Córolo 14 - Cebaara Bible 2010

Isirayɛli ye n Kanaan tári jéele cée

¹ A syɛ́ɛnmi myɛ sùpiiri yìrige ní i yákpogèle wáa. A syɛ́ɛnbèle nyɛni yébiligi bee ni.

² A Isirayɛli ye myɛ i Mowizi ní Aarɔn sànʔá. A syɛ́ɛnmi myɛ gi joo be ma níì jo: «Wolo ga maa kùu Ezyipiti tári ni, wàlá n kùu fìimɛ tári naa ni koro a dée pɔ́rɔ.

³ Nyàʔá na Yawe pan ní wolo ní tári naa ma ŋɔséew í ba wolo kpóo cáan? Pe a wolo cébèle, ní wolo pìipiigèle koli di ni. Wo ga lúru n kári Ezyipiti ma, gee bee ban ki a pɔ́rɔ ì ?»

⁴ A be gi joo peyɛɛ ma níì jo: «Ye tíi wo kùndigi télege woyɛɛ nyúngi na, wó lúru wo kári Ezyipiti ma.»

⁵ A Mowizi ní Aarɔn too n be yɛ́ɛyi cíbele tári na Isirayɛli syɛɛnkpoʔolomi myɛ yɛ́ʔɛ ma.

⁶ Zyozuwe wi lè Nun jáaw, woro ní Kalɛbi wi lè Yefune jáaw, pe da wɔ́ɔ̀ pye lè tásaanribèle ni, a poro peyɛɛ búroyi sulugu,

⁷ níì joo ní Isirayɛli syɛɛnkpoʔolomi myɛ ní kánmi naa na níì jo: «Táree wolo sáà fàn n foro lè n di saanri n wéle, ti tɔ̀nɔ́ i nyɛ tácàndelere.

⁸ Yawe ga pye ní wolo ní, wi a wolo lége tári bee ni si di kaan wolo ma. Táraa dii, dee di nyìn nɔ́nɔw ní sárigi na ni fóo lè.

⁹ Yele a tɛ́nɛ kɔ́ céemɛ kpéʔele ní Yawe ní í. Yele a kɔ́ fyáa tári bee syɛ̀ɛnnɛ na í, níì cán pe a pye wolo ma lìile. Yatɔngɔ ní o nyɛ be na í. Yawe i nyɛ ní wolo ní. Yele a kɔ́ fyáa be na í.»

¹⁰ Syɛ́ɛnmi myɛ maa ni gi nyuu níì jo pe be wábagi ní kàdɛnɛrɛ ní. Lǎli bee ni a Yawe nìjangbɔɔri tiyɛɛ dɛ̀ɛn Isirayɛli syɛ́ɛnmi myɛ nyɛ́nɛ na Syɛ́ɛnmi Tɛɛfaraga fànikpaʔa njoʔo ni.

Mowizi n Kàfɔw nyɛ́ɛri syɛ́ɛnmi kéele na

¹¹ A Yawe Mowizi pye: «Làlìí ni syɛ́ɛnbèle naa a láʔa mii faʔali na? A pe a zǐn cée lé bi kòro sìndaga ni mii na, àlí fɛ̀ɛ́bèle myɛ mii wírè kpéʔele be níngi ni lè?

¹² Mii a káfalagi yáama tɛ́ʔɛ bi be kpúmɔn. Mii a be láʔa yaà, si mɔ kpéʔele syɛɛnfelegaa, gee ki a nɛʔɛ bi sɔ̀lɔ be na lè, ki fǎngi si wɔ́ɔ kpɔ́ʔɔ bi sɔ̀lɔ be wógi na.»

¹³ A Mowizi gi joo Yawe ma níì jo: «Kàjáa Ezyipiti ye a kéeli bee lóʔo, poro bele nínge ni mɔ syɛ́ɛnbèle naa yirige lè mɔ fangi báriga ni.

¹⁴ Pe n koro joo n tɛ̀ɛn tári naa syɛ̀ɛnnɛ na. A bele bee gi lóʔo mɔ Yawe i nyɛ syɛ́ɛnbèle naa nínge ni, a mɔ Yawe wɔ́ɔ̀ miyɛɛ dɛ̀ɛn be na a be mɔ nyaa, á mɔ Yawe fàfaangi wɔ́ɔ i yèré be nyúngi ni. Mɔ wɔ́ɔ i táanri be yɛ́ɛgi na fàfaantɔnɔgi ni cángi làla ni, ki ga pye yébiligi ni, ki n pye naà fàfaantɔnɔgɔ ni.

