Abidyasi 1 - Cebaara Bible 2010

¹ Abidyasi yanyaagi. Kàfɔw Yawe wi syɛ́ɛnri naa joo Edɔmi kéeli na. Wolo n syɛɛnrɛ lóʔo, dee di yìri Yawe ma lè. Tunduɔn n tórigo syɛɛnfeleyi nínge ni, wi n jo: «Ye yìri! Ye boo yìri Edɔmi kánmi na wo kapɛɛnni kpúmɔn ní wi ní!»

Yawe i Edɔmi kálagili kéele nyuu

² «Wéle, mii a mɔ cɛ́rɛ syɛɛnfeleyi nínge ni. Mɔ a pye yafaʔala bi sɔ̀lɔ.

³ Mɔ fúngi kpɔ́ɔmɔ n mɔ pùuni, mɔ wee wi nyɛ lè wodɛ́ɛɔn ní fálaweeyi fúngo ni, mɔ tɛɛkòrogi si i nyɛ yaà píri ǹjoʔo ma, á mɔ si i gi nyuu miyɛɛ fúngi ni níì jo: ‹Wìí wi a gbǎn mii tìrige fwɔɔ bi sa nan tári na?›

⁴ Alí mɔ ga lúgu yaà ǹjoʔo ma píri àmɛɛ nyɔɔ̀ nyɛ lè, àlí mɔ ga sáà mɔ zyaari tɛ́ʔɛ yaà ŋɔripiigèle nínge ni, mii a mɔ ŋɔrigɔ láʔa yaà bi cáan,» Yawe wi jo nya.

⁵ «Kàyuubēle ga pan mɔ ma, wàlá yébiligi yafuguru-mí-láabéle ga pan mɔ ma, ee! Pe a tɔ̀nɔ́ mɔ nɔ́nʔɔ! Gee ki ga yɛlɛ be ma lè pe a gi yùu ì? Ɛrɛzɛncɛnɛbéle ga nan mɔ na, ɛrɛzɛn kɔ́ri yagana ban pe a yaʔa ì?

⁶ Ee! Pe n tɔ̀nɔ n Ezau fuguri! Wi tɛɛlaragèle n cariga n nyaa!

⁷ Mɔ sogumɔ wóbèle myɛ n mɔ ŋɔrigɔ n lúrugo fwɔɔ n sáà nan láʔagologi na. Mɔ taanyɛnbèle n mɔ jànváa, pe n fànʔa taa mɔ na, pe n lìi mɔ búruw na, a koro pye mɔ na karinyanga. ‹Sícilimɛ ní o wi ni í,› (koro be nyuu).

⁸ Cángi bee na ban mii a sícilibèle kwɔ́ɔ Edɔmi ni ì, bi cánni kwɔ́ɔ yaà Ezau nyanbelegi na ì?» Yawe wi jo nya.

⁹ «Ee Teman, fyáakpɔɔrɔ a mɔ sanbalibèle cò, koro ga pye nǎnbèle myɛ í kwɔ́ɔ láʔa yaà Ezau nyanbelegi na kpóoli báriga ni!

Edɔmi ye n kàa taa n pye Isirayɛli ye wɔʔɔli báriga ni

¹⁰ «Fɛ̀ɛrɛ a mɔ tɔ́n péemi kéele na mɔ kpéʔele mɔ senyɛnw Zyakɔbi na lè, mɔ a kwɔ́ɔ yirige yaà gi kòro nya làla o làla.

¹¹ Cángee na mɔ da canʔana wi na n yére lè, cángee na syɛɛnfeleyaa nikwɔɔ baa wi kapɛɛnkpumɔnbèle cò n kári lè pulobèlē, gee ni nibɔɔnnɔ da ba ni jǐn wi kpàánweegèle ni lè, ní i gɔ̌nw wáa Zyerusalɛmi lɔ́ri kéele na lè, mɔ maa wɔ́ɔ̀ pye mɔ a jo poro wàa wii.

¹² Mɔ a kɔ́ ra mɔ senyɛnw canʔa wéle í, ki lè fɔ̀rɔgi canʔa, mɔ a kɔ́ ra fundaanra kpéʔele Zyuda pìíbèle kéele na pe kálagili canʔa na í, mɔ a kɔ́ ra kpɔɔmɔ jóomɔ nyuu pe wɔʔɔgi canʔa na í!

¹³ Mɔ a kɔ́ jée mii syɛ́ɛnbèle kèye ni pe kálagili canʔa na í! Mɔ wɔ́ɔgēle, mɔ a kɔ́ ra be wɔʔɔgi wéle be kálagili canʔa na í, mɔ a kɔ́ kɔlɔ̀ taʔa pe lɔ́ri na pe kálagili canʔa na í!

¹⁴ Mɔ a kɔ́ ra yèré kobariyi na bàā be fànvɔbèle kúu da láari yaà í, pe wóbèle be kòro lè, mɔ a kɔ́ be le kɔlɔ̀ ni wɔʔɔgi canʔa na í!

¹⁵ Níì cán Yawe cángi n nùuni syɛɛnfeleyi myɛ kéele na. Gee mɔ kpéʔele lè, koro ki a wɔ́ɔ ba kpéʔele mɔ na, mɔ kapyegèle sàra a lúru kòro mɔ nyúngi ni.

Isirayɛli ye a gɔ̀lɔ́w wòlo Edɔmi ye na

¹⁶ «Ki si i lè nya, àmɛɛ yele gbaa mii nyanbejǎngi na lè, kánmi bee na syɛɛnfeleyi myɛ a ra gbo sìnlaʔa ni, yi a ra gbo fwɔɔ bàā tíngi, yi a pye mɔ a jo yi da kɔ́ɔ̀ pye beè í.

¹⁷ Kàjáa wogorobèle a pye Siyɔn nyanbelegi na, Pe a pye wojanbéle ní, Zyakɔbi kpáagi wòolo a ní be tálɛɛgèle taa.

¹⁸ Zyakɔbi kpáagi a pye naà, Zyozɛfu kpáagi a pye naanyìnge, Ezau kpáagi si pye nyàásigi, yi a cò gi na bi gi sórigo kwɔ́ɔ mɛnɛ mɛnɛ. Ezau kpáagi wówaa nibin a kòro sìi na í,» níì cán Yawe wi joo.

Tátɛɛyi yi nùuni lè yi fáligi a syɔɔ taa

¹⁹ Wòrogulo kàbangi wòolo a ba Ezau nyanbelegi fáliga syɔɔ taa, Tìgimi-tára woolo si ba Filisitini ye tári fáliga syɔɔ taa, pe a ba Efirayimi tásaligi ní Samarii tásaligi fáliga syɔɔ taa. Bɛnzyamɛ a Galaadi fáligi syɔɔ taa.

²⁰ Isirayɛli sùlasiibèle bee be cò n kári lè, poro a ba Kanaan ye tári fáliga syɔɔ taa bi kári fwɔɔ sa nan Sarɛpita na, Zyerusalɛmi wóbèle si be cò n kári lè, poro bele be nyɛ lè Sefaradi ni, poro a wòrogulo kàbangi kèye fáliga syɔɔ taa.

²¹ Syɔɔfɔɔlɔ a lúgu Siyɔn nyanbelegi na bi Ezau nyanbelegi kútii joo, fǎngi si pye Yawe wóʔo.