Córolo 11 - Cebaara Bible 2010

Isirayɛli ye n nan Tabɛyera na

¹ A syɛ́ɛnmi si kɔ́ ba ni sànʔara kpéʔele, a gee bee Yawe bɛɛn. Amɛɛ Yawe gee bee lóʔo lè, a wi fundanʔari cò naà, a Yawe náagi cò be níngi ni n sórigolo kpéʔele tɛɛkòrogi láʔalee na.

² A syɛ́ɛnmi yákpogèle wáa Mowizi kurugo. A Mowizi Yawe nyɛ́ɛri, a náagi fígi.

³ A be tɛ́ɛgi bee mɛ́ʔɛ le ni gi yiri Tabɛyera, níì cán Yawe náagi maa cò be níngi ni.

Syɛ́ɛnmi i kaara caa

⁴ Syɛɛnfeleyi yi pye Isirayɛli ye níngi ni lè, a yaliiri laànitaʔa kɔ́ɔ̀ wári yi na gbanʔama, a Isirayɛli ye wɔ́ɔ̀ séli ni nyaan níì jo: «Wìí wi a kaara kaan wolo ma wolo í káa?

⁵ Wolo i sɔ̀ngí ni taagi fábèle na wolo da ni káa lè kawaʔa na Ezyipiti tári ni, n fàra kɔnkɔnbiriw, ní melɔnw, ní pwarow, ní jàbaw, ní layiw na.

⁶ Tɔ́ɔliw ni, wolo yákpodiriyi n waʔa, yafyɛn ní o nyɛ beè í. Wolo nyapiigèle ga níì taʔa yarigaa na kapye mánɛw ban í.»

⁷ Mánɛw maa pye mɔ a jo supyaà wii, á wi yɛ́ɛgi si bideliyɔmi kùro wíri.

⁸ Syɛ́ɛnmi maa ni caragi ni wi koli, ní i wi tire tírege na, wàlá ni wi súu súgo ni. Pe maa ni wi soori kòdɔɔlɔ ni, ní i wàa sámagi ŋɔ̀mi. Wi tàánmi maa pye mɔ a jo sìnmɛ kàgbalaya wómɔ bii.

⁹ Kásagi ga tìgi yébiligi ni n tɛɛkòrogi tɔ́n lǎli ni lè, mánɛw n wɔ́ɔ̀ pínɛ n tìgi ní gi ní.

¹⁰ A Mowizi syɛ́ɛnbèle nyɛnimɛ lóʔo pe narigbaayi ni. Syɛ́ɛnbèle myɛ nibin nibin maa ni nyaan pe fànikpaayi kpaaweegéle na. A Yawe fúngi tanʔa gbanʔama, a gee bee Mowizi bɛɛn.

¹¹ A Mowizi Yawe yari: «Nyàʔá na mɔ wɔʔɔgi taʔa mɔ falipyew na? Nyàʔá na mii ga kacànna taa mɔ ma í, fwɔɔ a mɔ syɛ́ɛnbèle naa myɛ tugo mii na tugoro?

¹² Mii lé wi syɛ́ɛnbèle naa myɛ fícɛnnɛ taa? Mii lé wi be see, á mɔ mii pye: ‹Pe láa mi taʔa mɔ ficibigi na àmɛɛ pyà gbóofɔlɔ pyà lée lè?› Táree kéele na mɔ kàli be toolɛɛbèle ma lè níì jo mɔ a di kaan be ma fwɔɔ bi taa mii í sa nan ní be ní tári bee na?

¹³ Sán mii a káari taa bi kaan syɛ́ɛnbèle naa myɛ ma? Níì cán pe i nyaan mii na níì jo: ‹Kaara kaan wolo ma wolo í káa.›

¹⁴ Mii nibin fánʔa a taa syɛ́ɛnbèle naa myɛ na bi be tugo í, níì cán pe n líbe n sɔ̀lɔ mii na.

¹⁵ Sáni mɔ í mii cò kánmi naa na lè, mɔ ga jo bi nyɔɔ mii na ján mi mii kpóo, koro ga pye mii a kɔ́ ba mii wɔʔɔgi nyaa í.»

¹⁶ A Yawe gi joo Mowizi ma níì wi pye: «Nànbēle togoye taanri ní kpɔrigɔ kpóʔoro Isirayɛli wólɛɛbèle ni mii ma, bele mɔ cán lè pe i nyɛ wolɛɛbèlē, ní syɛ́ɛnmi kùndigibéle. Mi pan ní be ní Syɛ́ɛnmi Tɛɛfaraga fànikpaʔa kpaaweele ma, pe ba yére yaà ní mɔ ní.

¹⁷ Mii a tìgi bi ba joo ní mɔ ní yaà beè. Mii a kàa láʔa pǐli na li nyɛ mɔ na lè bi taʔa bele bee na, koro ga pye be tugo ní mɔ ní syɛ́ɛnbèle na, jàngó mɔ a kɔ́ be tugo mɔ nibin í.

¹⁸ Mɔ a gi joo syɛ́ɛnbèle ma si be pye: ‹Ki n yɛlɛ ye yeyɛɛ zámaga ye yaʔa nyɛ̀ʔɛna yɛ́ʔɛ na. Yele a kaara káa, níì cán yele n nyɛni Yawe líiweegèle taana níì jo: Wìí syɔ́ɔn wi a kaara kaan wolo ma wolo í káa? Níì cán wolo maa ŋɔ́n n daa Ezyipiti ni. Koro na Yawe a kaara kaan yele ma yele í káa.

