Amɔsi 9 - Cebaara Bible 2010

Yanyaa-kagunɔ wógi

¹ A mii Kàfɔw nyaa woyéreo ní sáriga-wòlo-yafaangi na. A wi i gi nyuu níì jo: «Ki n yɛlɛ mi ǹjogi yataʔaga kpúmɔn, koro ga pye táàmaw í cúngo. Pe myɛ nyúnyo tɔ́nʔɔnɔ be na! Mii a be pìíbèle kpóo ní ŋɔsée ní. Wee wi fàn be níngi ni lè, wi a kanmaa taa bi fǎn syɔɔ í, wogorowaa faala a taa syɔɔ í.

² Alí pe ga tìgi n jée kúbèle tɛɛkòrogo ni, mii kɔ́gi a be cò yaà bi yirige naa. Alí pe ga lúgu nyɛ̀ʔɛni na, mii a be cò yaà bi tìrige naa.

³ Alí pe ga ni làrá Karimɛli nyanbelegi ǹjoʔo ni, mii a sa be caa bi cò yaà beè. Alí pe ga ni làrá mii na sólomi lɔ̀ʔɔ fúngo ni, mii a gi joo gbàn wàbiga ma ki be nɔngi yaà.

⁴ Alí pe ga kíni pe nigoobèle yɛ́ʔɛ ma ni syée púlori na, mii a gi joo gbàn ŋɔséew ma wi be kpóo yaà. Mii a mii nyapili le be ni bàā wéle be kapeʔe kéele na, ki a pye be kacànna kéele na í.»

⁵ Kàfɔw Yawe wi lè Nyɛ̀ʔɛni Sùlasiibéle Kàfɔlɔ, woro wi tángi tári na, ti n ni cɛ̀lɛ́, ti syɛ́ɛnbèle myɛ n pye kùu káyaʔa na, ti myɛ i nyìngí àmɛɛ Niili cábigi nyɛ lè, ti i tíri àmɛɛ Ezyipiti cábigi nyɛ lè.

⁶ Wi n wi tɛɛkòrogi faan nyɛ̀ʔɛgèle ǹjoʔo ni, níì wi nyɛ̀ʔɛni kàpɔɔn le tári na. Wi i sólomi lɔ̀ʔɔ yiri n ba ni ŋuu tári na, wi mɛ́ɛgi gi nyɛ Yawe.

Kolomɔfɔbèle kútii

⁷ «Yele Isirayɛli yòdaʔayi, yele o nyɛ mii ma àmɛɛ Etyopii ye pìibēle nyɛ lè ì? Mii ban wi Isirayɛli ye yirige Ezyipiti ni, níì Filisitini ye yirige Kafitɔri ni, níì Sirii ye yirige Kiiri ni ì?» Yawe wi jo nya.

⁸ «Wéle, Kàfɔw Yawe nyɛ́nɛ i nyɛ fǎngee na gi kolomi kèlē kpéʔele lè. Mii a gi kálagi bi yirige tári ni, koro ní ki myɛ ní mii a Zyakɔbi kpáagi wòolo myɛ kálagi kwɔ́ɔ péw í,» Yawe wi jo nya.

⁹ «Níì cán wéle mii a syɛ́ɛnri naa joo gbàn, mii a Isirayɛli kpáagi wòolo cúngo syɛɛnfeleyi myɛ nínge ni àmɛɛ be yarira cúngu lè tàmá ni, làa nibin si a too tári na í.

¹⁰ Bele myɛ be nyɛ lè kapeebyebèle mii syɛ́ɛnbèle ni, ŋɔsée wi a be kpóo, poro bele be gi nyuu lè níì jo: ‹Mɔ a tée fɔ̀lɔ́ wɔʔɔli yaʔa li nùuni wolo na, pé náa kɔ́ jo li a nan wolo na wii í.› »

Gàlagíw kàdoʔo ma kéele

¹¹ «Cángi bee na Davidi vǒgi gi too lè, mii a ní gi yìrige, mii a gi tɛɛ̀kalagiyi sámaga. Mii a gi gurubɛɛtoori yìrige bi ní gi faan gi pye àmɛɛ ki da sélì pye lè,

¹² koro ga pye pe Edɔmi wogorobèle fáliga taa, bi fàra syɛɛnfeleyi wozanya fáliga na, yoro yee na mii mɛ́ɛgi da ni yiri lè,» Yawe wi a gee bee myɛ kpéʔele foro lè, woro wi jo nya.

¹³ «Wéle, canyaa i maa, yee ni tèfalaw a ba ra yaliilaaw fèʔelé lè, ní wee wi Ɛrɛzɛnw fórogi lè woro í da yaliilùguw fèʔelé,» Yawe wi jo nya. «Ɛrɛzɛn lógi a ba ra fóo bàā tíri nyanbeleyi na, ki a ra fóo dǎndamayi myɛ na.

¹⁴ Isirayɛli ye be lè mii syɛ́ɛnbèle, poro bele be cò n kári lè, mii a be lúrugo pan. Kěyee yi da jaa lè, pe a ní ba yi faan bi tɛ́ɛn yi ni, pe a ba ra ɛrɛzɛn tíriri cɔ́rɔ sáā di dùvɛɛnw gbo, pe a ba ra nángwɔɔbèle fála, sáā be yasanri líi.

¹⁵ Mii a be cɔ́rɔ be tári ni, pe a ní kɔ́n bi yirige be tári ni í, toro dee mii kaan be ma lè,» Yawe mɔ Kolocɔlɔw wi jo nya.