Córolo 12 - Cebaara Bible 2010

Aarɔn ní Miriyami n tìgi Mowizi na

¹ A Miriyami ní Aarɔn i Mowizi syɛ́ɛnri nyuu Kusyi ye céw kéele na wi da láa lè, níì cán wi maa Kusyi ye cɔ́ɔ pɔri.

² Pe maa ni gi nyuu níì jo: «Mowizi nibin nyɔ́ɔgi ni lé Yawe nyuu ? Wi wɔ́ɔ o nyuu wolo nyɔ́ɔyi ni ì ?» A Yawe gi lóʔo.

³ Bi gi taa Mowizi maa pye nànwaa, wee wi màama kpéʔele n sɔ̀lɔ tári syɛ̀ɛnnɛ myɛ na lè.

⁴ Lǎli bee wonijanna ni, a Yawe gi joo Mowizi, ní Aarɔn, ní Miriyami ma níì be pye: «Ye yiri yele taanriw, ye pan syɛ́ɛnmi tɛɛfaraga fànikpaʔa ma.» A be taanriw yiri n pan.

⁵ A Yawe tìgi n pan fàfaantɔnɔgi ni n baa yére fànikpaagi kpaaweele na, níì Aarɔn ní Miriyami yeri. A pe myɛ siinw nùuni yaà.

⁶ A wi jo: «Ki n yɛlɛ ye mii syɛ́ɛnri sámaga ye lóʔo. Kanyaajoowaa ga pye yele níngi ni, yanyaʔa ni mii Yawe a niyɛɛ dɛ̀ɛn wi na, ŋúnɔgɔ na mii a joo ní wi ní.

⁷ Kánmi bee si na ban mii falipyew Mowizi kéeli nyɛ í. Wi i nyɛ tágala syɔ́ɔn mii kpáagi myɛ ni.

⁸ Woro ní mii nyuu, wi i mii yákpoli lúro. Mii o nyuu ní wi ní kàseegéle ni í. Wi i mii Yawe kánmi nyaagi. Nyàʔá na si yele ga fyáa mii falipyew Mowizi syɛ́ɛnri joolo na í?»

⁹ A Yawe fundanʔari cò naà be kánmi na, a wi kári.

¹⁰ A fàfaangi yìri fànikpaagi ǹjoʔo ni, wéle, a yaanyɛɛnmɛ yiri Miriyami na. A wi céri kàri n fílige àmɛɛ lànɛɛzyiw nyɛ lè. A Aarɔn fíige n Miriyami wéle n gi nyaa yaanyɛɛnmɛ i nyɛ wi na.

¹¹ Lǎli bee ni a Aarɔn gi joo Mowizi ma níì jo: «Nyɔɔ wolo na ni kàfɔlɔ, kapeeli wolo kpéʔele lè wolo yakirifunmi báriga ni, mɔ a kɔ́ wolo yaʔa wo li túgori tugo í.

¹² Ki ga yɛlɛ wi pye àmɛɛ pìiseevɔ̀ɔn nyɛ wee nɔ́ɔ wi wi see n cáan n gi nyaa a wi céri tíla fɔ́nʔɔ lè í.»

¹³ A Mowizi yákpoli wáa Yawe kurugo níì jo: «Ee Kolocɔlɔɔ, mii i mɔ nyɛ́ɛri, ki n yɛlɛ mi wi pɔʔɔ!»

¹⁴ A Yawe gi joo Mowizi ma níì wi pye: «Wi tóow ga maa tɛ́ɛrɛ wáa wi yɛ́ɛgi ni, wi a dée kòro fɛ̀ɛrɛ wóo ní bi canya kɔrɔsiin kwɔ́ɔ ì ? Koro na gi yɛlɛ pe wi yirige yaʔa tɛɛkòrogi kàdoʔo ma wi kwɔ́ɔ canya kɔrɔsiin, koro kàdoʔo ma pe a ní pan ní wi ní.»

¹⁵ A be Miriyami yirige n yaʔa tɛɛkòrogi kàdoʔo ma n taa canya kɔrɔsiin. Syɛ́ɛnbèle ga kári í fwɔɔ bi taa pe ní wi lúrugo lége yaà.

¹⁶ Koro kàdoʔo ma a syɛ́ɛnbèle yìri Haserɔti ni n kári n sáà tɛ́ɛn Paran fìími tára ni.