Amɔsi 4 - Cebaara Bible 2010

¹ Yele Basyan nìcáayi, ye syɛ́ɛnri naa lóʔo, yele bele ye nyɛ lè Samarii nyanbeleyi na, ní i fǎngi gbàngí fɔ̀ngɔfɔbèle na, ní i foomɔfɔbèle tɔ́nʔɔnɔ, ní i gi nyuu yele nǎnbèle ma: «Ye wi láa yaa maa wo ba ra gbo.»

² Kàfɔw Yawe n kàli wi sínni na níì jo: «Ye wéle, canyaa i maa yele kánmi na, yee ni pe a ba yele cò mɛ̀ʔɛgboloyo na bi kári lè, si wɔ́ɔ yele pìíbèle cò fáco-mɛ̀ʔɛgēle na.

³ Yele a ba yiri tǒw wéeye ni, ye myɛ nibin nibin a ra syée yeyɛɛ zìnmɛ na, bi sa yeyɛɛ wáa Hɛrimɔn kàbangi na,» Yawe wi jo nya.

Jànvaa kpɔ̀ʔɔrɔganmi

⁴ «Yaa syée Betɛli ma ye sa ra kapeegèle kpéʔele yaà. Yaa syée Giiligali ma ye sa ra kàa fàrá yele kapeegèle na. Yaa yele sárigaw wóo nyǐngi nyɔ́ɔ na, ní yele yáʔaw, canya taanri o canya taanri.

⁵ Yaa yele bariga kaanni sáriga wóo ní levé ní! Yaa yele kínidɛnɛgi yakaanya kéele nyuu yaa jáari! Níì cán koro gi yele dɛ́nɛ, yele Isirayɛli yòdaʔayi,» Kàfɔw Yawe wi jo nya.

Nyùngo fun sàmigèle

⁶ «Mii si wi kateegi cáan yele na yele kěyi myɛ ni, níì lìíli yaʔa a li fɔ̀n yele tɛ́ɛyi myɛ ni. Koro ní ki myɛ ní yele ga sèʔê lúru n pan mii ma í,» Yawe wi jo nya.

⁷ «Mii wi cée yele ma zěgi na lǎli ni gi kòro lè yeye taanri yaliiri làrilaala si náa nan. Mii n zěgi kaan kègaa wòolo ma níì kègaa wòolo yaʔa. Segaa n zěgi taa, á kàa fɔ̀n zěgi ni a koro yaliiri waʔa.

⁸ Kèye siin wàlá kèye taanri syɛɛnnɛ n kári kègaa ma bi sa lɔ̀ʔɔ gbaa, kàjáa koro ga lǒgi láa láʔa be na í. Koro ní ki myɛ ní yele ga sèʔê lúru n pan mii ma í,» Yawe wi jo nya.

⁹ «Mii n yele kpúmɔn ní wáami, ní yaliifɔnʔɔri wɔʔɔgɔ ní. Múndɔɔw n yele nángwɔɔbèle saʔa lìi, n fàra yele ɛrɛzɛn séyi, ní yele dèsyaantiiri, ní yele olivye tíiri na. Koro ní ki myɛ ní yele ga sèʔê lúru n pan mii ma í,» Yawe wi jo nya.

¹⁰ «Mii n káfalagi yáama cáan yele na àmɛɛ ki da pye Ezyipiti ni lè. Mii n ŋɔsée tɛ́ʔɛ n yele nìgɔcaribèle kpóo, níì yele syɔ́ɔnyi yaʔa a be yi cò n kári. Mii n yele kapɛɛnkpumɔnbèle fɔ́nʔɔnɔ núngo yaʔa ki i yìrigí ni jǐn yele fínaagèle ni. Koro ní ki myɛ ní yele ga sèʔê lúru n pan mii ma í,» Yawe wi jo nya.

¹¹ «Mii n yele kálagi Sodɔmi ní Gomɔri kálagiganmi na, yoro yee mii Kolocɔlɔɔ da kálagi lè. Yele n pye àmɛɛ kàjenyungo nyɛ, gee be kíle n yirige naakpɔʔɔ ni lè. Koro ní ki myɛ ní yele ga sèʔê lúru n pan mii ma í,» Yawe wi jo nya.

¹² «Koro na Isirayɛli, gee naa mii a kpéʔele mɔ na, àmɛɛ si mii a gee bee kpéʔele mɔ na lè, ki n yɛlɛ mi miyɛɛ zámaga mi mɔ Kolocɔlɔw fàra, Isirayɛli.»

¹³ Wéle, wee wi nyanbeleyi sámaga lè, níì káfalagi sámaga, ní i syɔɔn kasɔngugèle tèé wi na, woro wee wi nyǐnjerigi kàragí lè yébilimɛ, ní i táanri ni sɔ̀lɔ́ tári dǎndamaya na lè, woro mɛ́ɛgi gi nyɛ Yawe Kolocɔlɔɔ, wi lè Nyɛ̀ʔɛni Sùlasiibéle Kafɔlɔ.