Amɔsi 6 - Cebaara Bible 2010

Sɔ̀ngumɔ tɛɛtaʔa-váanaga

¹ Wɔʔɔlɔ i nyɛ bele na be tɛ́ɛn lè ŋɔ́ndaala na Siyɔn ni, ní bele na be tɛ́ɛn lè yɛɛ̀nyinge na Samarii nyanbelegi na, ní wogbolobèle bee na pe nyɛ lè syɛɛnfeleyi wózelige poro bele kurugo Isirayɛli kpáagi wòolo syée lè.

² Ye sɔ̀lɔ ye kári Kaline ma ye sa nyaa, yé yiri yaà beè ye kári Hamati ma, ki lè wogbɔɔgi, yé tìgi Gati ma, ki lè Filisitini ye wógi. A kěyi bee báriga lé n sɔ̀lɔ yele fǎnyi siin na? Ba a be tásaligi kpɔ́ʔɔ lé n sɔ̀lɔ yele wógi na?

³ Yele i sɔ̀ngí bi wɔʔɔgi canʔa léeli yaà, ní si i péemi fànʔa nùuní naa.

⁴ Pe i sìnɛ́ sogǎngèle yasinɛyɛ na, pe i peyɛɛ zánʔana fundaanra na làgoyi na ní i bàtogi bàpiiye káa n fàra náapiiyi na be cáan a yi sìnmɛ le lè.

⁵ Pe i nyùngo fun ŋúnuyi kpúmɔn kɔ̀ríw ni, ní i sɔ̀ngí poro n ŋúnuyi yatingbumɔnrɔ cán àmɛɛ Davidi da pye lè.

⁶ Pe i dùvɛɛnw yagbaanyɛnyɛ gbo, ní i sìnjǎnmi tíre. Zyozɛfu kálagili kéele si o be yáa í.

⁷ Koro na tɔ́ɔliw ni, pe a be cò bi kínige wojo-mí-káribèle yɛ́ʔɛ na bi kári. Fundaanri bee fɔ̀ɔlɔ liigboloyo a kwɔ́ɔ.

Samarii kálagili kéele

⁸ Kàfɔw Yawe n kàli wiyɛɛ mɛ́ɛgi na, Yawe Kolocɔlɔɔ wi lè Nyɛ̀ʔɛni Sùlasiibéle Kafɔlɔ, wi n jo: «Zyakɔbi kpɔ́ɔmi i nyɛ mii ma yanɔnʔɔgɔ, wi kpaakpoloyi kéele n mii bɛɛn. Mii a kěgi ní gi fúngi yárira myɛ le kɔlɔ̀ ni.»

⁹ Nànbēle kɛɛ ga kòro kpaagaa ni, pe a kùu.

¹⁰ Wàa senyɛnnɛ ga pan ba wi kúceri láa bi sórigo ní ba ni be kaceleyi lée ni yirigi kpáagi ni, wi a ba wee yíbe wi nyɛ lè kpáagi fúngo ni si jo: «A wàa ní i lé naa ní mɔ ní?» Wi a wi yari: «Wàa o naa í.» Wi a wi pye: «Pyèri yaà! Níì cán Yawe mɛ́ɛgi ga yɛlɛ wo gi yeri í.»

¹¹ Wéle, Yawe wi dee naa joo n gbàn níì jo woro a kpaakpɔɔgi cáan kàriga gurubɛʔɛ si kpaapili jaa bi kàriga kàboloro.

Gbanzan fàndaatɛɛyɛ siin

¹² «A syɔ́ɔnyi fé lé fálaga na? A pe i fála lé gi na ní nìye ní? A yele si i caa bàā kányɛɛgi kàragí sɔɔnrɔ, ní i sínni yasanra kàragí kòbi.

¹³ Yele i fundaanra kpéʔele gee kéele na gi nyɛ lè gbanzan. Yele i gi nyuu níì jo: «Wolo fǎngi báriga ni ban wolo séew taa ì?»

¹⁴ Gee bee na yele Isirayɛli kpáagi wòolo, ye wéle, mii a syɛɛnfelegaa yìrige yele kurugo, gee ki a ba fǎngi gbàn yele na lè, bi séli Hamati tɛɛ̀jeeli na fwɔɔ bi sa nan Araba lòcoologi na.» Yawe Kolocɔlɔɔ wi nyɛ lè Nyɛ̀ʔɛni Sùlasiibéle Kafɔlɔ, woro wi jo nya.