Córolo 10 - Cebaara Bible 2010

Wálifiiw búruwiibēle kéele

¹ A Yawe gi joo Mowizi ma níì jo:

² «Wálifiio búruwiibēle siin sámaga. Mɔ a be sámaga ní wálifiio saʔa ní, wee be kpúmɔn lè. Mɔ a ra be wíi syɛ́ɛnmi kpóʔorolo kéele na, ní syɛ́ɛnmi làrigárila ni.

³ Pe ga be wìi lǎli ni lè syɛ́ɛnmi myɛ n yɛlɛ bi kpóʔoro mɔ ma Syɛ́ɛnmi Tɛɛfaraga fànikpaʔa kpaaweele na.

⁴ Pe ga búru nibin yagana wìi, wogbolobèle be nyɛ lè Isirayɛli syɛ́ɛnmi sirakamayɛ kùndigibéle, poro a kpóʔoro mɔ na.

⁵ Lǎli ni yele ga búruw wìi lè gbanʔama, bele be nyɛ lè wodɛ́ɛnbéle ní canʔafolomɔ ma, poro a yìri bàā syée.

⁶ Yele ga níì búruw wìi tɔziin wógi na, bele be nyɛ lè wodɛ́ɛnbéle ní wòrogulo kàbangi na, poro a yìri bàā syée. Pe a ra búruw wíi gbanʔama pe làrigárili ni.

⁷ Yele a wɔ́ɔ búruw wìi bi syɛ́ɛnmi kpóʔoro, kàjáa yele a kɔ́ wi wìi gbanʔama í.

⁸ Aarɔn jáabèle be lè sáriga-wòlobèle, poro pe a ra búrubèle wíi. Gee bee a pye bàngwɔɔ làlwa kéele yele ma yele yìrigèle syɛ̀ɛnnɛ myɛ nínge ni.

⁹ Yele kàsiitun-nyɛ́nw ga pan ba kapɛɛnni kpúmɔn ní yele ní yele tári ni, á yele si yiri ni syée sa tún ní wi ní, ye búrubèle wìi gbanʔama. Yawe yele Kolocɔlɔw a sɔ̀ngí taa yele kéeli na, si yele syɔɔ yele nigoow ma.

¹⁰ Yele fundaanri canya ni, ní yele kpóʔorojǎngèle na, ní yele yevɔnyi na, yele a búrubèle wìi yele sáriga-sórigow, ní yele pínɛnyɛnnɛgi sáriga làriwololo ni. Pe a pye sɔ̀ngudaara yáriga yele kéeli na yele Kolocɔlɔw yɛ́ʔɛ ma. Mii wi nyɛ Yawe yele Kolocɔlɔw.»

N SELI SINAYII NA N SAA NAN MOWABI LAʔAGOLOGI NA Isirayɛli ye tánʔani sélimɛ fìími tára ni

¹¹ Yɛɛziin wóli yeziin wóʔo canya toko wógi na, a fàfaangi yìri n láʔa kpɔ̀ʔɔrɔli fànikpaʔa na ki lè Séeraw wóʔo.

¹² A Isirayɛli ye yìri Sinayii fìími tára ni n yɛlɛ ní gee ní gi joo n gbàn pe káriganmi kéele na lè. A fàfaangi sáà tìgi n yére Paran fìími tára ni.

¹³ Pe n tánʔazelili kpéʔele n yɛlɛ ní syɛ́ɛnri ní Yawe da joo n gbàn Mowizi ma a wi joo be ma lè.

¹⁴ Zyuda yòdaʔayi tɛɛkòrogo wòolo káfali wi sélì yìri n kári ní wi sùlasiibèle kabiya ní. Nasyɔn wi lè Aminadabi jáaw, woro wi pye Zyuda sùlasiibèle nyúngo na.

¹⁵ Netaneyɛli wi lè Suwari jáaw, woro wi pye Isakari yòdaʔayi syɛɛnfelege sulasiibéle nyúngo na.

¹⁶ Eliyabi wi lè Helɔn jáaw, woro wi pye Zabulɔn yòdaʔayi syɛɛnfelege sulasiibéle nyúngo na.

¹⁷ A be kpɔ̀ʔɔrɔli fànikpaʔa waragi, a Gerisyɔn yòdaʔayi wòolo, ní Merarii yòdaʔagi wòolo kpɔ̀ʔɔrɔli fànikpaʔa tugo n kári.

¹⁸ A Wurubɛn yòdaʔayi tɛɛkòrogo wòolo káfali yìri n kári ní wi sùlasiibèle kabiya ní. Elisuri wi lè Syedewuri jáaw, woro wi pye Wurubɛn sùlasiibèle nyúngo na.

