2 Samyɛli 8 - Cebaara Bible 2010

Davidi n fànʔa taa syɛɛnfeleyi na yi pye wi taana lè

¹ Gee gi níì pye lè gee bee kàdoʔo ma, koro gi nyɛ gee naa: Davidi maa níì Filisitini ye jáa n be kùru n le. A wi Filisitini ye kèkpɔɔgi tɛ́nɛmɛ yirige be kɔ́yi ni.

² A wi Mowabi ye jáa, níì be pye a be sínɛ tári na níì mɛɛnnɛ tɛ́ʔɛ n be tímana. Wi maa mɛɛnnyɛnyɛ siin tímana níì jo be poro kpóo, níì mɛɛnnyɛnnɛ nibin tímana níì jo be poro yaʔa sìi na. A Mowabi ye peyɛɛ gaan Davidi ma ní i maa ní be nyǔnyi lɔ́rɔ ní.

³ A Davidi Erehɔbi jáaw Hadadezɛɛri jáa, wi pye lè Soba fànʔafɔw, lǎli ni wi kári lè bi ní sa Ufurati cábigi tára syɔɔ taa.

⁴ A Davidi cò wi ma, syɔɔnyɔ fɔ̀ɔlɔ saala kɔrɔtaanri ní dabata, n fàra tɔlɔyɔ fɔɔlɔ sirakama na. A Davidi kapɛɛnkpumɔn-wòtoro-syɔ́ɔnyɔ dabata yaʔa wiyɛɛ ma, níì wozanyi myɛ tɔ́lɔyɔ kadoʔo ma kápangboloyo cɛnɛ.

⁵ A Damasi Sirii ye pan bi ba Hadadezɛɛri dɛ̀ɛmɛ, wi lè Soba fànʔafɔw. A Davidi baa kpóo Sirii ye ni nànbēle sirakama ní selebinnɛ.

⁶ A Davidi kapɛɛnkpumɔnbèle pèle kabiya télege Damasi Sirii ni. A Sirii ye peyɛɛ gaan Davidi ma ni maa ní be nyǔnyi lɔ́rɔ ní. Davidi ga kári tɛʔɛ o tɛʔɛ ni, Yawe n sáà fànʔa kaan wi ma.

⁷ Tɛ́ɛw tunmɔzige-yariya yi pye Hadadezɛɛri kpaàwelebèle ma lè a Davidi yoro láa n pan Zyerusalɛmi ma.

⁸ A fànʔafɔw Davidi níì kanyɛɛnrɛ saʔa taa Betaki, ní Berotayi ni, yi lè Hadadezɛɛri kèyaa.

⁹ A Hamati fànʔafɔw Toyii gi lóʔo Davidi n Hadadezɛɛri kapɛɛnkpumɔnbèle myɛ jáa.

¹⁰ A wi wi jáaw Yorami tórigo fànʔafɔw Davidi ma wi sa wi syáanri si wi sòolo, àmɛɛ wi too Hadadezɛɛri na n wi jáa lè. Níì cán Toyii maa pye kapɛɛnnɛ na ní Hadadezɛɛri ní. A Yorami pan ní wálifiio yárira ní, n fàra tɛɛ̀ wóro, ní kanyɛɛnrɛ wóro na.

¹¹ A fànʔafɔw Davidi di yaʔa kɔlɔ̀ na Yawe ma, àmɛɛ wi da wálifiiw, ní tɛ́ɛw yaʔa kɔlɔ̀ na wi ma lè, dee wi da taa syɛɛnfeleyi ma, yee wi da jáa lè.

¹² Syɛɛnfeleyi bee yi nyɛ Sirii ye, ní Mowabi ye, ní Amɔn ye, ní Filisitini ye, ní Amalɛki ye n fàra dee na wi wòlo yáriree ni wi taa kapɛɛnni na Erehɔbi jáaw Hadadezɛɛri ma lè wi pye lè Soba fànʔafɔw.

¹³ A Davidi tɔ̀nɔ n mɛ́ʔɛ taa, wi yìri lè Edɔmi ye tɛɛ̀jáagi ni, poro bele ni wi kpóo lè selebingéle kpanjɛrɛ Sólomi Jǐnlɔgɔ ni.

¹⁴ A wi kapɛɛnkpumɔnbéle télege Edɔmi ni. Wi maa kapɛɛnkpumɔnbèle télege n màʔa Edɔmi tɛ́ɛyi myɛ ni. A Edɔmi ye myɛ peyɛɛ gaan Davidi ma. Davidi ga kári tɛʔɛ o tɛʔɛ ni, Yawe n sáà fànʔa kaan wi ma.

Davidi syɛɛnkpolobèle mɛ́ɛyɛ

¹⁵ A Davidi pye fǎngi na Isirayɛli ye myɛ nyúngi na. Wi maa ni wi syɛ́ɛnbèle myɛ kèlē cɔɔnri sínni ní kányɛɛgi na.

¹⁶ Zyowabi wi lè Seruya jáaw, woro wi da pye kapɛɛnkpumɔnbèle nyúngo na. Ahiludi jáaw Zyozafati si i nyɛ fǎngi kèlē sɛ́bɛtɛʔɛɔ.

¹⁷ Bele si pe da pye lè sáriga-wòlobèle, poro be nyɛ Sadɔki wi lè Ahitubi jáaw, ní Ahimelɛki wi lè Abyatari jáaw. Seraya wi pye sɛ́bɛkanw.

¹⁸ Yehoyada jáaw Benayahu wi da pye Kerɛti ye ní Pelɛti ye nyúngi na. Davidi jáabèle si maa pye fǎngi kacɔɔnribéle.