Amɔsi 8 - Cebaara Bible 2010

Yanyaa-sicɛrɛ wógi: Sɛ̀ʔɛlɛ ní yasanra

¹ Gee Kàfɔw Yawe mii yaʔa a mii nyaa lè, koro gi nyɛ gee naa, ki maa pye yasanlɛɛgwɔɔrɔ sɛʔɛlɛ.

² A wi mii pye: «Amɔsi, nyàʔá mɔ nyaa?» A mii wi yari: «Yasanlɛɛgwɔɔrɔ sɛʔɛlɛ.» A Yawe mii pye: «Mii syɛ́ɛnbèle Isirayɛli ye làrigwɔɔli li lɛɛ n kwɔ́ɔ nya. Mii a tée ní be kùsulugi syɔɔ í.

³ Cángi bee na fànʔafɔ-gbaagi ŋúnuyo a ba kàri bi pye cɛ́ɛnmɛ,» Kàfɔw Yawe wi jo nya, «kúbèle a tɔ̀nɔ́ ba nɛʔɛ, pe a ra be wábagi da máari tɛ́ɛyi myɛ ni pyèrio.»

Jàgiwáabèle ki laànitaʔa i gàlagí yiri

⁴ Yele bele ye fɔ̀ngɔfɔw jóori lè ní i foomɔfɔbèle kwóo ni yirigi tári ni, ye gee naa lóʔo.

⁵ Yele i gi nyuu níì jo: «Làlìí ni yevɔngi fɛ́tii a sɔ̀lɔ, koro ga pye wolo í da wolo yaliiri pára? Làlìí ni cândɛnɛgi a sɔ̀lɔ koro ga pye wolo í gbòdungèle taa bi múgu?» Wolo a yakirili cɛ́rɛ, wolo a yaliiri lɔ́rɔ gbàn, wolo a cúlobèle sámaga bi kàriga bàā nɔ̀ʔɔrɔgi kpéʔele.

⁶ Wolo a ra foomɔfɔbèle syoo wálifiio na, si fɔ̀ngɔfɔw fàli taʔaladɛ́ʔɛ nibin na, sáā yaliisigiri pínɛ yaliiri ni bàā pára.

⁷ Yawe n kàli, Zyakɔbi nɛ̀ɛgbɔʔɔgi na níì jo: «Mii a tée fɛ̀ʔɛ be kapyelaa faala na nyáana í.

⁸ Gee bee a tári kaan di cúngo, di syɛ́ɛnbèle myɛ si pye kùu káyaʔa na ì? Tári myɛ a ba nyìn àmɛɛ cábigi nyɛ lè. Ti a ba nyìn si ní tìgi àmɛɛ Ezyipiti cábigi nyɛ lè.

⁹ Cángi bee na mii a gi yaʔa cángi í too lǎli ni ki ga tɛ́ɛn nyùngo ni lè, si tári kàriga yébiliwɔɔlɔ cânvulɛɛli làla ni,» Kàfɔw Yawe wi jo nya.

¹⁰ «Mii a yele fɛ́tiibèle kàriga kùu káyaʔa, yele ŋúnuyi myɛ si kàri kayaʔa nyɛnigɛ, mii a syɛ́ɛnbèle myɛ pwɔɔ sárigèle ni ní gɔ̀nvaʔaya ní, si nyǔnyi myɛ folo. Mii a tári lége kùu káyaʔa ni, ki a pye àmɛɛ syɔɔn gáā nyaan lè wi pìinibinge kuu kéele na. Ti kwɔ́ɔganmi a tɔ̀nɔ́ ba pye cangbanga.

¹¹ Wéle, canyaa i maa, yee ni mii a ba kateʔe cáan lè tári na, ki si a pye yaliiri kateʔe í wàlá lògbaʔa kéele í, fwɔɔ Yawe syɛ́ɛnri lóʔolo kateʔe ki a pye,» Kàfɔw Yawe wi jo nya.

¹² «Pe a pye ninyaari-mí-màʔaya bi yìri sólomi lǒgee ma bi kári gee ma bi séli solomɔkulo kàbangi na bi sa nan canʔafolomɔ kabangi na. Pe a ra tàgatága da máari bàā Yawe syɛ́ɛnri caa, pe si a di nyaa í.

¹³ Cángi bee na pìcaacǎnbèle ní nìgɔcaribèle a ra círigi lògbaalaagi kéele na.

¹⁴ Poro bele be kɛ̀ɛ́ lè Samarii kapeeli na, ní i gi nyuu níì jo: ‹Ki n yɛlɛ mɔ kolocɔlɔw Dan í kòro beè sìi na ! Bɛɛri-Syeba kólogi i kòro beè sìi na!› Poro a too, pe si a ní yìri nyáana í.»