Kɔlɔsi ye 2 - Cebaara Bible 2010

¹ Mii i caa yele í gi cán kánmee na mii kapɛɛnni kpúmɔn lè gbanʔama yele, ní Lawodise ye kéeli na, n fàra bele myɛ na be nyɛ lè pe ga kɔ́ɔ̀ mii tiimaw nyaa í,

² koro ga pye bi be kɛɛlɛ, pé tan peyɛɛ na tàmagi ni, pé Kolocɔlɔɔ kéeli cán bi fílige si tága li na, koro si pye be ma àmɛɛ lɔnɛʔɛrɛ nyɛ lè, pé wɔ́ɔ Kolocɔlɔɔ kalarali cán bi fílige, li lè Kirisi,

³ woro wee ni lɔnɛʔɛri nyɛ lè làrama ni, ti lè sícilimi ní kérigèle cánna.

⁴ Mii i gee bee nyuu koro ga pye syɔɔn faala a kɔ́ yele fáana pùuni ní wi sícili-zyɛ́ɛnrɛ ní í.

⁵ Alí n gi yaʔa mii o yaà ní yele ní céri kàbaan na í, ye gi cán mii sɔ̀nguri i yaà ní yele ní. Amɛɛ mii gi nyaa lè yele tánʔaganmi n nyɔɔ, á yele tágali báriga Kirisi ni, mii i fundaanra kpéʔele gee bee na.

Sìíw wovoroo wi taa Kirisi ni lè

⁶ Koro na kánmee na yele da fɔ̀lɔ wolo Kàfɔw Kirisi Zyezu na lè, ki n yɛlɛ yaa táanri wi ni kánmi bee na.

⁷ Ye nìnre wáa yé sámaga ye yére, yé nìrimɛ le yeyɛɛ ni tágali ni bi yɛlɛ ní tamani ní lee na pe da yele tama lè, yáā bariga kaangi gbanʔama.

⁸ Yaa yeyɛɛ kɔ̀rɔsíi koro ga pye syɔɔnwaa faala a kɔ́ yele cǒ lége puloro ni ní wi sícili-zyɛ́ɛnri, ní wi gbanzan fáanagi ní í, pe i dee bee tímana ni yɛlɛgi ní syɛ́ɛnbèle kalɛɛgéle, ní dulunyanw tamana ní, ti si ga yɛlɛ ní Kirisi kéeli ní í.

⁹ Níì cán kánmee na Kolocɔlɔɔ nyɛ lè, kánmi bee myɛ i nyɛ Kirisi céri ni n foro.

¹⁰ Kirisi wi tɛ́ɛn lè fǎnyi, ní séew myɛ nyúngo na, Kolocɔlɔɔ n yele nyìn n foro wi ni.

¹¹ Woro ni be yele kɛ́nɛ, syɔɔn ban wi yele kɛ́nɛ í, kɛ́nɛw bee i nyɛ Kirisi wóo, gee bee n jo àmɛɛ syɔɔn a céri kínidɛnɛgɛ kele yaʔa lè.

¹² Lǎli ni yele batize lè, yele n pínɛ n tɔ́n ní Kirisi ní, ní wɔ́ɔ̀ nyán n yirige ní wi ní tágali báriga ni, àmɛɛ yele tága Kolocɔlɔɔ fǎngi na lè, woro wee wi wi nyán n yirige lè kúbèle nínge ni.

¹³ Amɛɛ yele da pye lè kapeebyeri ni, níì pye sìngɛnɛ ni yele tánʔaganlɛɛmi ni lè, yele maa pye woguubéle ní, Kolocɔlɔɔ si n yele nyán n wéege ní Kirisi ní níì yele kapeegèle myɛ kùsulugo syɔɔ.

¹⁴ Làlwaw tundunro ti da sɛ́bɛ wolo kánmi na lè n wolo kolomi tɛ̀ɛn, wi n di kurugo n láʔa. Wi n di sàa àmɛɛ wi di kóri lè tiiparigi na.

¹⁵ Wi n fànʔafɔbèle ní séekpɔɔw fɔ̀ɔlɔ fanya syɔɔ be ma, níì be kolomi yirige gbɛ̀ɛ́nmi na, àmɛɛ wi fànʔa taa lè be na tiiparigi báriga ni.

¹⁶ Gee bee na yele a kɔ́ syɔɔnwaa faala yaʔa wi kolomɔ kaan yele ma yele lìíli ní yele gbaali kéele na í, koro ga jáa fɛ́tii, wàlá yevɔngɔ, wàlá cândɛnɛgɛ kéele na í.

¹⁷ Kérigèle bee i nyɛ gele kànyingéle gele ge maa lè, Kirisi kéeli si li nyɛ wodeeli.

¹⁸ Syɔ́ɔnwee wi caa lè bi wiyɛɛ dɛ̀ɛn màabyeo ní i nyɛ̀ʔɛni tundunbéle kpɔ̀ʔɔrɔ́, yele a kɔ́ syɔ́ɔnw bee félege yaʔa wi yele kaan yele í bɔ̀nɔ í. Wi n wiyɛɛ daʔa wi kanyaagèle na ní i wiyɛɛ gbɔ́ʔɔgi gbanzan, wi sɔ̀nguri i nyɛ céri kèlē na.

¹⁹ Wi ga Kirisi cò gbanʔama í, wi lè nyǔngi, gee gi céri tɛ́ɛyɛ myɛ màko nyɔɔgi lè, níì yi sogi yiyɛɛ na yi tɛɛsogiyi ní kapanyi báriga ni, jàngó céri í da kpɔ́ʔɔgi bàā yɛlɛgi ní Kolocɔlɔɔ kínidɛnɛgi ní.

Wolo n kùu níì nyán ní Kirisi ní

²⁰ Amɛɛ yele kùu lè ní Kirisi ní dulunyanw kalɛɛgéle kabaan na, nyàʔá si na yele táanri mɔ a jo yele i nyɛ dulunyanw wòolo, ní i tundunri naa jàtée, dee di joo lè:

²¹ «Mɔ a kɔ́ gee láa í! Mɔ a kɔ́ gee lìi í! Mɔ a kɔ́ tánga gee na í?»

²² Yáriree ní syɛ́ɛnbèle pe màkow nyɔɔgi lè, ti a ba kwɔ́ɔ. Tundunri bee ní tamani bee myɛ i nyɛ syɛ́ɛnbèle wóro.

²³ Kányɛʔɛ ni syɛ́ɛnbèle nyɛ́nɛ na pe kérigèle bee i nyɛ sícilimɛ wòʔolo, àmɛɛ pe be kpɔ̀ʔɔrɔli kpéʔele lè ni yɛlɛgi ní be funzɔnguri ní, ní i màámi kpéʔele, ní wɔ́ɔ i be céri wɔʔɔ lè, kàjáa tɔ̀nɔ o nyɛ kérigèle bee ni í, ke a gbǎn fànʔa taa céri ki laànitaʔa kele na í.