Córolo 16 - Cebaara Bible 2010

Kore céemi kéele

¹ Kore wi lè Yisehari jáaw, Yisehari wi lè Kehati jáaw, Kehati wi lè Levii jáaw, Korew bee, n fàra Wurubɛn yòdaʔayi taanri na, yi lè Datan, ní Abiirami, pe lè Eliyabi jáabèle, ní Ɔn wi lè Pelɛti jáaw,

² a poro yìri Mowizi kánmi na, a Isirayɛli nànbēle sirakele ní togoye siin ní kpɔrigɔ fàra be na. Pe maa pye syɛ́ɛnmi kùndigibèle pèle. Nyaa-mí-jooli wóbèle pèle be pye, ní i nyɛ mɛ́ɛyɛ fɔɔlɔ.

³ A be peyɛɛ gbóʔoro Mowizi ní Aarɔn kánmi na, ní baa be pye: «Yele n kɔ́ɔ̀ gi pye n sɔ̀lɔ! Níì cán syɛ́ɛnmi myɛ tɔ̀nɔ́ i nyɛ wojanbéle ní, Yawe si wɔ́ɔ i nyɛ be níngi ni. Nyàʔá na yele yeyɛɛ lúrugu ni télegi Yawe syɛ́ɛnmi nyúngo na?»

⁴ Lǎli ni Mowizi syɛ́ɛnri bee lóʔo lè, a wi too n yɛ́ɛgi cíbele tári na.

⁵ A wi gi joo Kore, ní wi kabigi wòolo myɛ ma níì be pye: «Nyɛ̀ʔɛna nyǐngi nyɔ́ɔ na wee wi nyɛ lè Yawe wóo, ní wee wi nyɛ lè wojaɔn, wi a wi tɛ̀ɛn. Wi a wee bee yaʔa wi nùuni woro na. Wee wi ga nyɛ́nɛ n wòlo lè, wi a wi yaʔa wi nùuni woro na.

⁶ Kore mɔ ní mɔ kabigi wòolo myɛw ye gee naa kpéʔele: Ye naànigaɔn yalegéle láa.

⁷ Nyɛ̀ʔɛna ye naà le ge ni, yé nùndaanna yáriga taʔa ge na Yawe yɛ́ʔɛ ma. Yawe ga wee nyɛ́nɛ n wòlo lè, woro wi a pye wojanw. Yele Levii yòdaʔayi, yele n kɔ́ɔ̀ gi pye n sɔ̀lɔ!»

⁸ A Mowizi gi joo Kore ma níì jo: «Koro na ki n yɛlɛ ye lóʔo yele Levii yòdaʔayi.

⁹ Amɛɛ Isirayɛli ye Kolocɔlɔw yele yirige Isirayɛli syɛ́ɛnmi ni n yaʔa kɔlɔ̀ na lè, níì yele nùuni wiyɛɛ na jàngó yele í da báara Yawe kpɔ̀ʔɔrɔli fànikpaʔa ni lè, bàā yèré syɛ́ɛnmi yɛ́ʔɛ ma sáā báara bi ma, a koro i nyɛ lé kapiipiile yele ma ?

¹⁰ Wi n yele nùuni wiyɛɛ na, mɔ ní mɔ senyɛnbèle myɛ be lè Levii yòdaʔayi. A yele si sèʔé i sáriga-wòlori fáli caa.

¹¹ A koro gi kaan a mɔ ní mɔ kabigi wòolo joo n bɛ̀ɛ Yawe kánmi na. Aarɔn wi nyɛ wìí, á yele si i wi sànʔá ?»

¹² A Mowizi tun be sa Datan ní Abiirami yeri, pe lè Eliyabi jáabèle, kàjáa a be sáà jo: «Wolo a kári yaà í.

¹³ Táree di nyìn nɔ́nɔw ní sárigi na ni fóo lè, mɔ n wolo yirige dee bee ni bi ba kpóo fìími tára ni, a gee bee cɛ́rɛ lé mɔ ni a mɔ ní i caa bi tɛ́ɛn wolo nyúngi na?

¹⁴ Táree di nyìn nɔ́nɔw ní sárigi na ni fóo lè, toro ni ban mɔ baa wolo lége í hàán! Mɔ ga wɔ́ɔ̀ seye, ní ɛrɛzɛn séye kaan wolo ma kɔrigɔ í. A mɔ i caa lé bi yébilimɛ tɔ́n syɛ́ɛnbèle naa yɛ́ɛyɛ ni ? Wolo a kári yaà í.»

¹⁵ A Mowizi fúngi tanʔa gbanʔama. A wi gi joo Yawe ma níì jo: «Mɔ a kɔ́ fɔ̀lɔ be sárigaw na í. Alí mii ga jòfani nibin syɔɔ be ma í, mii ga kolo pe wàa ma í.»