¹⁵ Mɔ ga syɛ́ɛnbèle naa kpóo àmɛɛ nàɔn nibin nyɛ lè, syɛɛnfeleyi yi mɔ kéeli lóʔo lè, yi a jo:

¹⁶ ‹Táree kéele na Yawe da kàli níì jo woro a di kaan syɛ́ɛnbèle naa ma lè, wi fanʔa ga taa bi be lége di ni í, koro na wi be kpúmɔn n kpóo fìími tára ni.›

¹⁷ Tɔ́ɔliw ni mii i mɔ nyɛ́ɛri Kàfɔw, ki n yɛlɛ mɔ séekpɔɔw í wiyɛɛ dɛ̀ɛn bi yɛlɛ ní wi kpɔ́ʔɔganmi ní àmɛɛ mɔ gi joo lè níì jo:

¹⁸ ‹Yawe fúngi o taanri kelekele í, wi n nyìn funjǎngi na, wi i kolomi ní kapeegèle kùsulugo syoo. Wi o tànʔa kaangi kolomɔ fɔ́lɔ ma í. Wi i tofɔbèle kolomɔ gɔlɔ́ wóo be pìíbèle na fwɔɔ bi taa sa nan be yòdaʔayi yìrigēle taanri ní sicɛrɛ wóbèle na.›

¹⁹ Mii i mɔ nyɛ́ɛri, mi syɛ́ɛnbèle naa kùsulugo syɔɔ bi yɛlɛ ní gi ní àmɛɛ mɔ fúngi tɔ̀nɔ n nyɔɔ lè gbanʔama àmɛɛ mɔ tée i syɛ́ɛnbèle naa kùsulugo syoo lè, nlaa yaà Ezyipiti ma fwɔɔ n baa nan nɛɛ naa.»

²⁰ A Yawe jo: «Mii n be kùsulugi syɔɔ àmɛɛ mɔ gi joo lè.

²¹ Kàjáa mii woweew mɛ́ʔɛ na ní àmɛɛ mii Yawe nìjangbɔɔri tári myɛ nyìn lè,

²² nǎnbèle myɛ pe mii nìjangbɔɔri, ní fɛ̀ɛ́bèle nyaa, bele mii kpéʔele Ezyipiti ní fìími tára ni lè, níì mii pye n wéle n kwɔ́ɔ tɔlɔyɔ kɛɛ, níì cée, pe ga fɔ̀lɔ n mii jóomi lóʔo í,

²³ pe a tée tári nyaa í, dee kéele na mii kàli be toolɛɛbèle ma lè níì jo mii a di kaan be ma. Bele myɛ pe mii faʔa lè, pe wàa faala a di nyaa í.

²⁴ Mii falipyew Kalɛbi si na, àmɛɛ fungaa nikwɔɔ da pye woro ni lè, a wi lóʔo mii ma n foro, koro na táree má wi da kári lè, mii a wi lége di ni, wi yòdaʔayi a di tàa taa.

²⁵ Amalɛki ye, ní Kanaan ye i nyɛ wodɛ́ɛnbéle ní jǐnlɔgi ni. Nyɛ̀ʔɛna ye lúru yaa syée fìími tára ma, Nyɛ́nɛri Solomɔ Lɔ́ʔɔ kàbaan na.»

Yawe n wi syɛ́ɛnbèle wɔʔɔ

²⁶ A Yawe gi joo Mowizi ní Aarɔn ma níì jo:

²⁷ «Syɛ́ɛnmi naa bi pee lè nya, poro bee bi kòro ni mii sànʔá lè, làla jòorí mii a bi yaʔa bi kòro bàā mii sànʔá ? Mii n Isirayɛli ye sànʔari syɛ́ɛnrɛ lóʔo, dee na be mii sànʔá lè.

²⁸ Ki joo be ma mí be pye Yawe n jo: ‹Mii woweew mɛ́ʔɛ na, mii a tɔ̀nɔ́ yele cò bi yɛlɛ ní gee ní yele joo n le mii líiweegèle ni lè.

