Córolo 1 - Cebaara Bible 2010

ISIRAYƐLI YE SINAYII FIIMI TARA NI Isirayɛli syɛɛnfeleyi córozelile

¹ Yawe n joo ní Mowizi ní Sinayii fìími tára ni, Syɛ́ɛnmi Tɛɛfaraga fànikpaʔa ni, pe yirili kàdoʔo ma Ezyipiti tári ni yɛɛziin wóli yeziin wóʔo cânzelige na, níì jo:

² «Ye Isirayɛli syɛ́ɛnmi myɛ mɛ́ɛyɛ sɛ́bɛ bi yɛlɛ ní be túluyi, ní be narigbaayi kánma ní. Mɔ a nǎnbèle myɛ nibin nibin sɛ́bɛ,

³ bi séli yɛ̀ʔɛlɛ toko wóbèle na ni syée poro yɛ́ʔɛ ma wóbèle kurugo, gee bee n jo bele myɛ be nyɛ lè Isirayɛli ye ni bi gbǎn kapɛɛnkpumɔn-yárira láa lè. Mɔ ní Aarɔn a be córo be kapɛɛnkpumɔnbèle kabiya ni.

⁴ Isirayɛli syɛɛnfeleyi myɛ nibin nibin nànbēle nibin nibin a pye ní yele ní, bele be nyɛ lè pe narigbaayi kùndigibéle.

⁵ Nǎnbèle bele pe a pye ní yele ní lè, poro mɛ́ɛyi yi nyɛ yee naa: Wurubɛn wów wi nyɛ Elisuri, wi lè Syedewuri jáaw.

⁶ Simeyɔn wów si i nyɛ Syelumyɛli, wi lè Surisyadayi jáaw.

⁷ Zyuda wów si i nyɛ Nasyɔn, wi lè Aminadabi jáaw.

⁸ Isakari wów si i nyɛ Netaneyɛli, wi lè Suwari jáaw.

⁹ Zabulɔn wów si i nyɛ Eliyabi, wi lè Helɔn jáaw.

¹⁰ Zyozɛfu jáabèle wòolo : Efirayimi wów i nyɛ Elisyama, wi lè Amihudi jáaw. Manase wów si i nyɛ Gamiliyɛli, wi lè Pedasuri jáaw.

¹¹ Bɛnzyamɛ wów si i nyɛ Abidan, wi lè Gidewonii jáaw.

¹² Dan wów si i nyɛ Ahiyezɛɛri, wi lè Amisyadayi jáaw.

¹³ Azɛɛri wów si i nyɛ Pagiyɛli, wi lè Okiran jáaw.

¹⁴ Gadi wów si i nyɛ Eliyazafi, wi lè Dewuyɛli jáaw.

¹⁵ Nɛfitalii wów si i nyɛ Ahira, wi lè Enan jáaw.»

¹⁶ Poro be nyɛ syɛ́ɛnmi wòolo, poro bele be yeri lè pe si i nyɛ pe syɛɛnfeleyi tofɔlɛɛyɛ fanʔafɔbiigéle, ní i nyɛ Isirayɛli syɛɛnnɛʔɛmi kùndigibéle.

¹⁷ A Mowizi ní Aarɔn nǎnbèle bee láa, poro bele pe da nyɛ́nɛ n wòlo lè pe mɛ́ɛyi na.

¹⁸ A be syɛ́ɛnmi myɛ kpóʔoro yeziin wógi cânzelige na. A pe be mɛ́ɛyi sɛ́bɛ n yɛlɛ ní be túluyi ní, pe tofɔlɛɛyi mɛ́ɛyɛ na n yɛlɛ ní be narigbaayi ní, n séli yɛ̀ʔɛlɛ toko toko wóbèle na ni syée poro yɛ́ʔɛ ma wóbèle kurugo.

¹⁹ A Mowizi be córo Sinayii fìími tára ni, n yɛlɛ ní gi ní àmɛɛ Yawe da gi joo n gbàn wi ma lè.

²⁰ Gee gi Isirayɛli jáaseliw Wurubɛn jáabèle kéele kwɔ́ɔ lè n yɛlɛ ní be taʔalaganmi ní, bi yɛlɛ ní be túlugi wòolo ní, n yɛlɛ ní be narigbaayi ní, a pe be nǎnbèle myɛ córo mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, gee bee n jo bele myɛ pe da pye bi gbǎn kapɛɛnkpumɔn-yárira láa lè,

²¹ nǎnbèle bele be córo lè Wurubɛn syɛɛnfelegi ni, pe maa pye sirakamayɛ siin ní selebingéle taanri ní saala siin ní dabata.

²² Simeyɔn jáabèle wòolo, n yɛlɛ ní be taʔalagèle, ní be túlugi wòolo ní, n yɛlɛ ní be narigbaayi ní, bele be córo lè mɛ́ɛyɛ na, nǎnbèle myɛ nibin nibin n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

²³ nǎnbèle bele be córo Simeyɔn syɛɛnfelegi ni lè, pe maa pye sirakamayɛ siin ní selebingéle kpanjɛrɛ ní saala kɔrɔni ní dabata.

²⁴ Gadi jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

²⁵ nǎnbèle bele be córo Gadi syɛɛnfelegi ni lè, pe maa pye sirakamayɛ siin ní selebingéle siin ní saala kɔrɔtaanri ní togoye siin ní kpɔrigɔ.

²⁶ Zyuda jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

²⁷ nǎnbèle be córo Zyuda syɛɛnfelegi ni lè, pe maa pye sirakamayɛ taanri ní selebingéle kɔrɔsiin ní saala taanri.

²⁸ Isakari jáabèle wòolo n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

²⁹ nǎnbèle bele be córo Isakari syɛɛnfelegi ni lè, pe maa pye sirakamayɛ siin ní selebingéle kɔrɔsiin ní saala siin.

