Amɔsi 7 - Cebaara Bible 2010

Amɔsi yanyaazeligi: Kúdow

¹ Gee Kàfɔw Yawe mii yaʔa a mii nyaa lè, koro gi nyɛ gee naa, mii maa gi nyaa a wi kúdo sámaga lǎli ni nyàákɔnigwɔɔgi nyàányunro séli ni fún lè, gee fànʔafɔw da kɔni lè.

² Amɛɛ si wi tári nyàā myɛ lìi n kwɔ́ɔ lè, a mii jo: «Kàfɔw Yawe, mii i mɔ nyɛ́ɛri, wo kùsulugi syɔɔ. Kanmìí na Zyakɔbi a ní fànʔa taa bi sɛ́ɛ? Níì cán wi n cɛ́rɛ n sɔ̀lɔ.»

³ A Yawe kàdoʔo wáa gee bee pyele ma níì jo: «Gee bee a ní pye í.»

Yanyaa-ziin wógi: Náagi

⁴ Gee Kàfɔw Yawe mii yaʔa a mii nyaa lè mii maa gi nyaa a Kàfɔw Yawe naà tɛ́ʔɛ n kútiiw joo, a náagi weekpɔɔ-cùrugi sórigo, ní i tári sórogi.

⁵ A mii jo: «Kàfɔw Yawe, mii i mɔ nyɛ́ɛri, yére nya. Kanmìí na Zyakɔbi a fànʔa taa bi sɛ́ɛ? Níì cán wi n cɛ́rɛ n sɔ̀lɔ.»

⁶ A Kàfɔw Yawe kàdoʔo wáa gee bee pyele ma níì jo: «Gee bee a ní pye í.»

Yanyaa-taanri wógi: Gûnzin-túnmɔnyini

⁷ Gee Kàfɔw tɛ̀ɛn mii na lè koro gi nyɛ gee naa, mii maa wi nyaa a wi yére gungo ǹjoʔo ni, gee ki da tímana n pye kiyɛɛ nyɔ́ɔ na lè, gûnzin-túnmɔnyinɛ si i nyɛ wi kɔ́gi ni.

⁸ A Yawe mii pye: «Amɔsi, nyàʔá mɔ nyaa?» A mii wi yari: «Gûnzin-túnmɔnyinɛ mii nyaa.» A Kàfɔw jo: «Wéle, mii a gûnzin-túnmɔnyinɛ lége mii syɛ́ɛnbèle nínge ni pe lè Isirayɛli ye. Mii a tée ní be kùsulugi syɔɔ í.

⁹ Izaaki sáriga-wòlo-tɛ́ɛyi a ba kpúmɔn kálagi. Isirayɛli ye tɛɛcǎnyi a ba kálagi. Mii a ba ŋɔsée láa bi yìri Zyerobowami kpáagi wòolo kurugo.»

Amɔsi n nɛnɛ n yirige Betɛli ni

¹⁰ Lǎli bee ni Amasya wi pye lè Betɛli sáriga-wòlow, a woro tun be sa Isirayɛli fànʔafɔw Zyerobowami pye: «Amɔsi n nyɔɔ kúun mɔ na Isirayɛli kpáagi wòolo nínge ni. Tári syɛ̀ɛnnɛ a ní gbǎn wi syɛ́ɛnri myɛ kpàraco í.

¹¹ Níì cán Amɔsi i gi nyuu kánmi naa na níì jo: ‹Pe a Zyerobowami kpóo ní ŋɔsée ní, Isirayɛli ye si cò bi yirige be tári ni bi kári léelige.› »

¹² A Amasya Amɔsi pye: «Yanyaaɔ mɔ, sɔ̀lɔ maa syée. Da fé maa syée mi sa tɛ́ɛn Zyuda tári ni maa líi yaà beè, máā kérigèle nyaagi maa nyuu yaà beè.

¹³ Mɔ a ní kɔ́ ra kérigèle nyaagi bàā nyuu nɛɛ naa Betɛli ni í. Níì cán fànʔafɔw tɛɛcànga gii, ní fànʔafɔlɔ kpaʔa.»

¹⁴ A Amɔsi Amasya pye: «Mii o nyɛ kanyaajooo í, wàlá kanyaajooo jáa í, yaweenaʔaɔ mii nyɛ, ní děsyaantiire sefalaɔ.

¹⁵ Kàjáa Yawe n mii cò n lúrugo yaweeri kurugo, Yawe si n mii pye: ‹Da syée mi sa ra kérigèle nyaagi maa nyuu mii syɛ́ɛnbèle ma, pe lè Isirayɛli ye.›

¹⁶ Tɔ́ɔliw ni ki n yɛlɛ mi Yawe syɛ́ɛnri lóʔo, mɔ wee wi gi joo lè níì jo: ‹Mɔ a kɔ́ ra kérigèle nyaagi bàā nyuu Isirayɛli ye kéeli na í, mɔ a kɔ́ ra nyuu Izaaki kpáagi wòolo kéele na í.›

¹⁷ Gee bee na Yawe syɛ́ɛnri naa joo níì jo: ‹Mɔ céw a ba ra nànjaari kpéʔele kěgi ni. Ŋɔséew a mɔ nanbiigèle, ní mɔ calipiigèle kpóo cáan, mɔ tári a tíla tíla ní mɛɛnnɛ ní bi lɛɛ. Mɔ si na, mɔ a sa kùu tánɔnʔɔrɔ ni, Isirayɛli ye si cò bi yirige be tári ni bi kári léelige.› »