2 Zyan 1 - Cebaara Bible 2010

Fòów kéele

¹ Mii wee wi nyɛ lè Egiliziw wolɛɛɔ, cɔlɔɔ, mii a sɛ́bɛw naa tórigo mɔ ní mɔ piibèle ma, mɔ wee wi nyɛ lè Kolocɔlɔɔ syɛɛnnyɛnɛ-wòloo. Yele kéeli n mii dɛ́nɛ kányɛʔɛ ni, mii nibin si ban í, fwɔɔ bele myɛ be kányɛɛgi cán lè, yele kéeli n wɔ́ɔ̀ bele bee dɛ́nɛ

² kányɛɛgi kéele na gee gi nyɛ lè wolo ni, ki si a wɔ́ɔ pye ní wolo ní làla o làla.

³ Ki n yɛlɛ Tofɔw Kolocɔlɔɔ ní Zyezu Kirisi wi lè Tofɔw Jáa, poro í kpɔ́ʔɔri, ní nyínimi, ní fûnnyingi kaan wo ma kányɛɛgi, ní tàmagi ni.

Kányɛɛgi ní tàmagi kéele

⁴ Mii n tɔ̀nɔ n fundaanra kpéʔele gbanʔama, àmɛɛ mii mɔ piibèle pèle nyaa pe i táanri kányɛɛgi ni lè n yɛlɛ ní tundunri ní wolo taa Tofɔw ma lè.

⁵ Cɔlɔɔ, tɔ́ɔliw ni mii i mɔ nyɛ́ɛri níì jo ki n yɛlɛ wo kòro tàmagi ni ní woyɛɛ ní, ki o náā nyɛ mɔ a jo tundunvɔ́nrɔ mii sɛ́bɛ bi tórigo mɔ ma í, fwɔɔ dee ti da téè pye lè wolo ma nlaa yaà gi sélimi na.

⁶ Gee gi nyɛ lè tàmagi, koro gi nyɛ fwɔɔ wolo í da táanri da yɛlɛgi ní wi tundunri ní. Tundunri bee di nyɛ dee yele da téè lóʔo lè nlaa yaà gi sélimi na, a di jo, ki n yɛlɛ yele í da táanri tàmagi kólogo ni.

⁷ Jànvaafɔɔlɔ saʔa n cariga dulunyanw ni, poro bele be nyɛ lè pe ga yére gi ni n jo Zyezu Kirisi n pan cere ni lè í. Syɔ́ɔnwee wi ga pye ànbée lè, wee bee wi nyɛ jànvaafɔw, ní Kirisi nigoow.

⁸ Yele si n yɛlɛ yaa yeyɛɛ kɔ̀rɔsíi koro ga pye fáliwee yele kpéʔele lè, yele a kɔ́ bɔ̀nɔ wi ni í, fwɔɔ yele í wi tɔ̀nɔw taa bi foro.

⁹ Syɔ́ɔnwee faala ga pye lè wi ga kòro Kirisi tamani yagana ni í, ní i làa nikwɔɔ taari li na, Kolocɔlɔɔ o nyɛ wee bee ma í. Wee si wi kòro lè wi tamani ni, Tofɔw ní Jaafɔw myɛ i nyɛ wee bee ma.

¹⁰ Wàa ga pan yele ma, wi si ga pan ní tamani bee ní í, yele wàa a kɔ́ fɔ̀lɔ wee bee na bi wi lége wi kpaʔa ni í, yele a caa kɔ́ wi syáanri í!

¹¹ Níì cán wee wi ga wi syáanri lè, wee bee n pínɛ ní wi ní wi kapeebyeri ni.

Kasangèle joolo

¹² Kèlē saʔa i nyɛ mii ma bi ní joo yele ma, mii si o caa bi ge sɛ́bɛ kàlawara na ní lángiri ní bi tórigo yele ma í. Kàjáa mii tiimaa i sɔ̀ngí bi kári yaà yele ma wo sa woyɛɛ nyaa wo joo, koro ga pye wolo fundaanri si foro.

¹³ Mɔ senyɛnjew wi nyɛ lè Kolocɔlɔɔ syɛɛnnyɛnɛ-wòlowaa, wi pìíbèle n mɔ syáanri yaà.