3 Zyan 1 - Cebaara Bible 2010

Fòów kéele

¹ Mii wee wi nyɛ lè Egiliziw wólɛɛɔ, mii a sɛ́bɛw naa tórigo mɔ ma Gayusi, mɔ wi lè mii syɛɛn-nidaanmaw, mɔ wee kéele li mii dɛ́nɛ lè kányɛʔɛ ni.

² Mii syɛɛn-nidaanmaw, mii i Kolocɔlɔɔ nyɛ́ɛri mɔ kéeli na koro ga pye kàa í da taari mɔ na kàbanyi myɛ na, mɔ si cólogo céri kàbaan na àmɛɛ mɔ cólogo pǐli kàbaan na lè.

³ Amɛɛ kányɛɛgi nyɛ mɔ fúngi ni lè, ní àmɛɛ mɔ táanri kányɛɛgi kólogo ni lè, lǎli ni wo senyɛnbèle pèle yìri yaà mɔ ma n baa gee bee séera kpéʔele lè, a mii fundaanra kpéʔele gbanʔama.

⁴ Fundaanraa faala ní o nyɛ mii ma n kpɔ́ʔɔ n sɔ̀lɔ dee naa na í, àmɛɛ mii gi lóʔo lè mii pìíbèle i táanri kányɛɛgi kólogo ni.

Gayusi tágala syɛ́ɛnmi kéele

⁵ Mii syɛɛn-nidaanmaw, yariga o yariga mɔ kpéʔele lè wo senyɛnbèle ma, àlí bele be nyɛ lè nibɔnbèle yoo, mɔ i nyɛ tágala syɔ́ɔn kérigèle bee myɛ ni.

⁶ Bele bee pe baa yére Egiliziw yɛ́ʔɛ ma n mɔ tamagi séera kpéʔele. Mɔ ga níì be dɛ̀ɛmɛ n yɛlɛ ní Kolocɔlɔɔ kínidɛnɛgi ní a be kári yɛʔɛ̀ ma tánʔani ni, mɔ a kacànna pye.

⁷ Níì cán Kirisi mɛ́ɛgi kéele na be nyɛ tánʔani na, pe si o yafyɛn syoo syɛɛnfeleyi ma í.

⁸ Koro na gi yɛlɛ waa syɛ́ɛnbèle bee félege dɛ̀ɛmɛ́ koro ga pye wolo í pye be falipyenyɛ̀nnɛ kányɛɛgi fáli ni.

Jotirɛfi ní Demɛtiriyusi kéeli

⁹ Mii n syɛɛnraa sɛ́bɛ n tórigo Egiliziw ma. Kàjáa Jotirɛfi o wolo syɛ́ɛnri córo í, gee gi wi dɛ́nɛ lè gbanʔama, koro gi nyɛ wi tiimaa i caa bi pye pe myɛ nyúngo na.

¹⁰ Koro na mii ga kári yaà, mii a be sɔ̀ngumi tìrige wi kapyegèle na, gee bee n jo àmɛɛ wi gbanzan syɛɛnpeeri nyuu ni wáa wolo na lè. Kérigèle bee si ga sèʔê wi yɛlɛ í, wi tiimaa ga fɔ̀lɔ bi senyɛnbèle sámaga cò í, bele si be caa bàā be sámagi da có lè, a wi i bele bee yéregi, ní i be nɛnɛ Egiliziw na.

¹¹ Mii syɛɛn-nidaanmaw, mɔ a kɔ́ ra kapeele tɛ́ɛlɛ í, fwɔɔ kacǎngèle. Wee wi kacǎngèle kpéʔele lè, wee bee i nyɛ Kolocɔlɔɔ wóo. Wee si wi kapeegèle kpéʔele lè, wee bee ga kɔ́ɔ̀ Kolocɔlɔɔ nyaa í.

¹² Syɛ́ɛnbèle myɛ i Demɛtiriyusi mɛ́ɛtaangi yiri, a kányɛɛgi tiimaa i wi mɛ́ɛtaangi yiri, a wolo wɔ́ɔ i wi mɛ́ɛtaangi yiri. Mɔ si n gi cán wolo séeraw i nyɛ kányɛʔɛ.

Fòosanw kéele

¹³ Kèlē saʔa maa pye mii ma mii í dée ge sɛ́bɛ tórigo mɔ ma, kàjáa mii o caa bi ge sɛ́bɛ ní lángiri, ní sɛ́bɛkaanna ní í.

¹⁴ Mii i sɔ̀ngí cɛɛri ga pye mii í sa mɔ nyaa wo pínɛ wo joo ní woyɛɛ ní.

¹⁵ Kolocɔlɔɔ í fûnnyingi kaan mɔ ma! Mɔ taannyɛnbèle n mɔ syáanri yaà. Mi wolo tàannyɛnbèle myɛ nibin nibin syáanri yaà.