Amɔsi 3 - Cebaara Bible 2010

Kolocɔlɔɔ a ba wi syɛ́ɛnbèle yíbe be kérigèle na

¹ Yele Isirayɛli ye, ki n yɛlɛ ye syɛ́ɛnri naa lóʔo, dee Yawe nyuu yele kéeli na lè, ní narigbaagi myɛ kéele na, gee mii yirige Ezyipiti tári ni lè:

² «Yele yagana mii nyɛ́nɛ n wòlo tári narigbaaya myɛ ni. Koro na mii a ba yele yíbe yele kérigèle na ke lè yele kolomi kèlē myɛ.»

Kolocɔlɔɔ i nyuu, kanyaajoow a gbǎn pyèri í

³ Syɛ̀ɛnnɛ siin ga pye pe ga bɛ̀ɛ nibin na í, pe a gbǎn pínɛ lé bàā táanri?

⁴ Càaraɔ i kaana lé kákpoʔo ni kaara ní sìnjò ni? Càarabiige i fúlo lé gi tɛɛ̀sinɛgi ni kapye ki ga yarigaa taa n cò í?

⁵ Féjɛɛnnɛ i có lé parà na tári na n gi yaʔa parà o yaà í? Cɔ̀ɔ i kpóʔoro lé wiyɛɛ na n gi yaʔa yarigaa ga cò wi na í ?

⁶ A pe i kapɛɛnnɛ tòmaʔa wíi lé kàʔa ni syɛ́ɛnbèle í kòro sìnvyaa ni ? A wɔʔɔgɔ i tuun lé kàʔa na n gi yaʔa ki ga yìri Yawe ma í?

⁷ Kánmi bee na Kàfɔw Yawe o yafyɛn kpéʔele kapye wi ga wi kalarali tɛ̀ɛn wi falipyebèle na í, pe lè kanyaajoobèle.

⁸ Càaraw n kaana, wìí wi a kòro sìnvyaa ni? Kàfɔw Yawe n joo, wìí wi a kòro kanyaajoori sìngbeʔele ni?

Samarii kútiiw kéele

⁹ «Ye yele yákpogèle wáa ye gi joo be lóʔo Asidɔdi kpaakpoloyi ni, ní Ezyipiti tári kpaakpoloyo ni, yé jo: ‹Ye yeyɛɛ gbóʔoro Samarii nyanbeleyi na, yé kanyaʔami-nɛʔɛri wéle, dee di nyɛ lè gi ni, ní fǎngi gbànna li nyɛ lè gi fúngi ni.›

¹⁰ Pe ga kasinnɛ kpéʔeleganma cán í. Pe i fànʔa-na-yasyɔɔri ní kàyuugi yárira kpoʔolo be kpaakpoloyi ni,» Yawe wi jo nya.

¹¹ «Koro na Kàfɔw Yawe gee naa joo níì jo: ‹Nigoow a ba tári màʔa. Wi a ba mɔ fangi yirige mɔ ni, si mɔ kpaakpoloyi yárira fuguri bi láa.› »

Funbɛɛnrɛ syɔɔlɔ

¹² Yawe wi gee naa joo níì jo: «Amɛɛ bànaʔaɔ gáà yaweele tɔ́lɔyɔ siin, wàlá yaweele líicerige yirige lè càaraɔ nyɔ́ɔ ni, kánmi bee na Isirayɛli ye a ba syɔɔ, poro bele be nyɛ lè wodɛ́ɛnbéle ní Samarii ni, níì sínɛ yasinɛyɛ na Damasi làgoyo na.»

Sàmina kéele

¹³ «Ye lóʔo, yé gi séeraw kpéʔele Zyakɔbi kpáagi wòolo kánma na,» Kàfɔw Yawe Kolocɔlɔɔ wi nyɛ lè Nyɛ̀ʔɛni Sùlasiibéle Kafɔlɔ, woro wi jo nya.

¹⁴ «Cángee na mii a Isirayɛli ye yíbe lè làlwaw kèlē na be kálagi lè, mii a wɔ́ɔ be yíbe Betɛli sáriga-wòlo-yafaanyi kéele na. Sáriga-wòlo-yafaangi nyɛ́ngéle a kabagi bi too tári na.

¹⁵ Mii a wéeri làla kpaʔa ní káfugi làla kpaʔa pínɛ jaa. Sogǎngèle fànʔafɔ-gbaaya a tɔ́nʔɔnɔ. Koro a pye kpaanɛʔɛyɛ kwɔ́ɔmɔ,» Yawe wi jo nya.