¹⁹ Yele a di káa canʔa nibin yagana í, wàlá canya siin í, wàlá canya kagunɔ í, wàlá canya kɛɛ í, wàlá canya toko í.

²⁰ Kàjáa yebogo fúngo ni, fwɔɔ ti ba ra yirigi yele fínaagèle ni. Ti a tɔ̀nɔ́ ba yele bɛɛn gbanʔama. Níì cán Yawe wi nyɛ yele níngi ni lè, yele n wi cée, ní i nyaan wi yɛʔɛ̀ ma níì jo: Nyàʔá gi caà wolo taa á wolo yiri Ezyipiti ni?› »

²¹ A Mowizi jo: «Syɛ́ɛnbèle bele nínge ni mii nyɛ lè, pe i nyɛ nànbēle tɔlɔyɔ fɔɔlɔ sirakamayɛ toko ní kpɔrigɔ, á mɔ gi joo níì jo: ‹Mii a káari kaan be ma pe di káa yebogo fúngo ni.

²² Yaweeyiligēle, ní yaweekpologèlē lé pe a kɔnɔgi be na, jàngó be taa bi yɛlɛ? Wàlá sólomi lɔ̀ʔɔ fàala myɛ lé pe a kpóʔoro peyɛɛ na jàngó be taa bi yɛlɛ?› »

²³ A Yawe Mowizi yari: «A Yawe kɔ́gi kpere lé ? Mɔ a gi nyaa tɔ́ɔliw ni, gee mii joo mɔ ma lè kapye ki a foro wàlá ki a foro í.»

Kolocɔlɔɔ n wolɛɛbèle togoye taanri ní kpɔrigɔ kaan wi Pǐli na

²⁴ A Mowizi yiri n kári n sáà Yawe syɛ́ɛnri joo syɛ́ɛnbèle ma. A wi wolɛɛbèle pèle togoye taanri ní kpɔrigɔ kpóʔoro, ní baa be télege n fànikpaagi màʔa.

²⁵ A Yawe tìgi fàfaangi ni n baa joo ní wi ní, níì kàa láʔa pǐli na li da pye wi na lè n taʔa wolɛɛbèle togoye taanri ní kpɔrigɔ na. Lǎli ni Pǐli baa tɛ́ɛn be na lè, a be i kérigèle nyaagi ni nyuu, koro kàdoʔo ma pe ga níì gi kpéʔele í.

²⁶ Nǎnbèle pèle siin maa kòro yaà tɛɛkòrogi ni, pe maa ni wàa yiri Ɛlidadi, ní i wee yiri Medadi, a pǐli wɔ́ɔ̀ tɛ́ɛn be na, níì cán pe maa córo ní bele ní, pe si da yiri n kári fànikpaagi ma í. A be i kérigèle nyaagi ni nyuu tɛɛkòrogi ni.

²⁷ A nìgɔcariwaa fàn n kári n sáà gi joo Mowizi ma níì jo: «Ɛlidadi ní Medadi i yaà ni kérigèle nyaagi ni nyuu, tɛɛkòrogi ni.»

²⁸ Zyozuwe wi lè Nun jáaw, nlaa wi cárimi làla ni, wi maa ni báara Mowizi ma, a woro syɛ́ɛnri láa n gi joo níì jo: «Mowizi, ni kàfɔlɔ, ki n yɛlɛ mi be yérige.»

²⁹ A Mowizi wi yari: «A nyabɛɛnnɛ i nyɛ lé mɔ ni, mii kéeli na? Alí ki n caà yɛlɛ Yawe syɛ́ɛnbèle myɛ í pye kanyaajoobéle, Yawe í wi Pǐli taʔa be na.»

³⁰ A Mowizi ní Isirayɛli wolɛɛbèle lúru n pan tɛɛkòrogi ma.

Kiburɔti-Hataava : Gbàrisɛɛyi kéele

³¹ A Yawe káfalaga yìrige sólomi lɔ̀ʔɔ ma, a gi i funu. A koro pan ní gbàrisɛɛrɛ ní n baa tɔ́n tɛɛkòrogi na, a di pye kàbangee na canʔa nibin tánʔana kánma, gee na canʔa nibin tánʔana kánma n tɛɛkòrogi màʔa. Ti maa pye mɛtiri nibin félege tári ǹjoʔo ni.

³² A syɛ́ɛnbèle yìri n too gbàrisɛɛri kolilo na canbogi bee myɛ, ní yébiligi myɛ, ní cángi bee nyǐndaliga myɛ ni. Wee wi da koli a di cɛ́rɛ pe myɛ wóro ni lè, woro maa homɛri nyɛ́yɛ kɛɛ taa. A be di càli, wàa ní wi woro, n tɛɛkòrogi màʔa.

³³ N káari yaʔa pe gǎngèle lariya ni sáni pe di sànʔa lè, a Yawe fundanʔari cò naà syɛ́ɛnbèle kánma na. A Yawe syɛ́ɛnbèle kpúmɔn ní yaabeemɛ ní.

³⁴ A be tɛ́ɛgi bee mɛ́ʔɛ le ni gi yiri Kiburɔti-Hataava, níì cán syɛ́ɛnbèle bele na káari láa da wári lè, pe n bele bee tɔ́n yaà beè.

³⁵ A syɛ́ɛnbèle yìri Kiburɔti-Hataava ni n kári Haserɔti ma, n sáà tɛ́ɛn Haserɔti ni.