³⁰ Zabulɔn jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo mɛ́ɛyɛ na lè nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

³¹ nǎnbèle bele be córo Zabulɔn syɛɛnfelegi ni lè, pe maa pye sirakamayɛ siin ní selebingéle kɔrɔtaanri ní saala kɔrɔsiin.

³² Zyozɛfu jáaw, Efirayimi jáabèle wòolo, n yɛlɛ ní be taʔalaganmi, ní be túlugi wòolo, ní be narigbaayi ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

³³ nǎnbèle bele be córo lè Efirayimi syɛɛnfelegi ni, pe maa pye sirakamayɛ siin ní saala siin ní dabata.

³⁴ Zyozɛfu jáaw Manase jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele pe da pye bi gbǎn kapɛɛnkpumɔn-yárira láa lè,

³⁵ nǎnbèle bele be córo lè Manase syɛɛnfelegi ni, pe maa pye sirakama ní selebingéle kɔrɔni ní sirakele.

³⁶ Bɛnzyamɛ jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

³⁷ nǎnbèle bele be córo lè Bɛnzyamɛ syɛɛnfelegi ni, pe maa pye sirakama ní selebingéle kɔrɔsiin ní saala kɔrɔsiin.

³⁸ Dan jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele pe da pye bi gbǎn kapɛɛnkpumɔn-yárira láa lè,

³⁹ nǎnbèle be córo Dan syɛɛnfelegi ni lè, pe maa pye sirakamayɛ taanri ní selebinnɛ ní saala taanri ní dabata.

⁴⁰ Azɛɛri jáabèle wòolo, n yɛlɛ ní be narigbaayi, ní be taʔalaganmi, ní be túlugi wòolo ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

⁴¹ nǎnbèle bele be córo Azɛɛri syɛɛnfelegi ni lè, pe maa pye sirakamayɛ siin ní saala kɔrɔsiin ní dabata.

⁴² Nɛfitalii jáabèle wòolo si na, n yɛlɛ ní be taʔalaganmi, ní be túlugi wòolo, ní be narigbaayi ní, bele be córo lè mɛ́ɛyɛ na nibin nibin, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, bele myɛ pe da pye bi gbǎn kapɛɛnkpumɔn-yárira láa lè,

⁴³ nǎnbèle bele be córo Nɛfitalii syɛɛnfelegi ni lè, pe maa pye sirakamayɛ siin ní selebingéle kɔrɔni ní saala kɔrɔsiin.

⁴⁴ Syɛ́ɛnbèle be córo lè, poro be nyɛ bele bee. Mowizi, ní Aarɔn, ní Isirayɛli kùndigibèle kɛɛ ní siin pe be córo. Pe maa nǎnbèle bee yirige nibin nibin Isirayɛli syɛɛnfeleyi myɛ ni n pye pe tofɔlɛɛyi yòdaʔaya kùndigibéle.

⁴⁵ Isirayɛli wóbèle bele myɛ be córo lè, n yɛlɛ ní be narigbaayi ní, n séli yɛ̀ʔɛlɛ toko wóbèle na, ni syée poro yɛ́ʔɛ ma wóbèle kurugo, Isirayɛli wóbèle bele myɛ pe da pye bi gbǎn kapɛɛnkpumɔn-yárira láa lè,

⁴⁶ poro bele myɛ be córo lè, pe nyɔ́ɔgi maa pye sirakamayɛ toko ní kpɔrigɔ ní selebinnɛ ní saala kɔrɔsiin ní togoye kɔrɔsiin ní kpɔrigɔ.

Levii ye yagana fáliw kéele

⁴⁷ Gee si gi Levii ye kéeli kwɔ́ɔ lè, n yɛlɛ ní be tofɔlɛɛyi syɛɛnfelege ní, poro da córo n le bele ni í.

⁴⁸ Yawe maa gi joo Mowizi ma níì jo:

⁴⁹ « Mɔ a kɔ́ Levii ye syɛɛnfelegi wòolo córo í, mɔ a kɔ́ be córo bi le Isirayɛli wóbèle bele ni í.

⁵⁰ Séeraw fànikpaʔa, ní gi yayigeleri, ní gi yáriri myɛ le Levii ye kɔ́yi ni. Pe a ra kpɔ̀ʔɔrɔli fànikpaʔa ní gi yayigeleri myɛ lée sáā gi fáliw kpéʔele. Pe a ra tɛ̀ɛ́n kpɔ̀ʔɔrɔli fànikpaʔa taana bi gi màʔa.

⁵¹ Kpɔ̀ʔɔrɔli fànikpaʔa larigɔ́nnɔ ga nan, Levii ye pe a gi waragi. Kpɔ̀ʔɔrɔli fànikpaʔa ga naà kóri, Levii ye a gi kóri. Wàa nikwɔɔ ga nùuni gi na, pe a wi kpóo.

⁵² Isirayɛli ye myɛ nibin nibin n yɛlɛ bi be fànikpaayi kóri be tɛɛkòrogi ni, pe myɛ nibin nibin í pye be káfalibèlē taana bi yɛlɛ ní be kapɛɛnkpumɔnbèle kabiya ní.

⁵³ Kàjáa Levii ye pe a ra tɛ̀ɛ́n bàā séeraw fànikpaʔa máari koro ga pye mii fundanʔari a kɔ́ too Isirayɛli syɛ́ɛnmi na í. Levii ye pe a ra séeraw fànikpaʔa kpáa wéle.»

⁵⁴ A Isirayɛli ye tɔ̀nɔ n ki myɛ kpéʔele ki kpéʔeleganmi na àmɛɛ Yawe da gi joo n gbàn Mowizi ma lè.