Kɔlɔsi ye 3 - Cebaara Bible 2010

¹ Amɛɛ yele pínɛ n nyán ní Kirisi ní lè, gee bee na gi yɛlɛ yele í da ǹjoʔo ma yáriri caa, beè Kirisi nyɛ lè wodɛ́ɛɔn ní Kolocɔlɔɔ kàliige kɔ́lɔ ma.

² Ye yele fúnyi yaʔa yi pye ǹjoʔo ma yáriri na, yele a kɔ́ yi yaʔa yi kòro dulunyanw yárira na í.

³ Níì cán yele n kùu, á yele sìíw si i nyɛ làrama ni ní Kirisi ní, Kolocɔlɔɔ ni.

⁴ Kirisi wi nyɛ yele sìíw, wi ga baa wiyɛɛ dɛ̀ɛn lǎlee ni lè, lǎli bee ni wi a wɔ́ɔ yele tɛ̀ɛn ní wiyɛɛ ní nìjangbɔɔri ni.

Kanlɛɛmi ní kanvɔnmi kéele

⁵ Gee bee na gi yɛlɛ yele í yele kanlɛɛmi kèlē kpóo ge nyɛ lè ceyuugi, ní nànyuugi, ní kanɔnʔɔri, ní céri ki laànitaʔa kérigèle, ní sɔ̀ngubeeri, ní fungbɔɔgi ní, ki nyɛ lè yasunzunro.

⁶ Koro gi Kolocɔlɔɔ fundanʔari yaari a ti i tuun [wi syɛ́ɛnri céefɔɔlɔ na].

⁷ Kánmi bee na si yele da wɔ́ɔ ni táanri booma ni, lǎlee ni yele da ni kapeegèle bee kpéʔele lè.

⁸ Ki si n yɛlɛ yele í wɔ́ɔ láʔa kérigèle naa na tɔ́ɔliw ni, ge nyɛ lè: funbɛɛnri, ní fundanʔari, ní funbeegi, ní mɛ́ɛkalagiri, ní fɛ̀ɛfɔnmi syɛ́ɛnrɛ ní di yirigi lè yele nyɔ́ɔyi ni.

⁹ Ki ga yɛlɛ yele í kɔ́ ra finɛ yeyɛɛ ma í, àmɛɛ yele kanlɛɛmi ní bi kapyegèle wòlo yeyɛɛ na lè,

¹⁰ níì kanvɔnmi le yeyɛɛ na, kàa i fàrá kanvɔnmi bee na làla o làla ni yɛlɛgi ní bi faanfɔw kánma ní, koro ga pye yele í ba kérigèle myɛ cán.

¹¹ Koro na láʔala o nyɛ Girɛkibèle ní Zyefubèle nínge ni í, láʔala o wɔ́ɔ̄ nyɛ kɛ́nɛkpeʔelebèle ní sìngɛnɛbèle nínge ni í, wàlá Girɛkinaa-sìnjánbèle, ní Sitii ye, ní púlobèle, ní wɔ́rɔbèle nínge ni í. Kirisi wi nyɛ pe myɛ nyúngo na, ní wɔ́ɔ i nyɛ pe myɛ ni.

¹² Gee bee na, àmɛɛ yele nyɛ lè Kolocɔlɔɔ wonyɛnɛ-wòlobēle, ní wi syɛɛncanbéle, ní wi syɛɛn-nidaanmabéle, ki n yɛlɛ yele í dee naa le yeyɛɛ na, di nyɛ lè nyinidaari, ní funjǎngi, ní màabyeri, ní fûnnyingi, ní kpàracogi ní.

¹³ Kapye yele wàa i sɔ̀ngí wàa n kapeele pye woro na, ki n yɛlɛ yaa yeyɛɛ kpàracó yáā yeyɛɛ kùsulugi syoo. Kánmee na Kàfɔw yele kùsulugi syɔɔ lè, ki n yɛlɛ ye wɔ́ɔ yaa yeyɛɛ kùsulugi syoo kánmi bee na.

¹⁴ Gee si gi kpɔ́ʔɔ n sɔ̀lɔ lè ki myɛ na, koro gi nyɛ ye tàmaga le ní yeyɛɛ ní, tàmagi ki a yele pwɔɔ yeyɛɛ na bi foro.

¹⁵ Fûnnyingi Kirisi kaangi lè, ye gee bee yaʔa kaa yele fúnyi kàragí, koro gee kéele na Kolocɔlɔɔ da yele yeri lè níì jo yele í pye cere nibin. Ki n yɛlɛ yaa bariga kaangi wi ma.

¹⁶ Yé Kirisi syɛ́ɛnri yaʔa di tɛ́ɛn yele fúnyi ni saʔa, yáā yeyɛɛ dama, yáā yeyɛɛ kɛɛlɛ sícilimi myɛ ni ní Kolocɔlɔɔ yɛ́ɛgi fyáara ŋúnuyo, ní Kolocɔlɔɔ kpɔ̀ʔɔrɔli ŋúnuyo, ní Kolocɔlɔɔ kôdanʔari ŋúnuyo ní. Yaa ŋúu yáā bariga kaangi Kolocɔlɔɔ ma ní yele fúnyi myɛ ní.

¹⁷ Yariga o yariga yele kpéʔele lè, a ki i nyɛ syɛɛnjóoro yoo, wàlá kapyele yoo, ki n yɛlɛ yaa ki myɛ kpéʔele Kàfɔw Zyezu mɛ́ɛgi na, yáā bariga kaangi Tofɔw Kolocɔlɔɔ ma wi bárigaw ni.

Kánmee na syɔɔn yɛlɛ wi pye lè sìifɔnw ni

¹⁸ Cébèle, ki n yɛlɛ yaa lúro yele nǎnbèle ma àmɛɛ gi yɛlɛ kaa kpéʔele lè Kàfɔw ni.

¹⁹ Nǎnbèle, ki n yɛlɛ ye tàmaga le ní yele cébèle ní, yele a kɔ́ ra túngu ní be ní í.

²⁰ Pìíbèle, ki n yɛlɛ yaa lúro yele seefɔbèle ma kérigèle myɛ ni, níì cán gee bee gi Kàfɔw dɛ́nɛ.

²¹ Tofɔbèle, ki ga yɛlɛ yele í yele pìíbèle fúnyo kaan yaa taanri í, koro ga pye pe fúnyi í kɔ́ ra curugu í.

²² Púlobèle, bele be nyɛ lè yele kàfɔbèle céri kàbaan na, ki n yɛlɛ yaa lúro be ma kérigèle myɛ ni, ki ga yɛlɛ yele í da báara pe nyaani yagana kéele na í, ki pye mɔ a jo syɛ́ɛnbèle kanidaangéle yele kpéʔele í, fwɔɔ yaa lúro be ma ní funviire ní, àmɛɛ yele fɛ̀ɛgí lè Kàfɔw na.

²³ Yariga o yariga yele kpéʔele lè, ki n yɛlɛ yaa gi kpéʔele ní yele fúnyi myɛ ní, ki pye mɔ a jo Kàfɔw má yele gi kpéʔele, syɛ́ɛnbèle má ban í,

²⁴ si gi cán Kàfɔw a kɔrigɔ kaan yele ma ki pye yele tɔ̀nɔw. Kàfɔwee má yele báara lè, woro wi nyɛ Kirisi.

²⁵ Wee si ga pye lè wi o síngi í, wee bee a ba wi sìnzinmi tɔ̀nɔ taa, níì cán Kolocɔlɔɔ o syɔɔnwaa yirigi wàa ni í.