Kore ní wi kabigi wòolo wɔʔɔlɔ kéele

¹⁶ A Mowizi gi joo Kore ma níì jo: «Nyɛ̀ʔɛna, ki n yɛlɛ mɔ ní mɔ kabigi wòolo myɛ ní Aarɔn i ba yére Yawe yɛ́ʔɛ ma,

¹⁷ ye myɛ nibin nibin n yɛlɛ bi yele naàniganw yalegéle láa, yé nùndaanni yáriga taʔala yaà, ye myɛ nibin nibin, ye ba yére Yawe yɛ́ʔɛ ma ní yele naàniganw yalegéle ní, ke lè naàniganw yalegéle sirakele ní togoye siin ní kpɔrigɔ. Mɔ ní Aarɔn si wɔ́ɔ pan ní yele naàniganw yalegéle ní.»

¹⁸ A be myɛ nibin nibin pe naàniganw yalegéle láa níì náagi le ge ni, níì nùndaanni yáriga taʔa yaà n baa yére Syɛ́ɛnmi Tɛɛfaraga fànikpaʔa kpaaweele na ní Mowizi, ní Aarɔn ní.

¹⁹ A Kore wi kabigi wòolo myɛ kpóʔoro be kánmi na, syɛ́ɛnmi tɛɛfaraga fànikpaʔa kpaaweele ma. Lǎli bee ni a Yawe nìjangbɔɔri tiyɛɛ dɛ̀ɛn syɛ́ɛnmi myɛ na.

²⁰ A Yawe gi joo Mowizi ní Aarɔn ma níì jo:

²¹ «Ye cɔɔnri ye yiri syɛ́ɛnmi naa nínge ni, mii si bi kálagi kwɔ́ɔ làla nibin ni.»

²² A be too n yɛ́ɛyi cíbele tári na níì jo: «Ee Kolocɔlɔɔ, mɔ wi lè céri myɛ pìigēle Kolocɔlɔɔ, nàɔn nibin wi kapeeli kpéʔele, mɔ fúngi si tanʔa lé syɛ́ɛnmi myɛ kurugo?»

²³ A Yawe gi joo Mowizi ma níì jo:

²⁴ «Ki joo syɛ́ɛnmi ma mí bi pye: ‹Ye cɔɔnri ye yiri kàbanyi myɛ na ye léeli Kore, ní Datan, ní Abiirami tɛɛkòrogi na.› »

²⁵ A Mowizi yìri n kári Datan ní Abiirami ma. A Isirayɛli wolɛɛbèle wɔ́ɔ̀ taʔa wi na n kári yaà.

²⁶ A wi gi joo syɛ́ɛnmi ma níì jo: «Nǎnbèle naa be pee lè nya, ye léeli be fànikpaayi na. Yele a kɔ́ tánga be kɔlɔ̀ yárigaa faala na í, koro ga pye kapeegèle myɛ be kpéʔele lè yele a kɔ́ kálagi láʔa yaà ge kéeli na í.»

²⁷ A be yìri n núngo kàbanyi myɛ na n léeli Kore, ní Datan, ní Abiirami tɛɛkòrogi na. A Datan ní Abiirami yiri n yére be fànikpaayi kpaaweegéle na, poro ní be cébèle, ní be jáabèle, ní be pìiyilibèle ní.

²⁸ A Mowizi jo: «Gee naa báriga ni yele a gi cán bi cán Yawe wi mii tun mii í da kérigèle naa myɛ kpéʔele, ncan mii o ge kpéʔele niyɛɛ báriga ni í.

²⁹ Syɛ́ɛnbèle naa ga kùu syɛɛnsanbèle kùuganma na kéelee li kpéʔele syɛɛnsanbèle myɛ na lè, lee bee ga kpéʔele be na, Yawe ban wi mii tun í.

³⁰ Kàjáa Yawe ga kafɔngɔ kpéʔele, a tári di nyɔ́ɔgi múgu níì bele naa ní be kɔlɔ̀ yáriri myɛ jɔ́ɔ, ní bele naa woweebéle ga tìgi n jée kúbèle tɛɛkòrogo ni, lǎli bee ni yele a gi cán bi cán syɛ́ɛnbèle naa n Yawe faʔa.»

³¹ Lǎli ni wi kwóo syɛ́ɛnri bee joolo na lè, a tári yabi be láari ni.

³² A tári di nyɔ́ɔgi múgu n be jɔ́ɔ, pe ní be kpáayi wòolo, n fàra Kore syɛ́ɛnbèle myɛ, ní be kɔlɔ̀ yáriri myɛ na.

³³ A be tìgi woweebèlē ní kúbèle tɛɛkòrogo ni, pe ní be kɔlɔ̀ yáriri myɛ ní, á tári lúru n tɔ́n be na. A be kwɔ́ɔ n yiri syɛ́ɛnmi nínge ni.

³⁴ Isirayɛli ye myɛw pe da be màʔa lè, a poro be sùpiiwáari lóʔo ní i fé, ní i gi nyuu níì jo: «Jàngó tári a wɔ́ɔ kɔ́ wolo jɔ́ɔ í.»

³⁵ Nǎnbèle sirakele ní togoye siin ní kpɔrigɔw wi da pan ní nùndaanni yáriga ní lè, a Yawe naà yirige n be sórigo mɛnɛ mɛnɛ.