²⁹ Yele bele myɛ be córo lè n séli yɛ̀ʔɛlɛ toko wóbèle na ni syée poro yɛ́ʔɛ ma wóbèle kurugo, yele bele ye mii sànʔa lè, yele a kùu fìimɛ tári naa ni.

³⁰ Táree kéele na mii da kàli lè, níì jo mii a yele télege di ni lè, yele a tée jée di ni í, fwɔɔ Kalɛbi wi lè Yefune jáaw, ní Zyozuwe wi lè Nun jáaw.

³¹ Yele pìipiigèle gele kéele na yele gi joo lè níì jo pe a sa ge koli yaà, koro mii a lége di ni pe a sa tári kánma cán toro dee kéele yele faʔa lè.

³² Yele si na, yele a kùu fìimɛ tári naa ni.

³³ Yele pìíbèle a wɔ́ɔ ra nyaari da máari yaweeri kurugo yɛ̀ʔɛlɛ togoye siin fúngo ni, fìími tára ni, si yele sìnzinmi túgoro tugo, bi taa yele myɛ í kùu fìími tára ni.

³⁴ Yele a yele kolomi túgoro tugo yɛ̀ʔɛlɛ togoye siin fúngo ni bi yɛlɛ ní cányi togoye siin ní yele pye tári saanri wélele na lè, canʔa nibin a pye yɛɛlɛ nibin. Yele a gi cán bi cán syɔɔn ga níì cée, gee ki a wi taa lè.›

³⁵ Koro mii Yawe joo. Kánmi bee mii a taʔa syɛ́ɛnmi naa na, poro bee bi pee lè, níì piyɛɛ nyaa n joo mii kánmi na. Pe a kwɔ́ɔ fìimɛ tári naa ni. Pe a kùu nɛɛ naa.»

³⁶ Nǎnbèle bele Mowizi da tun jàngó be sa tári saanri be wéle lè, pe lúru n pan lè, a pe baa tári kánma joo n pee, níì syɛ́ɛnmi myɛ sɔ́ɔn a bi i Mowizi sànʔá.

³⁷ Nǎnbèle bee pe baa tári kéele joo n pee lè, a yaabeemɛ be kpóo Yawe yɛ́ʔɛ ma.

³⁸ Zyozuwe wi lè Nun jáaw, ní Kalɛbi wi lè Yefune jáaw, poro yagana be kòro sìi na nǎnbèle bee ni be kári n sáà tári saanri n wéle lè.

Syɛ́ɛnbèle n níì sìnloʔomɔ kpéʔele

³⁹ A Mowizi syɛ́ɛnri bee joo Isirayɛli ye myɛw ma, a syɛ́ɛnbèle tɔ̀nɔ n pye funbɛɛnrɛ na gbanʔama.

⁴⁰ A be sɔ̀li n yìri n lúgu n kári nyanbeleyi ma ní i gi nyuu níì jo: «Wolo wéle bele. Tɛ́ɛgee kéele Yawe joo wolo ma lè, wolo a lúgu kári yaà, níì cán wolo n kapeele pye.»

⁴¹ A Mowizi jo: «Nyàʔá na yele Yawe tundunri cèʔé? Gee bee a gbǎn nyɔɔ í.

⁴² Yele a kɔ́ lúgu yaà í. Níì cán Yawe o nyɛ yele níngi ni í. Yele a kɔ́ yeyɛɛ gaan yele nigoobèle í kpóo cáan í.

⁴³ Níì cán Amalɛki ye, ní Kanaan ye i yaà yele yɛ́ʔɛ ma. Ŋɔséew a yele kpóo cáan, níì cán yele n lúru Yawe kurugo, koro na Yawe a pye ní yele ní í.»

⁴⁴ A pe be nyúnyi waʔa níì lúgu n kári nyanbeleyi ma, kàjáa Yawe joogaanni kásu, ní Mowizi ga yìri tɛɛkòrogi ni n kári í.

⁴⁵ Amalɛki ye ní Kanaan ye be pye lè nyanbeleyi na, a poro tìgi n baa fànʔa taa be na ni be cɔ̀nʔɔ́ ni ŋuu ni syée fwɔɔ n sáà nan Horima na.