¹⁹ Syelumyɛli wi lè Surisyadayi jáaw, woro wi pye Simeyɔn yòdaʔayi syɛɛnfelege sulasiibéle nyúngo na.

²⁰ Eliyazafi wi lè Dewuyɛli jáaw, woro wi pye Gadi yòdaʔayi syɛɛnfelege sulasiibéle nyúngo na.

²¹ A Kehati ye tɛɛcǎngi yárira tugo n kári, á bele sáà kpɔ̀ʔɔrɔli fànikpaʔa kóri ni be sige sáni be nan yaà lè.

²² A Efirayimi yòdaʔayi tɛɛkòrogo wòolo káfali náà yìri n kári ní wi sùlasiibèle kabiya ní. Elisyama wi lè Amihudi jáaw, woro wi pye Efirayimi sùlasiibèle nyúngo na.

²³ Gamiliyɛli wi lè Pedasuri jáaw, woro wi pye Manase yòdaʔayi syɛɛnfelege sulasiibéle nyúngo na.

²⁴ Abidan, wi lè Gidewonii jáaw, woro wi pye Bɛnzyamɛ yòdaʔayi syɛɛnfelege sulasiibéle nyúngo na.

²⁵ A Dan yòdaʔayi tɛɛkòrogo wòolo káfali náà yìri n kári ní wi sùlasiibèle kabiya ní. Poro pe da pye tɛɛkòroyi myɛ kàdoʔo ma. Ahiyezɛɛri wi lè Amisyadayi jáaw, woro wi pye Dan sùlasiibèle nyúngo na.

²⁶ Pagiyɛli wi lè Okiran jáaw, woro wi pye Azɛɛri yòdaʔayi syɛɛnfelege sulasiibéle nyúngo na.

²⁷ Ahira wi lè Enan jáaw, woro wi pye Nɛfitalii yòdaʔagi syɛɛnfelege sulasiibéle nyúngo na.

²⁸ Kánmi bee na Isirayɛli ye káriganmi da pye n yɛlɛ ní be sùlasiibèle kabiya ní. Kánmi bee na pe da ni yìrigí ni syée.

Mowizi i wàa caa wi pye tánʔani kôginio

²⁹ A Mowizi gi joo Hobabi ma wi lè Erewuyɛli jáaw, Madyan ye wów, wi pye lè Mowizi céw tóo, níì wi pye: «Wolo i syée tɛ́ɛgi ma, gee kéele na Yawe da gi joo lè níì jo: ‹Mii a gi kaan yele ma.› Da maa ní wolo ní, wolo a kacànna kpéʔele mɔ na. Níì cán Yawe n nyɔ́ɔgi fàli bi kacànna kpéʔele Isirayɛli na.»

³⁰ A Hobabi wi yari: «Mii a kári í, fwɔɔ mii tári, ní mii kpaʔa wóbèle má mii a lúru kári.»

³¹ A Mowizi jo: «Mii i mɔ nyɛ́ɛri, mɔ a kɔ́ láʔa wolo na bi kári í. Níì cán mɔ n wolo tɛɛ̀tɛ́nɛyi cán fìími tára ni, mɔ a pye wolo ma kôginiw.

³² Mɔ ga kári ní wolo ní, kacǎngee Yawe a kpéʔele wolo na lè, wolo a wɔ́ɔ mɔ kaan gi na.»

³³ A be yìri Yawe nyanbelegi taana n kári bi canya taanri tánʔana kpéʔele. A Yawe joogaanni kásu kíni pe yɛ́ɛgi na n cányi taanri tánʔana kpéʔele jàngó bi tɛɛ̀ŋɔndaʔa caa be ma.

³⁴ Lǎli ni pe ga yìri be tɛɛ̀tɛ́nɛgi ni ni syée lè, Yawe fàfaangi i gáà pye be ǹjogi ni, cángi làla ni.

³⁵ Joogaanni kásu ga yìri ni syée lǎli ni lè, Mowizi i gáà gi joo si jo: «Ee Yawe, ki n yɛlɛ mi yìri, mɔ nigoobèle si cariga. Mɔ parafɔbèle í fàn mɔ yɛ́ʔɛ ma.»

³⁶ Pe ga ni wi téeri lǎli ni lè, wi i gáà jo: «Ee Yawe, lúru mi pan Isirayɛli syɛ́ɛnmi selebingéle kagunɔ kagunɔbèlē tɛ́ɛyɛ sirakamayɛ ma.»