2 Samyɛli 9 - Cebaara Bible 2010

Davidi n Mefibosyɛti syɔɔ n lége wi tɛ́ɛgi ni

¹ A Davidi kɔ́ɔ̀ jo: «A syɔɔnwaa níì kòro lé Sawuli kpaʔa wóbèle ni, koro ga pye mii í wi sámaga cò ní funjànga ní Zyonatan kéeli na?»

² Sawuli kpáagi falipyewaa si maa pye yaà, pe i wi yiri Siiba, a be woro yeri n pan Davidi ma. A fànʔafɔw Davidi baa wi pye: «Mɔ lé wi nyɛ Siiba?» A wi yari: «Ɛɛn, mii wii, mii wi lè mɔ falipyew.»

³ A fànʔafɔw jo: «A Sawuli kpaʔa wówaa níì kòro lé koro ga pye mii í Kolocɔlɔɔ funjànga kéele kpéʔele ní wi ní?» A Siiba fànʔafɔw yari: «Zyonatan jáawaa n kòro yaà, wee tɔ́lɔyɔ yi kálagi lè.»

⁴ A fànʔafɔw wi pye: «Sán wi nyɛ?» A Siiba fànʔafɔw yari: «Wi i yaà Amyɛli jáaw Makiiri kpáagi ni, Lodebaari ma.»

⁵ A fànʔafɔw Davidi tun Lodebaari ma pe sa wi yeri Amyɛli jáaw Makiiri kpaʔa ma.

⁶ Zyonatan wi lè Sawuli jáaw, a woro jáaw Mefibosyɛti pan Davidi ma n baa tìgi n too n wi yɛ́ɛgi cíbele tári na. A Davidi jo: «Mefibosyɛti!» A wi jo: «Mɔ falipyew wi wee.»

⁷ A Davidi wi pye: «Mɔ a kɔ́ ra fɛ̀ɛgí í. Mii a tɔ̀nɔ́ kacànna kpéʔele mɔ na mɔ tóow Zyonatan kéeli na. Mii a mɔ tóolɛɛgi Sawuli tári myɛ lúrugo kaan mɔ ma, mɔ si pínɛ da líi ní mii ní canʔa o canʔa.»

⁸ A wi tìgi n too n wi kpɔ̀ʔɔrɔ níì jo: «Wìí syɔ́ɔn wi nyɛ mii, mii wi lè mɔ falipyew á mɔ kɔ́ɔ̀ sɔ̀ngi mii kéeli na nya, mii wee wi lè pɔ̀nguulo?»

⁹ A fànʔafɔw Siiba yeri wi pye lè Sawuli falipyew ní baa wi pye: «Yariga o yariga gi pye lè Sawuli ní wi kpáagi wòolo myɛ wóʔo, mii n gi kaan mɔ kafɔw pìinyanbiige ma.

¹⁰ Mɔ ní mɔ jáabèle, ní mɔ falipyebèle a ra wi séyi fála, sáā wi yaliiri lée bàā kɔngi, koro ga pye yaliire í pye mɔ kafɔw pìinyanbiige ma. Mefibosyɛti wi lè mɔ kafɔw pìinyanbiige, wi a pínɛ ra líi ní mii ní canʔa o canʔa.» Siiba jáabèle si maa pye kɛɛ ní kagunɔ, wi falipyebèle si i nyɛ toko.

¹¹ A Siiba fànʔafɔw pye: «Ni kàfɔlɔ, mɔ wi lè fànʔafɔw, gee myɛ mɔ joo n gbàn mii ma, mii wi lè mɔ falipyew, mii a ra gi kpéʔele.» Davidi maa jo: «Mefibosyɛti si na, woro a pínɛ da líi ní mii ní àmɛɛ fànʔafɔw jáawaa nyɛ lè.»

¹² Jaafɔlɔ maa pye Mefibosyɛti ma wobile ní, pe i wi yiri Mika. Bele myɛ pe da pye Siiba kpáagi ni lè pe maa pye Mefibosyɛti falipyebèlē.

¹³ A Mefibosyɛti tɛ́ɛn Zyerusalɛmi ni, níì cán wi maa pínɛ ni líi ní fànʔafɔw ní canʔa o canʔa. Wi tɔ́lɔyi myɛ siin si maa kálagi.