Kɔlɔsi ye 4 - Cebaara Bible 2010

¹ Yele bele ye nyɛ lè púlobèle kàfɔɔlɔ, gee gi sín lè ní gee gi yɛlɛ lè, ki n yɛlɛ yaa gee bee kpéʔele yele púlobèle ma, níì cán Kàfɔlɔ wɔ́ɔ i yaà yele na nyɛ̀ʔɛni na.

Láliiw wi joo n kaan lè

² Ki n yɛlɛ ye kòro nyɛ̀nɛ na yaa Kolocɔlɔɔ nyɛ́ɛri yáā bariga kaangi wi ma.

³ Ki n yɛlɛ ye wɔ́ɔ yaa nyɛ́ɛri wolo kéeli na, koro ga pye Kolocɔlɔɔ í kpàánweele múgu wolo ma syɛ́ɛnri joolo kéele na, jàngó wolo í da Kirisi kalarali kéele nyuu, loro lee kéele na pe mii pwɔɔ lè,

⁴ mii í da li fíligi da nyuu da tèé kánmee na gi yɛlɛ mii í da gi kpéʔele lè.

⁵ Ki n yɛlɛ yaa táanri sícilimɛ ni kàfugi wòolo kabaan na, yé lǎli còganma cán.

⁶ Ye yele nyɔɔsyɛɛnri myɛ yaʔa taa syɛ́ɛnbèle dɛ̀ɛmɛ́ làla o làla, ti pye ní solomɔ ní, koro ga pye yele í gi cán kánmee na gi yɛlɛ yele í da syɛɛnlurugori kaangi syɛ́ɛnbèle myɛ ma lè.

Fòosanw kéele

⁷ Wolo senyɛn-nidaanmaw Tisyiki wi lè tágala falipyeo ní wolo pulonyɛnnɛ Kàfɔw kólogo ni, woro a sa mii kérigèle myɛ tɛ̀ɛn yele na.

⁸ Kéeli bee tiimaa na mii wi tórigo yaà yele ma, koro ga pye yele í wolo kérigèle cán, woro si wɔ́ɔ yele kɛɛlɛ.

⁹ Mii n wolo senyɛn-nidaanmaw Onɛziimi tórigo ní wi ní, wi i nyɛ tágala syɔ́ɔn ní i nyɛ yele wówaa. Pe a sa nɛɛ naa kérigèle myɛ joo tɛ̀ɛn yele na.

¹⁰ Mii kàsolenyɛnw Arisitaki ní Barinabasi senyɛnw Mariki n yele syáanri, Mariki ga nan yaà yele na, ye wi sámaga ye cò àmɛɛ tundunri da jo n kwɔ́ɔ yele ma lè wi kéeli na.

¹¹ Zyezuwee be yiri lè Zyusitusi, wi n wɔ́ɔ̀ yele syáanri, bele bee yagana be nyɛ kɛ́nɛw fɔ̀ɔlɔ be báara ní mii ní lè Kolocɔlɔɔ fǎngi kéele na. Pe n baa pye mii ma kɛɛlɛlɛ sábabu.

¹² Epafirasi n yele syáanri wi nyɛ lè yele wówaa ní i nyɛ Kirisi Zyezu púlo, wi i nyɛ́ɛri ní lòmaana ní yele kéeli na làla o làla, koro ga pye yele í sámaga yére kòro wozinvorobéle ní si Kolocɔlɔɔ nyɛ́nɛ kéeli sámaga cán bi foro.

¹³ Mii i nyɛ wi séera ncan yele kéeli n tɔ̀nɔ n wári wi na gbanʔama n fàra Lawodise ye, ní Hirapolisi ye kéeli na.

¹⁴ Wolo syɛɛn-nidaanmaw Luki wi nyɛ lè lɔ̀ʔɔtɔrɔw, woro ní Demasi n yele syáanri.

¹⁵ Ye Nimifa syáanri ní Egiliziw ní wi nyɛ lè wi kpáagi ni, n fàra wolo senyɛnbèle na be nyɛ lè Lawodise ni.

¹⁶ Yele ga sáà sɛ́bɛw naa wéle n kwɔ́ɔ, ye wi tórigo Lawodise ye Egiliziw ma woro í wɔ́ɔ sa wi wéle, sɛ́bɛwee si wi a yìri Lawodise ma bi pan yele ma lè, ye wɔ́ɔ ba wee bee wéle.

¹⁷ Ye gi joo Arisyipi ma yé wi pye waa wi fáliw kɔ̀rɔsíi wee Kàfɔw kaan woro ma lè, koro ga pye woro í wi kpéʔele foro.

¹⁸ Mii Pɔli tiimaa kɔ́gi gi fòów naa sɛ́bɛ. Ye sɔ̀ngi ye taa gi na àmɛɛ pe mii pwɔɔ lè. Ki n yɛlɛ Kolocɔlɔɔ í kpɔ́ʔɔri kaan yele ma!