Amɔsi 5 - Cebaara Bible 2010

Kùu káyaʔa ŋúnugo Isirayɛli ye kéeli na

¹ Yele Isirayɛli kpáagi wòolo, ye syɛ́ɛnri naa lóʔo, ye funbɛɛnrɛ ŋúnugi lóʔo, gee mii ŋúu yele kéeli na lè.

² «Nàngeele sinján pìcaaw Isirayɛli n too, wi a tée ní yìri í. Wi n tìgi n sínɛ wi tiimaa tári na, syɔɔn faala a ní wi yìrige í.»

³ Níì cán Kàfɔw Yawe wi gee naa joo níì jo: «Kěgee ni nànbēle saala kagunɔ da ni yirigi ni syée kapɛɛnnɛ ma lè, dabata pe a ba kòro gi ni, gee ni si dabata da ni yirigi lè, kɛɛ pe a ba kòro gi ni Isirayɛli kpáagi wòolo ni.»

Yerile sáni lǎli í sɔ̀lɔ lè

⁴ Gee Yawe nyuu Isirayɛli kpáagi wòolo ma lè, koro gi nyɛ gee naa, wi n jo: «Yaa mii caa, yele a kòro sìi na.

⁵ Yele a kɔ́ sa ra caa Betɛli ma í, yele a kɔ́ kári Giiligali ma í, yele a kɔ́ sɔ̀lɔ́ kári Bɛɛri-Syeba ma í. Níì cán Giiligali myɛw a cǒ kári, Betɛli si kálagi bi kwɔ́ɔ.»

⁶ Yaa Yawe caa, yele a kòro sìi na, koro ga pye wi a kɔ́ cò Zyozɛfu kpáagi na àmɛɛ naà nyɛ lè bi gi sórigo í, syɔɔn faala si a kɔ́ taa Betɛli ni bi náagi bee fígi í.

⁷ Yele i kányɛɛgi kàragí kòbi, ní i sínni cáan tári na.

⁸ Wee wi ŋɔrisyɔɔnw ní gòkuruw sámaga lè, ní i yébiliwɔɔli kàragí nyǐnjerige, ní i cángi làla kàragí, ki n pye yébilige, ní ní i sólomi lɔ̀ʔɔ yiri n ba ni ŋuu tári na, woro mɛ́ɛgi gi nyɛ Yawe.

⁹ Woro wi kálagili yaari li i foo ni tuun nànnirio na, a kálagili i nangi tɛɛnirigi na.

¹⁰ Wee wi fúlo be na kpàánweeli na lè, wi kéeli n be bɛɛn. Wee wi fíligi ni nyuu lè, wi i nyɛ be ma yanɔnʔɔgɔ.

¹¹ Amɛɛ yele wɔ́ɔ̀ foomɔfɔw tánʔana lè, ní àmɛɛ yele bile syɔɔ wi ma lè námara kpɔ́ʔɔrɔ, kpáayi yele faan ní kàdɛnɛgboloyi ní lè yele a jée yi ni í, ɛrɛzɛn tíricǎnri yele cɔ́rɔ lè yele a gbaa ti dùvɛɛnw na í.

¹² Níì cán mii n gi cán ncan yele kapeeyi n nɛʔɛ, a yele kapeegèle kpólo. Yele i fǎngi gbàngí syɛɛnsinw na, yele i nyùnzyɔɔ-lɔ́ri wáa wi na, ní i foomɔfɔbèle yéregi kányɛɛgi joolo na kpàánweeli na.

¹³ Koro na syɔ́ɔnwee wi cìlige lè, wi i pyèrí làrigèle naa ni, níì cán làribeegéle gɛɛ.

¹⁴ Ye lúru yaa kacànbyeri caa, yé kapeeyi yaʔa koro ga pye yele í pye sìi na. Kánmi bee na Yawe Kolocɔlɔɔ wi nyɛ lè Nyɛ̀ʔɛni Sùlasiibéle Kafɔlɔ, wi a pye ní yele ní àmɛɛ yele gi nyuu lè.

