Agizye 1 - Cebaara Bible 2010

Kpɔ̀ʔɔrɔli kpaʔa lúruvaanna lala

¹ Fànʔafɔw Dariyusi fǎngi yɛɛziin wólo yeye kɔrɔni wógi cânzelige na, a Yawe syɛ́ɛnri sɔ̀lɔ kanyaajoow Agizye ma n nan Zyuda tári kacɔɔnriɔ Zorobabɛli na, wi lè Syeyalityɛli jáaw, ní sáriga-wòlobèle kàfɔlɔ Zyozuwe na, wi lè Yehosadaki jáaw. Wi n jo:

² «Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: ‹Syɛ́ɛnbèle naa i gi nyuu níì jo: Lǎli ga kɔ́ɔ̀ nan í, lee ni Yawe kpáagi yɛlɛ bi ní lúru faan lè í.› »

³ Lǎli bee ni a Yawe syɛ́ɛnri sɔ̀lɔ kanyaajoow Agizye ma n nan be na, wi n jo:

⁴ «Lǎli naa ni lé yele yɛlɛ bi tɛ́ɛn yele kpáayi ni, yee yele sámaga n fère lè, á kpáagi naa si i nyɛ gurubɛʔɛ?»

⁵ Koro na tɔ́ɔliw ni, Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Ye sɔ̀ngi ye wéle yele kérigèle na!

⁶ Yele n lùguro saʔa lùgu, ní si i yaliire cɛɛri yagana lée, yele i líi, yele si o tíngi í, yele i gbo, gee bee wɔ́ɔ o yele lògbaalaagi kwóo í, yele i búroyi nii, gee bee o wéeri láari yele na í. Wee wi báara sàra na lè, wi sàraw i jǐn gɔ̀nvaʔa-fùrugo ni.»

⁷ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Ye sɔ̀ngi ye wéle yele kérigèle na!

⁸ Ye lúgu nyanbelegi na ye tiire caa ye ba kpáagi faan, gi kéeli a mii dɛ́nɛ gbanʔama, mii si gi kéeli kpɔ́ʔɔ,» Yawe wi joo nya.

⁹ «Yele sɔ̀ngumi maa pye saʔa taala na, wéle, cɛɛri yagana si yele taa. Yele n di láa n kári kpaaya ma, kàjáa a mii di fɛɛ n wáa. Nyàʔá na koro pye? Gee bee n pye mii kpáagi kéele na gi kàri lè gurubɛʔɛ, bi gi taa yele myɛ nibin nibin fúnyi n wári yele kpáayi kéele kurugo.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

¹⁰ «Koro na nyɛ̀ʔɛni cée yele ma kásagi na, a tári cée ti yaliiri na.

¹¹ Mii n wáami yeri n cáan tári na, ní nyanbeleyi na, ní bilew, ní dùvɛɛnfɔnw, ní sǐnmi, ní tári yaliire na, ní syɛ́ɛnbèle, ní yaweeri, ní kɔ́yi fáli myɛ na.»

¹² Zorobabɛli wi lè Syeyalityɛli jáaw, ní sáriga-wòlobèle kàfɔlɔ Zyozuwe wi lè Yehosadaki jáaw, a poro ní syɛɛnsanbèle myɛ Yawe be Kolocɔlɔw jóomɔ lóʔo, níì kanyaajoow Agizye syɛ́ɛnri lóʔo, n yɛlɛ ní tundunri ní, dee Yawe be Kolocɔlɔw da kaan wi ma lè. A fyáari syɛ́ɛnbèle cò Yawe yɛ́ʔɛ ma.

¹³ A Yawe tundunw Agizye gi joo syɛ́ɛnbèle ma n yɛlɛ ní Yawe tundunri ní, ti jo lè: «Mii i nyɛ ní yele ní.» Yawe wi jo nya.

¹⁴ Zyuda ye tári kacɔɔnriɔ Zorobabɛli wi lè Syeyalityɛli jáaw, ní sáriga-wòlobèle kàfɔlɔ Zyozuwe wi lè Yehosadaki jáaw, ní syɛɛnsanbèle myɛw, a Yawe poro fúnyi yìrige, a be pan n ba ni báara Nyɛ̀ʔɛni Sùlasiibéle Kafɔlɔ Yawe kpáagi ni wi lè be Kolocɔlɔw,

¹⁵ koro n pye fànʔafɔw Dariyusi fǎngi yɛɛziin wólo yeye kɔrɔni wógi ki canya toko ní sicɛrɛ wógi na.