taa káfalagi yáama maa kwɔ́ɔ.

Aarɔn kagbeeli kéele

¹⁶ A Yawe gi joo Mowizi ma níì jo:

¹⁷ «Ki joo Isirayɛli ye ma, mí be pye pe kùndigibèle myɛ nibin nibin í kàgbeegēle kaan mɔ ma bi yɛlɛ ní be narigbaayi ní, ke a pye kàgbeegēle kɛɛ ní siin. Mí pe myɛ nibin nibin mɛ́ɛyɛ sɛ́bɛ pe kàgbeegèle na.

¹⁸ Mɔ a Aarɔn mɛ́ɛgi sɛ́bɛ Levii kàgbeeli na. Níì cán kùndigibèle myɛ nibin nibin a pye ní be narigbaaya kagbeegéle ní.

¹⁹ Mí sa ge tɛ́ʔɛ Syɛ́ɛnmi Tɛɛfaraga fànikpaʔa ni, séeraw kásu yɛ́ʔɛ ma, beè mii yele fàrá lè.

²⁰ Nǎnwee kàgbeele li ga fùn lè, woro mii nyɛ́nɛ n wòlo. Sànʔaree na Isirayɛli ye yele sànʔá lè, si dee bee kwɔ́ɔ niyɛɛ yɛ́ʔɛ ma.»

²¹ A Mowizi joo ní Isirayɛli ye ní, a be kùndigibèle myɛ baa kàgbeegèle kaan wi ma. Kùndigi o kùndigi ní wi kàgbeele, n yɛlɛ ní be narigbaayi ní, a ge pye kàgbeegēle kɛɛ ní siin. Aarɔn kàgbeeli maa pye pe kàgbeegèle nínge ni.

²² A Mowizi kàgbeegèle tɛ́ʔɛ Yawe yɛ́ʔɛ ma séeraw fànikpaʔa ni.

²³ Koro nyǐndaligi na a Mowizi ga jée séeraw fànikpaʔa ni, wéle, Aarɔn kàgbeeli li pye lè Levii narigbaagi wólo, a loro fùn, n fyɛ́ɛnrɛ kpéʔele, a amandi yasan-lɛɛ̀gwɔɔrɔ pye li na.

²⁴ A Mowizi kàgbeegèle myɛ láa yaà Yawe yɛ́ʔɛ ma n pan Isirayɛli ye myɛ ma. A poro baa ge nyaa, á pe myɛ nibin nibin níì be kàgbeegèle láa.

²⁵ A Yawe gi joo Mowizi ma níì jo: «Aarɔn kàgbeeli lúrugo mi tɛ́ʔɛ yaà Séeraw kásu yɛ́ʔɛ ma, li pye fɛ̀ɛ niceebèle kéele na, koro ga pye mɔ í be sànʔari syɛ́ɛnrɛ kwɔ́ɔ dee be kpéʔele mii yɛ́ʔɛ ma lè, jàngó pe a kɔ́ kùu í.»

²⁶ A Mowizi gi kpéʔele nya n yɛlɛ ní gi ní àmɛɛ Yawe da gi joo n gbàn wi ma lè.

Sáriga-wòlobèle ní Levii ye fáliw

²⁷ A Isirayɛli ye gi joo Mowizi ma níì jo: «Wéle, wolo i kwóo! Wolo i kúu! Wolo i kúu ni syée wo myɛw!

²⁸ Syɔ́ɔnwee faala ga nùuni Yawe kpɔ̀ʔɔrɔli fànikpaʔa na lè, wi n kùu. A wolo si yɛlɛ lé bi kwɔ́ɔ nya wo myɛw?»