¹⁵ Ye kapeeyi yaʔa yi yele bɛɛn, kacànbyeri si yele dɛ́nɛ. Yaa kútiisiɔn kúunri kpàánweeli na, dɔ̀ʔɔ́ Yawe Kolocɔlɔɔ wi lè Nyɛ̀ʔɛni Sùlasiibéle Kafɔlɔ, woro a nyinimɛ taa Zyozɛfu wóbèle na be kòro lè.

¹⁶ Gee bee na Kàfɔw Yawe Kolocɔlɔɔ wi lè Nyɛ̀ʔɛni Sùlasiibéle Kafɔlɔ, wi n jo: «Pe a ba ra nyaan bàā peele kadàlayi myɛ na. Pe a ra gi pingi da máari kàlari-kóloyi myɛ ni: ‹Yòói! Yòói!› Pe a tèfalaw yeri kùu káyaagi kéele na, bele be nyamɛɛgèle wáama cán lè, sáā poro yiri kayaagi nyɛniyɛ na.

¹⁷ Lǎli ni mii ga ni forogi mɔ níngi ni lè pe a ra nyaan bàā peele mɔ ɛrɛzɛn séyi myɛ ni,» Yawe wi jo nya.

Cángee na Yawe a ba keele kpéʔele lè

¹⁸ Yele bele ye Yawe cángi yèʔerí lè wɔʔɔlɔ i nyɛ yele na. Nyàʔá yele sɔ̀ngí Yawe cángi kéele na? Yébiliwɔɔlɔ canʔa gii, gbɛ̀ɛnmɛ canʔa ban í.

¹⁹ Yele a ba pye àmɛɛ syɔɔnwaa nyɛ lè, wee wi fé lè càaraɔ na, á ursi sáà wi fàra n taa, bi pye àmɛɛ syɔɔnwaa nyɛ lè, wee wi fàn n jée wi kpáagi ni lè ní sáà kɔ́gi taʔa gúngi na bi ŋɔ́n daa, á wàbiga wi nɔn.

²⁰ Yawe cángi o nyɛ yébilimɛ, gbɛ̀ɛnmɛ fun ni ì? Ba ki o nyɛ yébiliwɔɔlɔ, gbɛ̀ɛnmɛ faala fun ni ì?

Kpɔ̀ʔɔrɔ-nibɛɛnmɛnɛ kéele

²¹ «Yele fɛ́tiibèle kéele n mii bɛɛn, mii i be faari. Yele kpóʔorogèle láa o mii taagi í.

²² Sáriga-sórigow ní míimi sáriga yele wóo mii ma lè, wi kéeli ga mii dɛ́nɛ í. Mii o yele pínɛnyɛnnɛgi sáriga, ní yele sǐnmi náapiiye wéle í.

²³ Mɔ ŋúnuyi kàfulogo láʔa mii na nya, mii o mɔ kɔríbèle yákpogéle lúro í.

²⁴ Kàjáa kányɛɛgi n yɛlɛ kaa fóo àmɛɛ lɔ̀ʔɔ nyɛ lè, sínni si pye àmɛɛ lòcoologo nyɛ, gee gi lè ki o kwóo í.

²⁵ Yele Isirayɛli kpáagi wòolo, a yele sárigaw yaweegéle, ní míimi sáriga wòlo lé mii ma yɛ́ɛgèle togoye siin fúngo ni fìími tára ni?

²⁶ Yele maa Sikuti láa ni syée wi pye yele fànʔafɔw n fàra Kiyun na, yi lè yele yasunyi, ní yele kolocɔlɔw ŋɔripile, loro lee yele sámaga yeyɛɛ ma lè.

²⁷ Mii si a yele cò bi tórigo Damasi kàdoʔo ma.» Wee mɛ́ʔɛ gi nyɛ lè Yawe Kolocɔlɔɔ, wi lè Nyɛ̀ʔɛni Sùlasiibéle Kafɔlɔ, woro wi jo nya.